ວັນທີ 3 ພະຈິກ 2018, ທີ່ເມືອງໄວຽງໄຊ ແຂງຫົວພັນ ໄດ້ເປີດນຳໃຊ້ຈຸດຊົມວີວຜານາງ ມ້ອນ ຢ່າງເປັນທາງການ ຫຼັງຈາກໄດ້ດຳເນີນການກໍ່ສ້າງມາແຕ່ປີ 2017 ໂດຍສູນກາງຊາວໜຸ່ມປະຊາຊົນ ປະຕິວັດລາວ ເປັນເຈົ້າຂອງໂຄງການ ດ້ວຍມູນຄ່າການກໍ່ສ້າງທັງໝົດ 700 ລ້ານກີບ. ຈຸດຊົມວິວດັ່ງກ່າວ, ຈະເປັນອີກສະຖານທີ່ແຫ່ງໜຶ່ງທີ່ສາມາດດຶງດູດນັກທ່ອງທ່ຽວໄດ້ຫຼາຍ.
ທ່ານ ອາລຸນໄຊ ສູນນະລາດ, ກຳມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ ກ່າວວ່າ: ໃນການເປີດຈຸດຊົມວີວຜານາງມ້ອນ ນີ້, ເພື່ອເປີດໃຫ້ນັກທ່ອງທ່ຽວໄດ້ຂຶ້ນຊົມວີວ ຫຼື ທີວທັດທີ່ສວຍງາມຂອງຕົວເມືອງ ວຽງໄຊ ແລະ ປີນີ້ເປັນປີທ່ອງທ່ຽວລາວ 2018 ອາດຈະກາຍເປັນອີກສະຖານທີ່ສຳຄັນແຫ່ງໜຶ່ງຂອງເມືອງ ເພື່ອດຶງດູດເອົາບັນດານັກທ່ອງທ່ຽວຈາກພາຍໃນ ແລະ ນອກ ເຂົ້າມາຫຼາຍຂຶ້ນກ່ວາເກົ່າ. ສຳລັບທຶນໃນການກໍ່ສ້າງແມ່ນໄດ້ມາຈາກການລະດົມທຶນນຳຊາວໜຸ່ມລາວ ແລະ ຫວຽດນາມ ເຊິ່ງການກໍ່ສ້າງມີຄ່າຫຼາຍກ່ວາ 700 ລ້ານກີບ, ໃນນັ້ນໄດ້ສ້າງເສັ້ນທາງ ຫຼື ຂັ້ນໃດຂຶ້ນຜານາງ ມ້ອນ ແລະ ສ້າງສິ່ງອຳນວຍຄວາມສະດວກຕ່າງໆ ເພື່ອສະດວກໃນການທ່າຽວຊົມວີວຢູ່ຜາດັ່ງກ່າວ.
ກ່ອນຈະເປີດພິທີນຳໃຊ້ຈຸດຊົມວີວຜານາງ ມ້ອນ, ທາງສູນກາງຊາວໜຸ່ມປະຊາຊົນ ປະຕິວັດລາວ ໄດ້ຈັດພິທີເປີດຖໍ້າຄະນະຊາວໝຸ່ມ ປະຊາຊົນປະຕິວັດລາວ ຢ່າງເປັນທາງການ ພາຍຫລັງທີ່ບູລະນະສຳເລັດ. ຖ້ຳດັ່ງກ່ວ, ເຄີຍເປັນບ່ອນເຮັດວຽກຂອງຄະນະຊາວໜຸ່ມ ລາວ ໃນສະໄໝຕໍ່ສູ້ກູ້ຊາດຕ້ານການຮຸກຮານຂອງພວກຈັກກະພັດລ່າເມື່ອງຂຶ້ນແບບເກົ່າ ແລະ ໃໝ່.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Lao-National-Radio