ເມື່ອວັນທີ 26 ຕຸລາ 2018 ທີ່ຜ່ານມາ ແຂວງບໍລິຄຳໄຊ ໄດ້ຈັດກອງປະຊຸມປຶກສາຫາລື ແລະ ປະເມີນຄືນກ່ຽວກັບການແກ້ໄຂຄວາມທຸກຍາກ ແລະ ການພັດທະນາແບບຍືນຍົງ ຕິດພັນກັບການລຶບລ້າງຄວາມທຸກຍາກໃນໄລຍະຜ່ານມາ.
ບັນຫາການແກ້ໄຂຄວາມທຸກຍາກ ແລະ ພັດທະນາຊົນນະບົດເປັນບັນຫາທີ່ພັກ-ລັດຖະບານ ໄດ້ສຸມໃສ່ຈັດຕັ້ງປະຕິບັດຢ່າງຕັ້ງໜ້າ ເພື່ອໃຫ້ອັດຕາຄວາມທຸກຍາກຂອງປະຊາຊົນບັນດາເຜົ່າຫຼຸດລົງເປັນກ້າວໆ ໂດຍໄດ້ຮ່ວມກັບພະນັກງານລົງກໍ່ສ້າງຮາກຖານພັດທະນາຊົນນະບົດເປັນຕົ້ນ ວຽກງານສາມສ້າງຜ່ານການຈັດຕັ້ງປະຕິບັດແຕ່ປີ 2000 ເປັນຕົ້ນມາ ໄດ້ມີຜົນສຳເລັດຫຼາຍດ້ານ ເຊິ່ງສະແດງໃຫ້ເຫັນໄດ້ຈາກອັດຕາຄວາມທຸກຍາກໄດ້ຫຼຸດລົງຕໍ່ເນື່ອງຄື:
- ປີ 2011 ຄອບຄົວທຸກຍາກມີ 198,678 ຄອບຄົວ
- ປີ 2015 ຄອບຄົວທຸກຍາກມີ 76,604 ຄອບຄົວ
- ປີ 2017 ຄອບຄົວທຸກຍາກມີ 64,593 ຄອບຄົວ
ນອກນີ້, ຕົວຊີ້ວັດທາງສັງຄົມອື່ນໆກໍ່ມີຄວາມຄືບໜ້າເປັນຕົ້ນ ຫຼາຍຄອບຄົວມີບ່ອນຢູ່ອາໄສ ແລະ ມີສຸຂະອະນາໄມດີຂຶ້ນ ເປັນເຈົ້າຂອງຊັບສິນຫຼາຍຂຶ້ນ ສາມາດເຂົ້າເຖິງການບໍລິການຂັ້ນພື້ນຖານໄດ້ດີກວ່າເກົ່າ ຫຼາຍຕົວຊີ້ວັດບອກໃນ MDG ສາມາດບັນລຸຄາດໝາຍ ຄື: ອັດຕາເຂົ້າຮຽນສຸດທິຊັ້ນປະຖົມ ແລະ ອັດຕາການຕາຍຂອງເດັກອາຍຸຕໍ່າກວ່າ 1 ປີ ດັດຊະນີພັດທະນາມະນຸດຂອງ ສປປ ລາວ ໄດ້ຮັບການປັບປຸງດີຂຶ້ນຈາກ 0,473 ໃນປີ 2000 ເປັນ 0,586 ໃນປີ 2015 ທະນາຄານໂລກ ໄດ້ເລື່ອນຖານະຂອງປະເທດລາວຂຶ້ນ ຈາກປະເທດລາຍຮັບຕໍ່າ ເປັນປະເທດລາຍຮັບປານກາງ ໃນປີ 2011.
ກອງປະຊຸມຄັ້ງນີ້ ຜູ້ເຂົ້າຮ່ວມຍັງໄດ້ສຸມໃສ່ປຶກສາຫາລືບັນຫາດັ່ງກ່າວ ເພື່ອນຳໄປຈັດຕັ້ງປະຕິບັດຢູ່ຂົງເຂດວຽກງານຕົນ ແຕ່ລະທ້ອງຖິ່ນໃຫ້ໄດ້ຮັບຜົນສຳເລັດ ເຮັດໃຫ້ອັດຕາການແກ້ໄຂຄວາມທຸກຍາກທົ່ວປະເທດຮອດປີ 2020 ໃຫ້ຫຼຸດລົງຍັງເຫຼືອ 10% ເພື່ອນຳພາປະເທດຊາດຫຼຸດພົ້ນອອກຈາກປະເທດດ້ອຍພັດທະນາທີ່ພັກ-ລັດວາງໄວ້. ດັ່ງນັ້ນ, ການແກ້ໄຂຄວາມທຸກຍາກເປັນບັນຫາສຳຄັນ ເປັນໜ້າທີ່ຂອງທຸກພາກສ່ວນ ແລະ ສັງຄົມ.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: ໜັງສືພິມວຽງຈັນໃໝ່
ຮູບປະກອບ: ໜັງສືພິມເສດຖະກິດ-ການຄ້າ