ເປັນເຫດການສຸດລະທຶກຂອງວົງການບານລະດັບໂລກ ເມື່ອເຮລິຄອບເຕີ້ຂອງທີມເລສເຕີ້ ຊີຕີ້ ເກີດອຸບັດຕິເຫດຕົກຂ້າງສະໜາມແຂ່ງຂັນຫຼັງຈົບເກມທີ່ເລສເຕີ້ ຊີຕີ້ ສະເໝີກັບ ເວສແຮມ ຢູໄນເຕັດ ໃນຄືນຂອງວັນທີ 27 ຕຸລາ 2018ທີ່ຜ່ານມາ. ເຊິ່ງໄດ້ສ້າງຄວາມແຕກຕື່ນໃຫ້ກັບແຟນບານ ໂດຍສະເພາະແຟນບານຊາວໄທເມື່ອມີລາຍງານວ່າ ເຈົ້າສົວວິໄຊ ສີວັດທະນາປະພາ ເຈົ້າຂອງທີມເລສເຕີ້ ຊີຕີ້ ແລະ ຜູ້ບໍລິຫານ ຄິງພາວເວີ້ ເປັນໜຶ່ງໃນ 8 ຜູ້ໂດຍສານທີ່ຢູ່ເຖິງເຮລິຄັອບເຕີ້ລຳນີ້.
ຂະນະທີ່ເຈົ້າໜ້າທີ່ຕຳຫຼວດແຫ່ງເລສເຕີເຊຍເຜີຍຖະແຫຼງການລ່າສຸດວ່າມີຜູ້ເສຍຊີວິດທັງໝົດ 5 ຄົນ ເຖິງແມ່ນວ່າຈະຍັງບໍ່ທັນມີການພິສູດເອກະລັກບຸກຄົນ ແຕ່ເຊື່ອວ່າປະກອບມີ: ທ່ານ ວິໄຊ ສີວັດທະນາປະພາ, ນາງ ນຸສະຣາ ສຸກໜ້າໄມ້, ທ້າວ ກະວີພອນ ພັນນະພອນ ແລະ ນັກບິນອີກ 2 ຄົນຄື: ເອຣິກ ສະວາຟເຟີ ແລະ ອິຊາເບລາ ໂຣຊາ.
ເມື່ອວັນທີ 29 ຕຸລາ 2018 ທາງບໍລິສັດເລໂອນາໂດ SPA ໜຶ່ງໃນຜູ້ຜະລິດ ແລະ ພັດທະນາເຮືອບິນລາຍໃຫຍ່ຂອງໂລກຈາກອິຕາລີ ອອກຖະແຫຼງການເມື່ອວັນທີ 28 ຕຸລາ ສະແດງຄວາມເສຍໃຈຢ່າງສູງສຸດໄປຍັງຄອບຄົວ ແລະ ຍາດພີ່ນ້ອງຂອງຜູ້ເສຍຊີວິດຈາກອຸບັດຕິເຫດທາງອາກາດທີ່ເກີດຂຶ້ນທີ່ສະໜາມຄິງ ພາວເວີ້ ສະເຕດຽມ ຂອງສະໂມສອນບານເຕະ ເລສເຕີ ຊີຕີ້.
ບໍລິສັດເລໂອນາໂດຢືນຢັນວ່າ ເຮລີຄັອບເຕີ້ທີ່ຕົກເປັນຮຸ່ນ AW169 ເຊິ່ງເປັນເຮືອບິນໃບພັດແບບ 2 ເຄື່ອງຍົນ ບັນຈຸໄດ້ 10 ບ່ອນນັ່ງ ແລະ ຖືວ່ານີ້ເປັນຄັ້ງທຳອິດທີ່ເຮລິຄັອບເຕີ້ຮຸ່ນດັ່ງກ່າວເກີດອຸບັດຕິເຫດ ເຊິ່ງທາງບໍລິສັດພ້ອມໃຫ້ຄວາມຮ່ວມມືຢ່າງເຕັມທີ່ກັບພະນັກງານສອບສວນຂອງອັງກິດ; ດ້ານສຳນັກງານກວດສອບອຸບັດຕິເຫດທາງອາກາດ (AAIB) ຈະເປັນຜູ້ນຳໃນການສືບສວນສອບສວນຫາສາເຫດຂອງອຸບັດຕິເຫດໃນຄັ້ງນີ້.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: khaosod, dailynews
ຮູບປະກອບ: khaosod