ຫ້ອງການປ້ອງການຄວາມສະຫງົບ (ປກສ) ແຈ້ງການເຖິງນັກສຶກສາຜູ້ທີ່ໄດ້ລົງທະບຽນສະໝັກກຳລັງທົດແທນ ແລະ ກຳລັງໃໝ່ ຢູ່ກອງບັນຊາການ ປກສ ນະຄອນຫຼວງວຽງຈັນ ສົກປີ 2018 ໃຫ້ມາຕິດຕາມລາຍຊື່ຂອງຕົນ ແລະ ກຽມເອກະສານ ເພື່ອເຂົ້າມາສຳພາດໃນລະຫວ່າງວັນທີໃນວັນທີ 27-29 ຕຸລາ 2018; ຖ້າຜູ້ໃດບໍ່ມາສຳພາດຕາມລຳດັບຂອງຕົນເອງແມ່ນໄປຕໍ່ເລກລຳດັບຂອງຄົນສຸດທ້າຍ ແລະ ມາບໍ່ທັນເວລາທີ່ກຳນົດໄວ້ຖືວ່າສະຫຼະສິດ.
ພາຍຫຼັງທີ່ ປກສ ໄດ້ອອກແຈ້ງການໃນວັນທີ 9 ຕຸລາ 2018 ເພື່ອຮັບສະໝັກນັກຮຽນເສັງເຂົ້າກຳລັງ ປກສ ນະຄອນຫຼວງວຽງຈັນ ໂດຍເລີ່ມເປີດຮັບສະໝັກວັນທີ 10-15 ຕຸລາ 2018. ວັນທີ 22 ຕຸລາ 2018 ຫົວໜ້າຫ້ອງການກອງບັນຊາການ ປກສ ນະຄອນຫຼວງວຽງຈັນ ຈິ່ງໄດ້ແຈ້ງເຖິງບັນດານັກຮຽນຜູ້ທີ່ຮຽນຈົບ ແລະ ນັກຮຽນຈົບ ມ7 ທີ່ໄດ້ລົງທະບຽນສະໝັກເຂົ້າກຳລັງທົດແທນ ແລະ ກຳລັງໃໝ່ຢູ່ກອງບັນຊາການ ປກສ ນະຄອນຫຼວງວຽງຈັນ ຊາບວ່າ: ໃຫ້ເຂົ້າມາສຳພາດ ແລະ ກວດກາສຸຂະພາບ ຢູ່ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ໃນວັນທີ 27-29 ຕຸລາ 2018 ເພື່ອຄັດເລືອກເຂົ້າເປັນກຳລັງປ້ອງກັນຄວາມສະຫງົບ ນະຄອນຫຼວງວຽງຈັນ ໂດຍໃຫ້ຜູ້ສະໝັກໄປກວດລາຍຊື່ ເພື່ອກຳໃຫ້ໄດ້ໝາຍເລກລຳດັບເຂົ້າສຳພາດຂອງຕົນຕາມສະຖານທີ່ຕ່າງໆຄື: ສຳນັກງານ ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ (ຂ້າງເດີ່ນພະທາດຫຼວງ ແລະ ຕິດກັບວັດໜອງບອນ); ສຳນັກງານກອງບັນຊາາການ ປກສ ນະຄອນຫຼວງວຽງຈັນ (ບ້ານໂພນປາເປົ້າ, ເມືອງ ສີສັດຕະນາກ, ນະຄອນຫຼວງວຽງຈັນ) ເຊິ່ງວັນເວລາ, ໝາຍເລກລຳດັບຜູ້ເຂົ້າສຳພາດແຕ່ລະວັນ ແລະ ສະຖານທີ່ສຳພາດຄື:
ວັນທີ 27 ຕຸລາ 2018 ໃຫ້ຜູ້ສະໝັກນັບແຕ່ໝາຍເລກລຳດັບ 01 ຫາໝາຍເລກ 360 ມາສຳພາດ
ວັນທີ 28 ຕຸລາ 2018 ໃຫ້ຜູ້ສະໝັກນັບແຕ່ໝາຍເລກລຳດັບ 361 ຫາເລກລຳດັບ 720 ມາສຳພາດ
ວັນທີ 29 ຕຸລາ 2018 ໃຫ້ຜູ້ສະໝັກນັບແຕ່ໝາຍເລກລຳດັບ 721 ຫາເລກລຳດັບ 1075 ມາສຳພາດ
ເວລາສຳພາດເລີ່ມແຕ່ 08:00-16:00 ໂມງ, ສະຖານທີ່ສຳພາດ ທີ່ສຳນັກງານກອງພັນເຄື່ອນທີ່ ປກສ ນະຄອນຫຼວງວຽງຈັນ ຕັ້ງຢູ່ບ້ານ ໜອງບອນ, ເມືອງ ໄຊເສດຖາ, ນະຄອນຫຼວງວຽງຈັນ.
ສຳລັບການກະກຽມເອກະສານ ຜູ້ສຳພາດຈະຕ້ອງມີຊີວະປະຫວັດຫຍໍ້ ມ7 , ໃບປະກາດຈົບ ມ7 ພ້ອມໃບຄະແນນ, ໃບປະກາດຈົບວິຊາສະເພາະ ພ້ອມໃບຄະແນນ, ສຳເນົາສຳມະໂນຄົວ, ບັດປະຈຳຕົວ ແລະ ໃບຢັ້ງຢືນອື່ນໆທີ່ກ່ຽວຂ້ອງ (ເອກະສານທັງໝົດຕ້ອງເປັນສະບັບຂອງແທ້ມີກາແດງ). ຜູ້ສະໝັກແຕ່ລະຄົນຈະໄດ້ຈ່າຍຄ່າບໍລິການ, ຄ່າເອກະສານ 30.000 ກີບ ແລະ ຄ່າກວດສຸຂະພາບ 50.000 ກີບ ລວມເປັນຜູ້ລະ 80.000 ກີບ. ຖ້າຫາກວ່າຜູ້ໃດບໍ່ມາສຳພາດຕາມລຳດັບຂອງຕົນເອງແມ່ນໄປຕໍ່ເລກລຳດັບຂອງຄົນສຸດທ້າຍ ແລະ ມາບໍ່ທັນເວລາທີ່ກຳນົດໄວ້ຖືວ່າສະຫຼະສິດ.
ແຈ້ງການດັ່ງກ່າວໄດ້ອີງຕາມ ແຈ້ງການຂອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ສະບັບເລກທີ 3255/ກມປສ, ລົງວັນທີ 08 ຕຸລາ 2018 ເລື່ອງແຜນການຮັບກຳລັງໃໝ່ ສົກປີ 2018; ແຈ້ງການຂອງກອງບັນຊາການ ປກສ ນະຄອນຫຼວງວຽງຈັນ ສະບັບເລກທີ 1023/ປກສ.ນວ, ເລື່ອງເປີດຮັບເອກະສານນັກຮຽນຜູ້ທີ່ຮຽນຈົບ ມ7 ເພື່ອສອບເສັງຄັດເລືອກເຂົ້າກຳລັງ ປກສ ນະຄອນຫຼວງວຽງຈັນ ພ້ອມທັງການຕົກລົງເຫັນດີຂອງຄະນະຮັບິດຊອບສອບເສັງກຳລັງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ກອງບັນຊາການ ປກສ ນະຄອນຫຼວງວຽງຈັນ