ຈາກສະພາບການທີ່ພົບເຫັນຢູ່ບັນດາຕົວເມືອງທີ່ຕິດກັບຊາຍແດນໃນປີຜ່ານ ຈະມີພໍ່ຄ້າຄົນກາງຈາກຕ່າງປະເທດເຂົ້າມາເກັບຊື້ເຂົ້າ ນຳຊາວນາຜູ້ເຮັດການຜະລິດເຂົ້າໂດຍພະລາການ ເພື່ອສົ່ງອອກໄປຕ່າງປະເທດ ແລະ ໄດ້ມີການເກງລາຄາເຂົ້າສູງກວ່າລາຄາຊື້-ຂາຍຕົວຈິງ ເຊິ່ງໄດ້ສົ່ງຜົນກະທົບອັນບໍ່ຊອບທຳໃຫ້ແກ່ຫົວໜ່ວຍທຸລະກິດທີ່ໄດ້ເສຍພັນທະໃຫ້ລັດຖະບານເຊັ່ນ: ພັນທະໃຫ້ແກ່ທະຫານ-ຕຳຫຼວດ, ພະນັກງານອົງການຈັດຕັ້ງສາກົນທີ່ເຂົ້າມາຊ່ວຍເຫຼືອເຂດຫ່າງໄກສອກຫຼີກທີ່ຂາດແຄນດ້ານສະບຽງອາຫານ, ເກັບຊື້ເຂົ້າໄວ້ເປັນຄັງແຮງຂອງລັດຖະບານ ແລະ ບັນຫາອື່ນໆ ເຮັດໃຫ້ບໍ່ສາມາດແຂ່ງກັບພໍ່ຄ້າຄົນກາງຈາກຕ່ງປະເທດໄດ້.
ຕໍ່ກັບບັນຫາດັ່ງກ່າວ, ກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການໃນວັນທີ 17 ກັນຍາ 2018, ສະບັບເລກທີ 1265/ອຄ, ກຄພນ ກ່ຽວກັບການສະກັດກັ້ນບັນຫາຊື້-ຊາຍເຂົ້າດັ່ງກ່າວນັ້ນບໍ່ໃຫ້ແຜ່ລາມ ໂດຍມອບໃຫ້ສະເພາະເຈົ້າໜ້າທີ່ການຄ້າ ເພີ່ມທະວີຄວາມເອົາໃຈໃສ່ໃນການຄຸ້ມຄອງ ແລະ ຕິດຕາມກວດກາຢ່າງເຂັ້ມງວດ; ຫ້າມເດັດຂາດບໍ່ໃຫ້ພໍ່ຄ້າຊາວຕ່າງຊາດເຂົ້າມາເກັບຊື້ເຂົ້າຢູ່ຕ່າງແຂວງ ແລະ ປັ່ນປ່ວນລາຄາເຂົ້າທີ່ບໍ່ມີລະບຽບວິສາຫະກິດຖືກຕ້ອງຕາມລະບຽບກົດໝາຍຂອງ ສປປ ລາວ.
ນອກຈາກນັ້ນ, ຍັງຫ້າມບໍ່ໃຫ້ບໍ່ໃຫ້ບຸກຄົນ, ຫົວໜ່ວຍທຸລະກິດ ຫຼື ໂຮງສີເຂົ້າຕ່າງໆຢູ່ພາຍໃນແຂວງ-ນະຄອນຫຼວງ ເປັນຕົວແທນເກັບຊື້ເຂົ້າໃຫ້ຊາວຕ່າງປະເທດ ໂດຍອາໄສໃບທະບຽບລັດວິສາຫະກິດຂອງຄົນລາວ ຫຼື ເອົາເງິນທຶນໃຫ້ເພື່ອເກັບຊື້ ແລະ ກັກຕຸນສິນຄ້າ, ສ້າງຄວາມປັ່ນປ່ວນທາງດ້ານລາຄາຊື້-ຂາຍເຂົ້າ, ຖ້າພົບເຫັນການກະທຳດັ່ງກ່າວ, ແມ່ນໃຫ້ຢຶດ ຫຼື ອາຍັດ ແລະ ປັບໃໝຕາມລະບຽບກົດໝາຍວາງອອກຢ່າງເຂັ້ມງວດ. ຜູ້ມີສິດເກັບຊື້ເຂົ້າຈາກຊາວນາ ຫຼື ກຸ່ມຊາວນາໄດ້ຕ້ອງເປັນສະມາຄົມ, ກຸ່ມໂຮງສີ ຫຼື ທຸລະກິດຊື້-ຂາຍເຂົ້າທີ່ມີໃບທະບຽບຖືກຕ້ອງເທົ່ານັ້ນ.
