ພະແນກໂຍທາທິການ ແລະ ຂົນສົ່ງ (ຍທຂ) ນະຄອນຫຼວງວຽງຈັນ ອອກແຈ້ງການກ່ຽວກັບການປິດເສັ້ນທາງການສັນຈອນ ໃນຊ່ວງບຸນອອກພັນສາປະວໍລະນາ ແລະ ບຸນຊ່ວງເຮືອ ປະຈຳປີ 2018, ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ຄື: ຖະໜົນດອນຈັນ (ແຄມຂອງ) ແຕ່ສາມແຍກປາກປ່າສັກ ຫາ ອານຸສາວະລີເຈົ້າອານຸວົງ ແລະ ຖະໜົນເຈົ້າຟ້າງຸ່ມ ແຕ່ສາມແຍກປາກປ່າສັກ ຫາ ຫໍພະແກ້ວ ເລີ່ມປິດແຕ່ວັນທີ 22-27 ຕຸລາ 2018.
ເພື່ອເຮັດໃຫ້ການຈັດງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ປະຈຳປີ 2018, ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ດຳເນີນໄປໃນບັນຍາກາດແຫ່ງຄວາມສະຫງົບ, ປອດໄພຮອບດ້ານ ພະແນກ ຍທຂ ນະຄອນຫຼວງວຽງຈັນ ໄດ້ແຈ້ງການມາຍັງບັນດາບໍລິສັດ, ລັດວິສາຫາກິດ, ຫ້າງຮ້ານ, ພະນັກງານ, ທະຫານ-ຕຳຫຼວດ ຮອດພໍ່ແມ່ປະຊາຊົນບັນດາເຜົ່າ ຜູ້ທີ່ນຳໃຊ້ລົດໃຊ້ຖະໜົນ ໃນນະຄອນຫຼວງວຽງຈັນຮັບຊາບວ່າ: “ເລີ່ມແຕ່ວັນທີ 22-27 ຕຸລາ 2018 ເປັນຕົ້ນໄປ ໃຫ້ງົດການສັນຈອນພາຫະະນະທຸກປະເພດຊົ່ວຄາວ ເປັນບາງເວລາຕາມຖະໜົນດັ່ງນີ້: ຖະໜົນດອນຈັນ (ແຄມຂອງ) ແຕ່ສາມາແຍກປາກປ່າສັກ ຫາ ອານຸສາວະລີເຈົ້າອານຸວົງ; ຖະໜົນເຈົ້າຟ້າງຸ່ມ ແຕ່ສາມາແຍກປາກປ່າສັກ ຫາ ຫໍພະແກ້ວ). ໃຫ້ນັກຂັບຂີ່ພາຫະນັກທຸກປະເພດປະຕິບັດຕາມສັນຍານຂອງເຈົ້າໜ້າທີ່ຕຳຫຼວດຈາລະຈອນ ປະຈຳຢູ່ແຕ່ລະຈຸດຈາມເສັ້ນທາງ”. ພ້ອມກັນນັ້ນ, ຍັງໄດ້ມອບໃຫ້ຂະແໜງຄຸ້ມຄອງການຂົນສົ່ງພະແນກ ຍທຂ ນວ, ເຈົ້າໜ້າທີ່ຕຳຫຼວດຈາລາຈອນ ທຸກພາກສ່ວນເອົາໃສຈໃສ່ປະຕິບັດຢ່າງເຂັ້ມງວດ.
ແຈ້ງການດັ່ງກ່າວ, ໄດ້ອີງຕາມກົດໝາຍວ່າດ້ວຍການຈະລາຈອນທາງບົກ ສະບັບເລກທີ 23/ຫສຊ, ລົງວັນທີ 12 ທັນວາ 2012; ອິງໃສ່ກອງປະຊຸມປຶກສາຫາລືຂອງຄະນະປະຈຳພັກ ຄັ້ງວັນທີ 28 ກັນຍາ 2018; ອີງໃສ່ແຜນການເຄື່ອນໄຫວ ຂອງຄະນະຮັບຜິດຊອບ ຈັດງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ປະຈຳປີ 2018 ສະບັບເລກທີ 1916/ຈມ.ຈລ, ລົງວັນທີ 2 ຕຸລາ2018.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ພະແນກໂຍທາທິການ ແລະ ຂົນສົ່ງ (ຍທຂ) ນະຄອນຫຼວງວຽງຈັນ