ຈີນ ຊ່ວຍເຫຼືອລາວ ສ້າງສູນປ້ອງກັນ ແລະ ຄວບຄຸມພະຍາດສັດຂ້າມຊາຍແດນ 3 ແຫ່ງ ດ້ວຍມູນຄ່າທັງໝົດ 39 ລ້ານຢວນ ຫຼື ເທົ່າກັບ 51 ຕື້ກີບ ພ້ອມທັງຊ່ວຍເຫຼືອດ້ານອຸປະກອນການວິໄຈພະຍາດ. ສູນດັ່ງກ່າວ ຈະເປັນຕົວຊ່ວຍສຳຄັນໃນການເຝົ້າລະວັງ ແລະ ຄວບຄຸມພະຍາດສັດຂ້າມຊາຍແດນລະຫວ່ງລາວ-ຈີນ. ປັດຈຸບັນ, ສູນດັ່ງກ່າວໄດ້ສ້າງສຳເລັດແລ້ວ.
ໃນວັນທີ 26 ຕຸລາ 2018 ໄດ້ມີພິທີມອບຮັບໂຄງການຊ່ວຍເຫຼືອລາວ ຂຶ້ນທີ່ນະຄອນຫຼວງວຽງຈັນ ກ່ຽວກັບການປ້ອງກັນ ແລະ ຄວບຄຸມພະຍາດສັດຂ້າມຊາຍແດນ. ທ່ານ ສົມພັນ ຈັນເພັງ ຫົວໜ້າກົມລ້ຽງສັດ ແລະ ການປະມົງໄດ້ກ່າວວ່າ: ໃນການສ້າງສູນດັ່ງກ່າວ, ສປ ຈີນ ໄດ້ຊ່ວຍເຫຼືອໃນດ້ານການເງິນ ແລະ ວິຊາການແກ່ລາວ ເຊິ່ງເປັນການຊ່ວຍເຫຼືອລ້າ ມີທັງໝົດ 3 ແຫ່ງຄື: ສູນເຝົ້າລະວັງ 1 ແຫ່ງ ຢູ່ນະຄອນຫຼວງວຽງຈັນ, ສະຖານີເຝົ້າລະວັງ 2 ແຫ່ງ ຢູ່ແຂວງຫຼວງນໍ້າທາ ແລະ ແຂວງຜົ້ງສາລີ ລວມມູນຄ່າທັງໝົດ 39 ລ້ານຢວນ ຫຼື ເທົ່າກັບ 51 ຕື້ກີບ ໂດຍກວມເອົາເນື້ອທີ່ 2 ພັນກວ່າເຮັກຕາ. ນອກນັ້ນ, ຍັງປະກອບມີອຸປະກອນການວິໄຈພະຍາດສັດໃຫ້ແກ່ລາວ ເພື່ອສະໜັບສະໜູນໃນການປ້ອງກັນເຝົ້າລະວັງ ແລະ ຄວບຄຸມພະຍາດສັດຂ້າມຊາຍແດນລະຫວ່າງລາວ-ຈີນ.
ພ້ອມນັ້ນ, ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີ ກະຊວງກະສິກຳປ່າໄມ້ ໄດ້ກ່າວວ່າ: ໂຄງການດັ່ງກ່າວ, ຈະນຳໃຊ້ວິໄຈ ແລະ ຕອບໂຕ້ພະຍາດສັດຂ້າມຊາຍແດນໄດ້ແຕ່ຫົວທີ, ຈະເປັນເຄື່ອງມືສຳຄັນສຳລັບການວິໄຈ ແລະ ຢັ້ງຢືນສຸຂະພາບສັດໃຫ້ແກ່ບັນດາໂຄງການລ້ຽງສັດ, ວຽກງານກັກກັນ ແລະ ສຸຂະອະນາໄມສັດ ເພື່ອສົ່ງອອກຈາກລາວສູ່ຈີນ ທີ່ພາກເອກະຊົນກຳລັງລົງທຶນຢູ່ລາວ ແລະ ຖ້າບໍ່ມີສູນນີ້ເກີດຂຶ້ນ ບັນດາໂຄງການພາກລັດ ກໍຄືເອກະຊົນ ທີ່ມີຈຸດປະສົງລ້ຽງ-ສົ່ງສັດອອກໄປຈີນກໍຄົງຈະເປັນໄປບໍ່ໄດ້.
ໂຄງການດັ່ງກ່າວ, ເລີ່ມກໍ່ສ້າງມາແຕ່ທ້າຍປີ 2016 ສຳເລັດໃນກາງປີ 2018, ພາຍຫຼັງມອບ-ຮັບສູນດັ່ງກ່າວ, ຈະສືບຕໍ່ຮ່ວມມືດ້ານວິຊາການເປັນເວລາ 2 ປີ ໂດຍເຝິກອົບຮົມກ່ຽວກັບການນຳໃຊ້ເຄື່ອງມື, ເຕັກນິກການວິໄຈ ແລະ ດຳເນີນການເຝົ້າລະວັງດ້ານລະບາດວິທະຍາ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສີພິມວຽງຈັນໃໝ່, ໜັງສືພິມເສດຖະກິດ-ສັງຄົມ
ຮູບພາບຈາກ: ໜັງສືພິມວຽງຈັນໃໝ່