ທ່ານ ສີ ຈິ້ນຜິງ ປະທານ ປະເທດ ສປ ຈີນ ເປີດເຜີຍວ່າ ຈີນໄດ້ພາປະຊາຊົນ 700 ລ້ານຄົນ ຫຼຸດພົ້ນອອກຈາກຄວາມທຸກຍາກ, ມັນຄືສິ່ງມະຫັດສະຈັນໃນປະຫວັດສາດຂອງມະນຸດ ແລະ ພ້ອມສືບຕໍ່ພາລະກິດນຳພາປະຊາຊົນອີກ 10 ລ້ານຄົນອອກຈາກຄວາມທຸກຍາກໃນປີ 2020.
ຕາມຂ່າວຊິນຮວາລາຍງານໃນທ້າຍອາທິດຜ່ານມານີ້ວ່າ: ຜູ້ນຳຂອງຈີນໄດ້ກ່າວວ່າ ການປະຕິຮູບ ແລະ ເປີດປະເທດມາຍາວນານຫຼາຍກວ່າ 40 ປີ; ປັດຈຸບັນ, ໄດ້ນຳພາປະຊາຊົນຈີນຫຼາຍກວ່າ 700 ລ້ານຄົນຫຼຸດພົ້ນອອກຈາກຄວາມທຸກຍາກ ໂດຍຖືເປັນສິ່ງມະຫັດສະຈັນໃນປະຫວັດສາດຂອງມະນຸດ. ທ່ານສີ ຈິ້ນຜິງ ກ່າວວ່າ: “ບັນຫາຄວາມທຸກຍາກໄດ້ເກີດຂຶ້ນມາດົນນານນັບຫຼາຍໆພັນປີ ຢູ່ໃນແຜນດິນຈີນກຳລັງຈະຖືກແກ້ໄຂຄັ້ງປະຫວັດສາດ ແລະ ການບັນເທົາຄວາມທຸກຍາກໄດ້ເຂົ້າສູ່ໄລຍະສຳຄັນທີ່ສຸດໃນປັດຈຸບັນ ຮຽກຮ້ອງໃຫ້ມີຄວາມມຸ່ງໝັ້ນຕັ້ງໃຈຕໍ່ສູ້ເອົາຊະນະກັບຄວາມທຸກຍາກ, ໃຫ້ພາກສ່ວນຕ່າງໆໄດ້ຮັບຮູ້ ແລະ ສະແດງຄວາມຮັບຜິດຊອບນຳກັນຢ່າງຖືກຕ້ອງ ແລະ ເໝາະສົມ”.
ນອກຈາກນັ້ນ, ທ່ານ ຫຼີ່ ເຄີ້ສຽງ ນາຍົກລັດຖະມົນຕີຂອງຈີນ ໄດ້ກ່າວເຖິງພາລະກິດນຳພາປະຊາຊົນອີກ 10 ລ້ານຄົນອອກຈາກຄວາມທຸກຍາກພາຍໃນປີນີ້ ແລະ ການບັນລຸເປົ້ນໝາຍຄືການຈຳກັດຄວາມທຸກຍາກຢ່າງສິ້ນເຊິງພາຍໃນປີ 2020.
ຮຽບຮຽງຂ່າວ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ຫຼັງສືພິມເສດຖະກິດ-ສັງຄົມ