ກ່ຽວກັບແຈ້ງການດັ່ງກ່າວ, ທ່ານ ນາງ ຈັນເພັງ ແສງທະວີ ປະທານສະມາຄົມໂຮງສີເຂົ້ານະຄອນຫຼວງວຽງຈັນ ຜູ້ອຳນວຍການບໍລິສັດ ກໍາແພງເພັດ ຈັນສະຫວ່າງສົ່ງເສີມການກະເສດຂາອອກ-ຂາເຂົ້າ ຈຳກັດຜູ້ດຽວ ໃຫ້ໄດ້ທັດສະນະຕໍ່ກັບບັນຫາດັ່ງກ່າວວ່າ: “ເຫັນດີທີ່ສຸດທີ່ລັດເບິ່ງເຫັນບັນຫາຄວາມຫຍຸ້ງຍາກ ພ້ອມຫວັງວ່າເຈົ້າໜ້າທີ່ຮັບຜິດຊອບເບື້ອງລຸ່ມຈະຈິງຈັງຕໍ່ຂອດຈັດຕັ້ງປະຕິບັດ, ເຂັ້ມງວດກວດກາ ພ້ອມກັນແກ້ໄຂ ເນື່ອງຈາກຜ່ານທາງສະມາຊິກສະມາຄົມ ແມ່ນໄດ້ຮັບຜົນກະທົບໂດຍກົງ ຈາກການເຄື່ອນໄຫວດັ່ງກ່າວຂອງພໍ່ຄ້າເຂົ້າເຖື່ອນຕ່າງຊາດ”.
ໃນນາມຊາວບ້ານກໍຄືສະມາຄົມໂຮງສີເຂົ້າ ຂໍຮຽກຮ້ອງຕື່ມອີກວ່າ: “ໃຫ້ພາກສ່ວນລັດກວດກາຄືນເຂົ້າຈາກຕ່າງປະເທດໃກ້ຄຽງທີ່ມີການນຳເຂົ້າມາວາງຈຳໜ່າຍຕາມທ້ອງຕະຫຼາດຈຳນວນຫຼວງຫຼາຍ ໂດຍສະເພາະ ນະຄອນຫຼວງວຽງຈັນ ອາດມີຜົນກະທົບຕໍ່ລາຄາເຂົ້າໃນປີນີ້ໃຫ້ຕົກຕໍ່າລົງ ລວມເຖິງຜົນກະທົບຕໍ່ຫົວໜ່ວຍທຸລກິດເກັບຊື້ເຂົ້າ ແລະ ຊາວນາ ທັງນີ້ສະມາຄົມຢືນຢັນວ່າເຂົ້າໃນສາງແມ່ນມີພຽງພໍກັບຄວາມຕ້ອງການບໍລິໂພກຢ່າງແນ່ນອນ”.
ນອກຈາກນັ້ນ, ທ່ານໄດ້ກ່າວອີກຕື່ມວ່າ: “ສຳລັບ ບໍລິສັດ ກຳແພງເພັດ ແຈ້ງສະຫວ່າງສົ່ງເສີມການກະເສດຂາອອກ-ຂາເຂົ້າ ຈຳກັດຜູ້ດຽວ ໃນລະດູຝົນປີນີ້ ແມ່ນໄດ້ປູກເຂົ້າດ້ວຍເຄື່ອງຈັກທີ່ທັນສະໄໝ ເພື່ອຈຳໜ່າຍພາຍໃນ ແລະ ຕ່າງປະເທດຢູ່ 2 ເມືອງຄື: ເມືອງປາກງື່ມ ແລະ ເມືອງນາຊາຍທອງ ນະຄອນຫຼວງວຽງຈັນ ລວມເນື້ອທີ່ 2 ຮ້ອຍກວ່າເຮັກຕາ; ນອກຈາກນັ້ນ, ຍັງມີການສົ່ງເສີມຊາວນາ ໃນ 2 ເມືອງດັ່ງກ່າວເພື່ອປູກເຂົ້າປ້ອນໃຫ້ໂຮງສີເຂົ້າຂອງບໍລິສັດຕື່ມອີກ ນັບຮ້ອຍຄອບຄົວ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບ: simarsn.com