ວັນທີ 21 ຕຸລາຜ່ານມາ ຢູ່ ໄຕ້ຫວັນ ເກີດອຸບັດຕິເຫດລົດໄຟໂດຍສານຄວາມໄວສູງ ໃນພາກຕາເວັນອອກຂອງໄຕ້ຫວັນຕົກລາງ ເຮັດໃຫ້ມີຜູ້ເສຍຊີວິດຢ່າງໜ້ອຍ 18 ຄົນ ແລະ ໄດ້ຮັບບາດເຈັບ 178 ຄົນ ເຊິ່ງມື້ຕໍ່ມາວັນທີ 22 ຕຸລາ 2018 ທ່ານ ນາງ ໄຊ່ ອິງ ເຫວິນ ຜູ້ນຳຂອງເກາະໄຕ້ຫວັນໄດ້ລົງຕິດຕາມກວດກາພື້ນທີ່ເກີດເຫດ ແລະ ຢືນຢັນໃຫ້ການຊ່ວຍເຫຼືອແກ້ຜູ້ປະສົບອຸປະຕິເຫດຄັ້ງນີ້.
ຕາມຂ່າວຕ່າງປະເທດລາຍງານຈາກເມືອງ ອີ້ຫຼານ ສປ ຈີນ ວ່າ: ອຸປະຕິເຫດຂະບວນລົດໄຟໂດຍສານຄວາມໄວສູງ ສາຍປູຍູມາ ທະບຽນ 6432 ເຊິ່ງມີຜູ້ໂດຍສານ 360 ຄົນ ກຳລັງເດີນທາງຈາກເມືອງ ຊູ່ຫຼິນ ທີ່ຍູຊານ ກຸງໄທເປ ໄປຍັງເມືອງ ໄຖຕົງ ທາງທິດຕະເວັນອອກສ່ຽງໃຕ້ ຕົກລາງໃກ້ສະຖານີຊີນໝ່າໃນເຂດອີ້ຫຼານໃນຕອນຄໍ່າຂອງວັນທີ 21 ຕຸລາທີ່ຜ່ານມາ ຈຳນວນຕູ້ລົດໄຟຕົກລາງມີທັງໜົດ 8 ຕູ້ ແລະ ມີ 5 ຕູ້ທີ່ສະແຄງຢູ່ ເຊິ່ງອຸປະຕິເຫດດັ່ງກ່າວ ຕ້ອງມີການສອບສວນຫາສາເຫດ ແລະ ຖືວ່າຮ້າຍແຮງທີ່ສຸດໃນຮອບຫຼາຍກວ່າ 3 ທົດສະວັດ ໂດຍເກີດຂຶ້ນໃນເສັ້ນທາງທີ່ນິຍົມເດີນທາງ ເຮັດໃຫ້ການບໍລິການລົດໄຟທັງສອງເສັ້ນຕ້ອງໂຈະຊົ່ວຄາວ.
ທາງກະຊວງຄົມມະນາຄົມໃນກຸງໄທເປ ໄດ້ລະບຸຈຳນວນຜູ້ເສຍຊີວິດຈາກເຫດການຄັ້ງນີ້ຢ່າງໜ້ອຍມີຜູ້ເສຍຊີວິດ 18 ຄົນ ແລະ ມີຜູ້ໂດຍສານໄດ້ຮັບບາດເຈັບປະມານ 180 ຄົນ ເຊິ່ງຜູ້ເສຍຊີວິດມີອາຍຸນ້ອຍສຸດພຽງ 9 ປີ ແລະ ຍັງມີນັກຮຽນອາຍຸ 12 ປີ ກັບ 13 ປີເສຍຊີວິດອີກດ້ວຍ ທັງສອງເປັນນັກຮຽນຂອງໂຮງຮຽນແຫ່ງໜຶ່ງໃນເມືອງ ໄຖຕົງ.
ທາງດ້ານໜ່ວຍງານທີ່ກ້ຽວຂ້ອງໄດ້ພະຍາຍາມຕະຫຼອດຄືນໃນການເຄື່ອນຍ້າຍຕູ້ໂດຍສານທັງໝົດອອກຈາກລາງລົດໄຟ ແລະ ສືບຕໍ່ກວດສອບທຸກຊີ້ນສ່ວນຂອງຂະບວນລົດໄຟຢ່າງລະອຽດ ເພື່ອຄົ້ນຫາຜູ້ສູນຫາຍ ເຊິ່ງລາຍງານເບື້ອງຕົ້ນລະບຸວ່າຈຳນວນຜູ້ໂດຍສານໃນລົດໄຟສາຍນີ້ມີຫຼາຍກວ່າ 360 ຄົນ. ທ່ານ ນາງ ໄຊ່ ອິງ ເຫວິນ ຜູ້ນຳຂອງເກາະໄຕ້ຫວັນໄດ້ລົງຕິດຕາມກວດກາພື້ນທີ່ເກີດເຫດ ແລະ ໄດ້ເດີນທາງໄປຢຽມຢາມຜູ້ບາດເຈັບທີ່ໂຮງໝໍ ພ້ອມທັງຢືນຢັນໃຫ້ການຊ່ວຍເຫຼືອແກ້ຜູ້ປະສົບອຸປະຕິເຫດຄັ້ງນີ້.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: dailynews.co.th