ຢີ່ປຸ່ນ ກຳລັງປະເຊີນໜ້າກັບບັນຫາຂີ້ເຫຍື້ອພລາສຕິກລົ້ນປະເທດ ເນື່ອງຈາກຈີນຢຸດນຳເຂົ້າຂີ້ເຫຍື້ອ ແລະ ບໍ່ມີຄວາມສາມາດກຳຈັດຂີ້ເຫຍື້ອພລາສຕິກທີ່ມີຈຳນວນເພີ່ມຂຶ້ນເລື້ອຍໆ ຈົນເກີນລະດັບມາດຕະຖານດ້ານສຸຂະອະນາໄມ ບັນຫາດັ່ງກ່າວ, ລັດຖະບານສັ່ງໃຫ້ມີການຣິໄຊເຄິລຂີ້ເຫຍື້ອ ເພື່ອຫວັງແກ້ໄຂບັນຫາໄດ້.
ຕາມຂ່າວຕ່າງປະເທດລາຍງານວ່າ: ຈາກການສຳຫຼວດ ຂອງກະຊວງສິ່ງແວດລ້ອມຂອງປະເທດຍີ່ປຸ່ນ ພົບວ່າ ລັດຖະບານຂອງເຂດທີ່ສຳຄັນຂອງຍີ່ປຸ່ນ ປະມານ 1 ໃນ 3 ປະສົບບັນຫາຂີ້ເຫຍື້ອພລາສຕິກທີ່ເພີ່ມຂຶ້ນເລື້ອຍໆ ບາງຄັ້ງເກີນກວ່າລະດັບມາດຕະຖານດ້ານສຸຂະອະນາໄມ. ນອກຈາກນັ້ນ, ການສຳຫຼວດຂອງກະຊວງໄດ້ສອບຖາມລັດຖະບານທ້ອງຖິ່ນຫຼາຍກວ່າ 100 ແຫ່ງ ແລະ ບໍລິສັດກຳຈັດຂີ້ເຫຍື້ອ 175 ແຫ່ງ ເຊິ່ງລະບຸວ່າຄ່າໃຊ້ຈ່າຍໃນການກຳຈັດຂີ້ເຫຍື້ອເພີ່ມຂຶ້ນຫຼາຍ. ພ້ອມນັ້ນ, ລັດຖະບານຍີ່ປຸ່ນກ່າວວ່າ ຈະຂະຫຍາຍຂີດຄວາມສາມາດໃນການກຳຈັດບັນຫາດັ່ງກ່າວ ແລະ ຫ້າມຖີ້ມຂີ້ເຫຍື້ອຢ່າງຜິດກົດໝາຍ ແລະ ເພີ່ມຄວາມພະຍາຍາມໃນການສົ່ງເສີມໃນການນຳເອົາຂີ້ເຫຍື້ອໄປແປຮູບກັບມາໃຊ້ງານໄດ້ອີກ ຫຼື ການຣິໄຊເຄິລຂີ້ເຫຍື້ອ.
ໃນຜົນການສຶກສາທີ່ຫາກໍຕິພິມໃນວາລະສານດ້ານວິທະຍາສາດລະບຸວ່າ ຂີ້ເຫຍື້ອພລາສຕິກເກືອບ 3 ໃນ 4 ເກີດຂຶ້ນທົ່ວໂລກ ນັບແຕ່ປີ 1992 ຖືກສົ່ງໄປຈີນ ແລະ ຮົງກົງ ເຊິ່ງນັບແຕ່ເດືອນມັງກອນຜ່ານມາ ຈີນປິດບໍ່ຮັບຂີ້ເຫຍື້ອພລາສຕິກ ແລະ ເຈ້ຍເຂົ້າປະເທດອີກຕໍ່ໄປ ໂດຍຕາມນະໂຍບາຍໃໝ່ດ້ານສິ່ງແວດລ້ອມ. ກ່ອນຈີນຈະຫ້າມນຳເຂົ້າຂີ້ເຫຍື້ອ ຍີ່ປຸ່ນໄດ້ສົ່ງຂີ້ເຫຍື້ອພະລາສະຕິກປະມານ 1,5 ລ້ານໂຕນ ແລະ ສ່ວນໃຫຍ່ສົ່ງໄປຈີນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບຈາກ:www.misawa.af.mil