ນະຄອນຫຼວງວຽງຈັນ ເປີດບໍລິການຮັບເອກະສານໂດຍກົງ ບໍ່ຈຳເປັນຕ້ອງຜ່ານຫຼາຍພາກສ່ວນ ພ້ອມມີການກຳນົດໄລຍະເວລາຮັບເອກະສານ 10 ວັນ ຖ້າເກີດມີບັນຫາໃນກໍລະນີເອກະສານບໍ່ຖືກຕ້ອງສາມາດປ່ຽນແປງກັບທີ່ໄດ້ເລີຍ. ວຽກງານດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ເດືອນສິງຫາ 2018 ເປັນຕົ້ນມາ; ປັດຈຸບັນມີ 600 ກວ່າຄົນທີ່ມາໃຊ້ບໍລິການ. ໃນຕໍ່ໜ້າອາດຈະການສື່ສານຜ່ານສື່ອອນລາຍ ເພື່ອລາຍງານໃຫ້ຮູ້ກ່ຽວກັບການສຳເລັດຂອງເອກະສານ.
ໃນວັນທີ 11 ຕຸລາ 2018, ທ່ານ ນາງ ວຽງຊຳ ວົງສາລີ ຮອງຫົວໜ້າຂະແໜງບໍລິຫານຄຸ້ມຄອງຫ້ອງວ່າການປົກຄອງ ນະຄອນຫຼວງວຽງຈັນ ໃຫ້ການສຳພາດວ່າ: “ອີງຕາມທິດຊີ້ນຳຂອງເຈົ້າຄອງນະຄອນຫຼວງວຽງຈັນ ແລະ ຈາກການຖອດຖອນບົດຮຽນ ຈາກຫ້ອງວ່າການສຳນັກງານນາຍົກລັດຖະມົນຕີ, ຫ້ອງວ່າການປົກຄອງນະຄອນຫຼວງ ຈິ່ງໄດ້ເປີດວຽກງານປະຕູດຽວ ເພື່ອບໍລິການເອກະສານຂອງປະຊາຊົນຊາວນະຄອນຫຼວງວຽງຈັນ ໃຫ້ວ່ອງໄວຂຶ້ນ ແລະ ມີຄວາມໂປ່ງໃສ. ຫ້ອງວ່າການນະຄອນຫຼວງວຽງຈັນມີ 17 ພາກສ່ວນ ມີພຽງ 4 ພາກສ່ວນໃຫຍ່ທີ່ໄດ້ຕາງໜ້າໃຫ້ພາກສ່ວນດັ່ງກ່າວມາປະຈຳການຄື: ຄະນະຈັດຕັ້ງນະຄອນຫຼວງວຽງຈັນ, ພະແນກກວດກາ, ພະແນກໄປສະນີ ໂທລະຄົມມະນາຄົມ ແລະ ການສື່ສານ ແລະ ພະແນກພາຍໃນ. ສຳລັບການບໍລິການເອກະສານຈາກເມື່ອກ່ອນແມ່ນໄປຍື່ນໃຫ້ແຕ່ລະພາກສ່ວນທີ່ຕົນເອງພົວພັນ ພາຍຫຼັງເປີດປະຕູດຽວເອກະສານຈະມາຍື່ນຢູ່ຂາເຂົ້າຢູ່ຈຸດດຽວ ແລະ ຂອດການແລ່ນເອກະສານທີ່ເຂົ້າມາແລ້ວ ໂດຍກຳນົດ 10 ວັນ. ຈາກນັ້ນ, ຜູ້ຍື່ນສາມາດພົວພັນເອົາເອກະສານຂອງຕົນເອງຢູ່ຂາອອກປະຕູດຽວ. ນອກນີ້, ເວລາປະຊາຊົນມາຍື່ນເອກະສານ ຖ້າກວດເບິ່ງບໍ່ຖືກຕ້ອງຈະມີການປັບປຸງໃຫ້ກັບທີ່ເລີຍ ເພື່ອເຮັດໃຫ້ບໍ່ຕ້ອງເສຍເວລາ ຄືກັບຜ່ານມາຕ້ອງເອົາເອກະສານໄປແປງຢູ່ພະແນກທີ່ກ່ຽວຂ້ອງທີ່ຕ້ອງເສຍເວລາ 2-3 ມື້”.
