ເວລາ 17.30 ຂອງວັນທີ 27 ຕຸລາ 2018 ເກີດເຫດການອ່າງເກັບນ້ຳສວນປູກກ້ວຍແຕກທັງ 4 ດ້ານ ຢູ່ເມືອງນານ ແຂວງຫລວງພະບາງ ຍ້ອນອ່າງບໍ່ໄດ້ຮັບມາດຕະຖານ ແລະ ບໍ່ມີເຫຼັກ ມີຜູ້ເສຍຊີວິດ 4 ຄົນ ໃນນັ້ນເປັນເດັກນ້ອຍ 3 ຄົນ ແລະ ບາດເຈັບ 6 ຄົນ. ອ່າງດັ່ງກ່າວ ຫາກໍສ້າງໄດ້ພຽງແຕ່ 4 ວັນເທົ່ານັ້ນ ເຊິ່ງເປັນຂອງບໍລິສັດ ເຄພີ ແລະ ໄດ້ໃຫ້ການຊ່ວຍເຫຼືອໃນເບື້ອງຕົ້ນ 27 ລ້ານກີບ.

ຜູ້ສື່ຂ່າວໜັງສືພິມຫຼວງພະບາງໃໝ່ ໄດ້ລົງພື້ນທີ່ ແລະ ສຳພາດ ທ່ານ ພັນຕີ ບຸນ ສຸລິສັກ, ຫົວໜ້າ ປກສ ກຸ່ມສີວິໄລ ໃຫ້ຮູ້ວ່າ: ໃນວັນທີ 27 ຕຸລາ 2018 ເວລາປະມານ 17 ໂມງ 30 ນາທີ ຢູ່ທີ່ ເມືອງນານ ແຂວງຫລວງພະບາງ ໄດ້ເກີດເຫດການອ່າງເກັບນ້ຳສວນປູກກ້ວຍ ແຕກທັບຮ່າງກາຍກຳມະກອນສວນກ້ວຍ ແລະ ເດັກນ້ອຍຜູ້ທີ່ມາຊົມໃຊ້ນ້ຳ ເຮັດໃຫ້ມີຜູ້ເສຍຊີວິດຄາທີ່ 4 ຄົນ ໃນນັ້ນເປັນເດັກນ້ອຍ 3 ຄົນ ແລະ ບາດເຈັບ 6 ຄົນ. ອ່າງເກັບນ້ຳດັ່ງກ່າວ, ເປັນຂອງບໍລິສັດ ເຄພີ ຜູ້ສຳປະທານເນື້ອທີ່ດິນປູກກ້ວຍຢູ່ເຂດທົ່ງພຽງວິໄລ ເມືອງນານ ແຂວງຫລວງພະບາງ ເພື່ອນຳໃຊ້ກັກເກັບນ້ຳໄວ້ໃຫ້ກຳມະກອນສວນກ້ວຍໄດ້ອາບຊຳລະລ້າງຮ່າງກາຍ. ອ້າງກັບນ້ຳດັ່ງກ່າວ, ມີຄວາມຍາວ 5 ແມັດ, ກວ້າງ 3 ແມັດ ແລະ ສູງ 2 ແມັດ ກໍດ້ວຍດິນຈີ່ເປັນຮູບ 4 ຫຼ່ຽມ ແລະ ບໍ່ມີເຫຼັກເສີມ ເຊິ່ງຫາກໍ່ສ້າງໄດ້ພຽງ 4 ວັນ ແລ້ວກໍເກີດເຫດການອ່າງເກັບນ້ຳແຕກ ຍ້ອນການກໍ່ສ້າງບໍ່ໄດ້ມາດຕະຖານ ແລະ ບໍ່ໄດ້ເສີມເຫຼັກ. ເນື້ອທີ່ຂອງສວນກ້ວຍທັງໜົດ 100 ເຮັກຕາ, ສຳລັບການສູນເສຍ ແລະ ຄວາມເສຍຫາຍທີ່ເກີດຂຶ້ນບໍລິສັດ ເຄພີ ເປັນຜູ້ຮັບຜິດຊອບທັງໝົດ ໂດຍໄດ້ໃຫ້ການຊ່ວຍເຫຼືອໃນເບື້ອງຕົ້ນ 27 ລ້ານກີບ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນ, ຮູບພາບຈາກ: ຂ່າວສານຫຼວງພະບາງ