ເນື່ອງຈາກປີນີ້, ສະພາບດິນຟ້າອາກາດ ແລະ ໄພນໍ້າຖ້ວມ-ແຫ້ງແລ້ງ ເຮັດໃຫ້ນໍ້າຂອງເຂດດອນຈັນບົກແຫ້ງ-ເຂີນຕື້ນ ບໍ່ສາມາດຊ່ວງເຮືອໄດ້ ໂດຍສະເພາະເຮືອຂະໜາດໃຫຍ່ 55 ສີພາຍ, ແຕ່ບຸນຊ່ວງເຮືອທ່າວັດຈັນຈະຕ້ອງໄດ້ຈັດຂຶ້ນທຸກປີ ຕາມຮີດຄອງປະເພນີທີ່ເຄີຍປະຕິບັດກັນມາແຕ່ຫຼາຍເຊັ່ນຄົນ. ດັ່ງນັ້ນ, ປີນີ້ຈະໄດ້ຈັດຂຶ້ນ 2 ມື້ຄື: ວັນທີ 24-25 ຕຸລາ 2018 ແລະ ມີ 2 ບ່ອນຄື: ຢູ່ທ່າວັດຈັນ ແລະ ຕໍ່ໜ້າໂຮງແຮມແລນມາກແມ່ຂອງຣີເວີໄຊ.
ວັນທີ 22 ຕຸລາ 2018 ຫ້ອງວ່າການປົກຄອງນະຄອນຫຼວງ ຄະນະຮັບຜິດຊອບຊີ້ນຳງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ປະຈຳປີ 2018 ໄດ້ຈັດກອງປະຊຸມປືກສາຫາລືກະກຽມບຸນດັ່ງກ່າວ, ໃນການປະຊຸມໄດ້ມີການຕົກລົງເຫັນດີກັນໃນການຈັດກິດຈະກຳບຸນຊ່ວງເຮືອທ່າວັດຈັນອອກເປັນ 2 ມື້ຄື: ວັນທີ 24 ຕຸລາ 2018 ຢູ່ທ່າວັດຈັນຈະມີການແຂ່ງເຮືອປະເພດ 12 ສີພາຍ ໂດຍມີເຮືອເຂົ້າຮ່ວມແຂ່ງຂັນ 8 ລຳ; ວັນທີ 25 ຕຸລາ 2018 ຈະຈັດຢູ່ຕໍ່ໜ້າໂຮງແຮມແລນມາກແມ່ຂອງຣີເວີໄຊ ແຂ່ງເຮືອປະເພດ 55 ສີພາຍ ມີເຮືອເຂົ້າຮ່ວມ 17 ລຳ, ເຮືອສູດຊາຍ 5 ລຳ, ເຮືອປະເພນີຍິງ 5 ລຳ ແລະ ເຮືອປະເພນີຊາຍ 7 ລຳ. ສຳລັບເວລາໃນການແຂ່ງຂັນເລີ່ມແຕ່ 09:00-16:00 ໂມງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່