ລັດຖະບານອີຕາລີ ປະກາດແຜນການໃຫ້ລາງວັນພໍ່ແມ່ທີ່ມີລູກຄົນທີ່ 3 ດ້ວຍການມອບທີ່ດິນໃຫ້ 1 ຕອນ ສະເພາະຄົນທີ່ເກີດລູກໃນລະຫວ່າງປີ 2019 ຫາປີ 2021 ເນື່ອງຈາກ, ເປັນວິທີການແກ້ໄຂບັນຫາຂອງປະເທດ ທີ່ກຳລັງປະເຊີນໜ້າກັບບັນຫາອັດຕາການເກີດຫຼຸດລົງຕໍ່າສຸດໃນຮອບຫຼາຍປີ.
ສຳນັກຂ່າວເອເອຟພີລາຍງານ ຈາກນະຄອນຫຼວງໂຣມ, ປະເທດອີຕາລີ ໃນວັນທີ 31 ຕຸລາ ວ່າ: ອີງຕາມຮ່າງແຜນການ ທີ່ຮ່າງຂຶ້ນ ແລະ ຢູ່ໃນຮ່າງງົບປະມານລາຍຈ່າຍສຳລັບປີໜ້າ ລັດຖະບານມອບທີ່ດິນສຳລັບການໃຫ້ກຳເນີດບຸດເປັນໄລຍະເວລາ 20 ປີ ໃຫ້ກັບພໍ່ແມ່ທີ່ມີລູກຄົນທີ່ 3 ລະຫວ່າງປີ 2019 ຫາປີ 2021 ເນື່ອງຈາກ ອີຕາລີ ມີອັດຕາການເກີດຕໍ່າທີ່ສູດໃນທະວີບເອີຣົບ.
ປີຜ່ານມາ, ມີການແຈ້ງຈົດທະບຽນການເກີດໃໝ່ປະມານ 464.000 ຄົນເຊິ່ງເປັນສະຖິຕິທີ່ຕໍ່າທີ່ສຸດ ກາຍເປັນສະຖິຕິໃໝ່ ເຮັດໃຫ້ອີຕາລີກາຍເປັນສັງຄົມທີ່ມີຜູ້ສູງອາຍຸຢ່າງຊັດເຈນ.
ທ່ານ ຈີອານ ນາຣໂຄ ເກນຕິໄນໂອ, ລັດຖະມົນຕີກະຊວງກະສິກຳ ກ່າວວ່າ: ອີຕາລີ ມີເດັກເກີດໃໝ່ໜ້ອຍລົງ ດັ່ງນັ້ນ, ລັດຖະບານ ອາດກັບຄືນສູ່ແນວໂນ້ມການເພີ່ມອັດຕາປະຊາກອນ ກະຊວງກະສິກຳ ຈະໄດ້ແຈກທີ່ດິນ ໂດຍສະເພາະໃນພື້ນທີ່ຫ່າງໄກສອກຫຼີກ.
ເຊີ່ງໄດ້ຮັບການສະໜັບສະໜູນຈາກ ທ່ານ ລໍເຣນໂຊ ຟອນຕານາ, ລັດຖະມົນຕິກະຊວງຄອບຄົວ ແຫ່ງອີຕາລີ ແຜນການນີ້, ຈະຈຳກັດສະເພາະຄູ່ສາມີພັນລະຍາທີ່ໄດ້ສົມຣົດຖືກຕ້ອງຕາມກົດໝາຍ ແລະ ຈະບໍ່ນັບເອົາຄູ່ຢູ່ກິນນຳກັນທີ່ບໍ່ໄດ້ຈົດທະບຽນສົມຣົດ ສ່ວນຊາວຕ່າງຊາດທີ່ສົນໃຈຂໍ້ສະເໜີຂອງລັດຖະບານ ຈະຕ້ອງເປັນຄົນທີ່ອາໄສຢູ່ໃນ ອີຕາລີ ຢ່າງໜ້ອຍ 10 ປີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th