ເຈົ້າໜ້າທີ່ ປກສ ເມືອງຕົ້ນເຜິ້ງ ແຂວງບໍ່ແກ້ວ ບຸກຈັບກຸ່ມຜູ້ຖືກສົງໄສ ເປັນຊາຍປະມານ 7-8 ຄົນ ຂະນະທີ່ກຳລັງຂົນເປົ໋າເຄື່ອງອອກຈາກເຮືອໃສ່ທ້າຍກະບະລົດວີໂກ ສີຂາວ ໝາຍເລກທະບຽນ ກຈ 2511 ກຳແພງນະຄອນ ເຊິ່ງພົບເຫັນເປົ໋າຢາບ້າຈຳນວນ ທັງໝົດ 38 ເປົ໋າ ແລະ ອີກ 5 ເປົ໋າຊຸກເຊື່ອງໄວ້ໃນປ່າອ້ອມຂ້າງ; ລວມມີຢາບ້າເປົາລະ 50 ມັດ ລວມທັງໝົດມີ 2.150 ມັດ ຫຼື 4.300.000 ເມັດ ແຕ່ກຸ່ມຜູ້ຖືກສົງໄສໄຫວຕົວທັນ ຫຼົບໜີເຂົ້າປ່າ. ປັດຈຸບັນ, ເຈົ້າໜ້າທີ່ກຳລັງສືບຫາຈັບຕົວມາດຳເນີນຄະດີ.
ຜ່ານການກວດກາຂອງເຈົ້າໜ້າທີ່ ໃນເບື້ອງຕົ້ນໃຫ້ຮູ້ວ່າ: ວັນທີ 29 ຕຸລາ 2018, ເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ໄດ້ສົມທົບກັບທະຫານ ເມືອງຕົ້ນເຜິ້ງ ແຂວງບໍ່ແກ້ວ ເຂົ້າໄປກວດກາລົດວີໂກທີ່ແລ່ນເຂົ້າໄປຈອດຢູ່ແຄມທາງຂອງເຂດເໜືອ ບ້ານໃຫຍ່ສີເມືອງງາມ ເມືອງຕົ້ນເຜິ້ງ ທີ່ມີທ່າທີມີພິລຸດ. ພາຍຫຼັງເຂົ້າໄປກວດຈຸດດັ່ງກ່າວ, ພົບເຫັນກຸ່ມຜູ້ຖືກສົງໄສເປັນຊາຍປະມານ 7-8 ຄົນ ກຳລັງຂົນເປົາເຄື່ອງອອກຈາກເຮືອໃສ່ທ້າຍກະບະລົດວິໂກສີຂາວ ໝາຍເລກທະບຽນ ກຈ 2511 ກຳແພງນະຄອນ ເມື່ອກຸ່ມຜູ້ຖືກສົງໄສເຫັນເຈົ້າໜ້າທີ່ ກໍພາກັນແລ່ນຫຼົບໜີເຂົ້າປ່າແຄມຂອງ ທາງເຈົ້າໜ້າທີ່ຈິ່ງໄດ້ເຂົ້າໄປກວດກາ ແລະ ພົບເຫັນເປົາຢາບ້າຈຳນວນ 38 ເປົາ.
ຈາກນັ້ນ, ເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ໄດ້ລາຍງານໃຫ້ທາງ ປກສ ເມືອງຕົ້ນເຜິ້ງ ຮັບຊາບ ແລະ ໄດ້ແຕ່ງຕັ້ງເຈົ້າໜ້າທີ່ລົງມາສົມທົບ ກວດກາສະຖານທີ່ເກີດເຫດ ແລະ ຂອບເຂດບໍລິເວນປ່າອ້ອມຂ້າງ ພົບເຫັນເປົາຢາບ້າເຊື່ອງໄວ້ໃນປ່າອີກ 5 ເປົາ. ປັດຈຸບັນ, ເຈົ້າໜ້າທີ່ໄດ້ຍຶດຢາບ້າຈຳນວນດັ່ງກ່າວ ພ້ອມດ້ວຍລົດກະບະວີໂກ ແລະ ເຮືອອີກໜຶ່ງລຳໄວ້ເປັນຫຼັກຖານ, ສ່ວນຜູ້ຖືກຫາທີ່ກຳລັງເອົາຕົວຫຼົບໜີນັ້ນ ເຈົ້າໜ້າທີ່ກຳລັງຕິດຕາມນຳຈັບຕົວມາດຳເນີນຄະດີຕາມກົດໝາຍ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: nowmynews.blogspot.com