ຜ່ານການເປີດບໍລິການນັບແຕ່ມື້ເລີ່ມຕົ້ນ ເຖິງປັດຈຸບັນມີ 600 ກວ່າຄົນທີ່ມາໃຊ້ບໍລິການ ແລະ ສ່ວນຫຼາຍທີ່ມີຜູ້ນຳໃຊ້ບໍລິການຫຼາຍກວ່າໝູ່ແມ່ນວຽກພາຍໃນ ເປັນຕົ້ນແມ່ນເອກະສານຂໍແຕ່ງງານ, ວຽກງານພັກຂອງຄະນະຈັດຕັ້ງ ແລະ ອື່ນໆ. ແຕ່ເພື່ອເຮັດໃຫ້ວຽກງານໄປໄດ້ດີຂຶ້ນເລື້ອຍໆ ໃຫ້ກວດກາເອກະສານຂອງຕົນຕື່ມ ເພື່ອໃຫ້ມີຄວາມຖືກຕ້ອງ ທັງນີ້ກໍ່ເພື່ອຄວາມວ່ອງໄວ.
ສຳລັບແຜນຕໍ່ໜ້າຈະນຳໃຊ້ແຜນທັນສະໄໝເຂົ້າຕື່ມອີກຄື: ເວລາເອກະສານສຳເລັດ ຈະແຈ້ງຜູ້ຍື່ນມາເອົາເອກະສານ ດ້ວຍການບອກ ຫຼື ໃຫ້ເຂົາເຈົ້າຖາມທາງວັອດແອບ (Whatsapp), ລາຍ (LINE), ເຟດບຸກ (FACEBOOK) ແລະ ອື່ນໆ ທີ່ເປັນສິ່ງອຳນວນຄວາມສະດວກໃຫ້ແກ່ປະຊາຊົນກໍຄືຜູ້ໃຊ້ບໍລິການ ບໍ່ຕ້ອງຈຳເປັນຕ້ອງທຽວມາຖາມເອກະສານຫຼາຍຄັ້ງ ເຊິ່ງເປັນການເສຍເວລາ ແລະ ສິ້ນເປືອງທາງເສດຖະກິດ.
ວຽກງານປະຕູດຽວ ເປັນວຽກງານອົງການຂອງລັດ ແຕ່ຂັ້ນສູນກາງລົງຮອດທ້ອງຖິ່ນ ໄດ້ຈັດຕັ້ງປະຕິບັດມາຫຼາຍປີ ແລະ ມີຜົນສຳເລັດເປັນກ້າວໆ ການບໍລິການເອກະສານຕ່າງໆໂດຍຜ່ານປະຕູດຽວເຮັດໃຫ້ມີຄວາມສະດວກວ່ອງໄວ ແລະ ມີຄວາມໂປ່ງໃສ. ສຳນັກງານປົກຄອງນະຄອນຫຼວງວຽງຈັນ ເປັນໜຶ່ງໃນບັນດາສຳນັກງານລັດທີ່ໄດ້ຈັດຕັ້ງປະຕິບັດວຽກງານດັ່ງກ່າວ ແຕ່ເດືອນສິງຫາ 2018 ເປັນຕົ້ນມາ. (ສຳລັບລາຍລະອຽດໃນການແລ່ນເອກະສານປະຕູດຽວ ຂອງຫ້ອງວ່າການປົກຄອງນະຄອນຫຼວງວຽງຈັນ ສາມາດຕິດຕໍ່ໄດ້ທີ່ເບີ: 021 260 206).
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: dpt-vc.gov.la