ພະອາຈານໃຫຍ່ ມະຫາເວດ ມະເສໄນ ຮອງປະທານສູນກາງອົງການພຸດທະສາສະໜາສຳພັນລາວ ຜູ້ຊີ້ນຳວຽກງານກຳມາທິການເຜີຍແຜ່ສິນລະທຳ ແລະ ປະຕິບັດກຳມະຖານທົ່ວປະເທດ ໄດ້ຖະແຫຼ່ງຂ່າວໃນວັນທີ 1 ພະຈິກ 2018, ນະຄອນຫຼວງວຽງຈັນ ວ່າ: ອົງການພຸດທະສາສະໜາລາວ ຈະເປັນເຈົ້າພາບໃນການປະຊຸມພຸດທະສາສາະໜາ 3 ປະເທດ (ລາວ-ກຳປູເຈຍ-ຫວຽດນາມ) ໃນວັນທີ 12 ພະຈິກ 2018 ທີ່ຫໍປະຊຸມແຫ່ງຊາດ ໂດຍມີການນຳຂັ້ນສູງຂອງອົງການພຸດທະສາສະໜາ 3 ປະເທດ ລວມທັງໝົດ 500 ອົງ.
ກອງປະຊຸມດັ່ງກ່າວທີ່ຈະຈັດຂຶ້ນໃນໄວໆນີ້, ເປັນຄັ້ງທຳອິດ ຂອງອົງການພຸດທະສາສະໜາລາວ-ກຳປູເຈຍ-ຫວຽດນາມ ທີ່ໄດ້ຈັດກອງປະຊຸມຂຶ້ນ ໂດຍພາຍໃຕ້ຫົວຂໍ້: “ເພີ່ມທະວີມູນເຊື້ອສາຍພົວພັນຄວາມສາມັກຄີ ແລະ ການຮ່ວມມືລະຫວ່າງອົງການພຸດທະສາສະໜາ 3 ປະເທດ ໃນເງື່ອນໄຂເຊື່ອມໂຍງກັບພາກພື້ນ ແລະ ສາກົນ” ເພື່ອເປັນການຍົກສູງບົດບາດອົງການພຸດທະສາສະໜາສຳພັນລາວ ໃນເວທີພາກພື້ນ ແລະ ສາກົນ ທັງເປັນການເສີມຂະຫຍາຍສາຍພົວພັນມິດຕະພາບຄວາມສາມັກຄີ ທີ່ເປັນມູນເຊື້ອຂອງປະຊາຊົນ 3 ຊາດ ໂດຍສະເພາະສາມອົງການພຸດທະສາສະໜາລາວ-ກຳປູເຈຍ-ຫວຽດນາມ.
ໃນກອງປະຊຸມດັ່ງກ່າວ, ຈະໄດ້ຮັບຟັງການປະກອບຄຳເຫັນຂອງຜູ້ແທນ 3 ປະເທດ ກ່ຽວກັບການພົວພັນຮ່ວມມືໃນວຽກງານພຸດທະສາສະໜາໃນໄລຍະຜ່ານມາ ແລະ ແລກປ່ຽນຄຳເຫັນທິດທາງໃນຕໍ່ໜ້າ ພ້ອມທັງຮັບຮອງເອົາບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງອົງການພຸດທະສາສະໜາລາວ-ກຳປູເຈຍ-ຫວຽດນາມ ແລະ ຮັບຮອງເອົາບົດບັນທຶກວ່າດ້ວຍການຮ່ວມມືຂອງປະທານອົງການພຸດທະສາສະໜາລະຫວ່າງສາມປະເທດ ສະບັບທຳອິດ. ນອກນັ້ນ, ຈະໄດ້ເຂົ້າຢ້ຽມຢາມການນຳຂັ້ນສູງຂອງພັກ-ລັດ, ທັດສະນະສຶກສາໃນສະຖານທີ່ສຳຄັນທາງພຸດທະສາສະໜາທາງດ້ານວັດທະນາທຳ, ປະຫວັດສາດ ຢູ່ນະຄອນຫຼວງວຽງຈັນ ແລະ ແຂວງຫຼວງພະບາງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່