ສຳນັກຂ່າວໄທລາຍງານວ່າ: ພົບຮອຍແຕກແຫງຊຸດໂຊມຢູ່ຂົວມິດຕະພາບແຂວງຄຳມ່ວນ (ລາວ)-ນະຄອນພະນົມ (ໄທ) ແຫ່ງທີ 3 ບໍລິເວນຝັ່ງລາວ ແລະ ຝັ່ງໄທ, ໃນວັນທີ 2 ພະຈິກ 2019. ເຈົ້າໜ້າທີ່ປະເທດໄທຊີ້ແຈ້ງວ່າ: “ບໍ່ມີຜົນກະທົບຕໍ່ໂຄງສ້າງຂອງຂົວ ແລະ ໝັ້ນໃຈວ່າຍັງຈະບໍ່ກະທົບຕໍ່ການຄົມມະນາຄົມຂົ່ນສົ່ງ”. ຮອຍດັ່ງກ່າວ, ພົບເຫັນບໍລິເວນຈຸດຮັບນ້ຳໜັກ ແລະ ຍັງມີຄວາມເສຍຫາຍຂອງແບຣິງ ຫຼື ເອີ້ນວ່າ (Main span) ເຊິ່ງມີທັງໝົດປະມານ 10 ຈຸດ ຈາກທັງໝົດປະມານ 100 ຈຸດ.
ທ່ານ ວຸທິພົນ ຄຳພູແສນ ຜູ້ອຳນວຍການແຂວງທາງຫຼວງນະຄອນພະນົມ ໄດ້ຮ່ວມກັບເຈົ້າໜ້າທີ່ ທຳການສວດສອບໃນເບື້ອງຕົ້ນ ແລະ ໄດ້ສະຫຼຸບຜົນການກວດສອບສະພາບຂອງໂຄງສ້າງຂົວ ໂດຍຢືນຢັນວ່າ: “ເປັນການຊຸດໂຊມຕາມສະພາບການກໍ່ສ້າງ ແຕ່ບໍ່ມີຜົນກະທົບໃນການຄົມມະນາຄົມຂົນສົ່ງ ແລະ ສາມາດໃຊ້ງານໄດ້ປົກກະຕິ ປັດຈຸບັນ, ໄດ້ມີການສະເໜີແຜນງົບປະມານກວ່າ 35 ລ້ານບາດ ເພື່ອນຳໃຊ້ເຂົ້າໃນການສ້ອມແປງ ເຊິ່ງຕອນນີ້ຢູ່ໃນລະຫວ່າງການຊອກຫາບໍລິສັດຜູ້ຮັບເໜົາ”.
ພ້ອມນັ້ນ, ທ່ານ ກຽງໄກ ສີສຸຣາດ ຜູ້ຈັດການດ່ານຂົວມິດຕະພາບລາວ-ໄທ ແຫ່ງທີ 3 ກ່າວອີກຕື່ມວ່າ: ຂົວແຫ່ງນີ້, ກໍ່ສ້າງຂຶ້ນດ້ວຍງົບປະມານລັດຖະບານໄທ ເປັນເງິນຈຳນວນ 1.700 ລ້ານບາດ ໂດຍສຳເລັດ ແລະ ເປີດນຳໃຊ້ມາແຕ່ປີ 2011, ມີໄລະຍະທາງ 780 ແມັດ, ຄວາມຍາວລວມທັງສອງຝັ່ງປະມານ 1.400 ແມັດ ຖືເປັນເສັ້ນທາງເສດຖະກິດທີ່ສຳຄັນໃຫ້ແກ່ການຄົມມະນາຄົມຂົນສົ່ງເຊື່ອມຕໍ່ໄປລາວ, ຫວຽດນາມ ແລະ ຈີນ. ໃນແຕ່ລະມື້ມີລົດເຂົ້າ-ອອກສະເລ່ຍ 500-600 ຄັນ, ສາມາດເກັບລາຍຮັບໄດ້ປະມານ 60-65 ລ້ານບາດ/ປີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມເສດຖະກິດການຄ້າ