ໃນວັນທີ 16 ຕຸລາ 2018, ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ທ່ານ ພັນຄຳ ວິພາວັນ ຮອງປະທານປະເທດ ປະທານຄະນະກຳມະທິການລະດັບຊາດ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການກະກຽມສະເຫຼີມສະຫຼອງເມືອງວຽງໄຊ ຄົບຮອບ 50 ປີວ່າ: “ກິດຈະກຳການສະເຫຼີມສະຫຼອງວັນສ້າງຕັ້ງເມືອງວຽງໄຊ ແຂວງຫົວພັນ ຄົບຮອບ 50 ປີ ຄັ້ງນີ້ ປະກອບມີ 12 ກິດຈະກຳໃຫຍ່ຄື: ພິທີໂຮມຊຸມນຸມໃຫຍ່ຢູ່ເມືອງວຽງໄຊ ວັນທີ 30 ພະຈິກ, ງານວາງສະແດງຮູບພາບຢູ່ນະຄອນຫຼວງວຽງຈັນ ແລະ ຢູ່ຖໍ້າຊ້າງລອດ ເມືອງ ວຽງໄຊ, ປາຖະກະຖາເລົ່າມູນເຊື້ອກ່ຽວກັບເມືອງ ວຽງໄຊຕິດພັນກັບມູນເຊື້ອຂອງການປະຕິວັດລາວ, ປະກວດບົດປະດິດຄິດແຕ່ງຕ່າງໆກ່ຽວກັບເມືອງວຽງໄຊ, ໂຄສະນາເມືອງວຽງໄຊຜ່ານສື່ຕ່າງໆ, ປຸກລະດົມບັນດາການຈັດຕັ້ງພັກ-ລັດ ແລະ ອົງການຈັດຕັ້ງມະຫາຊົນ ຕະຫຼອດຮອດບຸກຄົນສ້າງຂະບວນການປັງປຸງບຸລະນະສະຖານທີ່ ຫຼື ຖໍ້າທີ່ເປັນສຳນັກງານຂອງຕົນໃນອາດີດທີ່ເມືອງວຽງໄຊ, ຈັດກອງປະຊຸມສຳມະນາວິທະຍາສາດຢູ່ນະຄອນຫຼວງວຽງຈັນ, ຮຽບຮຽງປະຫວັດສາດເມືອງວຽງໄຊ, ປັບປຸງພິພິຕະພັນມູນເຊື້ອເມືອງວຽງໄຊຕິດພັນກັບພິພິຕະພັນ ໄກສອນ ພົມວິຫານ, ເປີດຂະບວນການຮັກຊາດ ແລະ ພັດທະນາຢູ່ເມືອງ ວຽງໄຊ ແລະ ຊຸກຍູ້ບັນດາໂຄງການພັດທະນາຢູ່ແຂວງຫົວພັນທີ່ລັດຖະບານໄດ້ຕົກລົງແລ້ວໃຫ້ດຳເນີນຕາມແຜນການໃຫ້ສຳເລັດ. ສຳລັບອະນຸກຳມະການຮັບຜິດຊອບວຽກງານຕ່າງໆເພື່ອກະກຽມການສະເຫຼີມສະຫຼອງເມືອງວຽງໄຊ ຄົບຮອບ 50 ປີ ປະກອບມີ 6 ອະນຸກຳມະການ. ປັດຈຸບັນ, ການກະກຽມວຽກງານຕ່າງໆໃຫ້ງານຄັ້ງນີ້ມີຄວາມພ້ອມແລ້ວໂດຍພື້ນຖານ”.
ນອກນັ້ນ, ຍັງມີຂະບວນຄາລະວານປະກອບມີ 4 ຂະບວນໃຫຍ່ທີ່ນອນຢູ່ໃນ 12 ກິດຈະກຳຄື ຂະບວນຄາລາວານຂອງສູນກາງສະຫະພັນແມ່ຍິງ ວັນທີ 8-12 ຕຸລາ 2018; ຂະບວນຄາລາວານຂອງສູນກາງສະຫະພັນກຳມະບານ ວັນທີ 23-27 ຕຸລາ 2018; ຂະບວນຄາລາວານຂອງສູນກາງຊາວໝຸ່ມປະຊາຊົນປະຕິວັດລາວ ວັນທີ 27-31 ຕຸລາ 2018 ແລະ ຂະບວນຄາລາວານຂອງຄະນະຮັບຜິດຊອບກະກຽມງານສະເຫຼີມສະຫຼອງເມືອງວຽງໄຊ ໂດຍກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ວັນທີ 27-31 ພະຈິກ 2018.
ເວລາດຽວກັນ, ທ່ານ ພັນຄໍາ ໄດ້ກ່າວເຖິງການຈັດງານຄັ້ງນີ້ມີ 3 ຈຸດປະສົງສຳຄັນຄື: ເພື່ອຫວນຄືນເຖິງມູນເຊື້ອ, ຄວາມປີຊາສາມາດ, ຄວາມສະຫຼາດສ່ອງໃສຂອງພັກປະຊາຊົນປະຕິວັດລາວ ໃນການນຳພາການປະຕິວັດປົດປ່ອຍຊາດ, ໂຄສະນາສຶກສາອົບຮົມພະນັກງານສະມາຊິກພັກ, ນັກຮົບ, ປະຊາຊົນບັນດາເຜົ່າ ໂດຍສະເພາະຄົນຮຸ່ນຫຼັງໃຫ້ເຂົ້າໃຈຢ່າງຈະແຈ້ງ ແລະ ເລິກເຊິ່ງເຖິງເສັ້ນທາງຂອງການປະຕິວັດໃນໄລຍະຜ່ານມາ ຈົນເຖິງປັດຈຸບັນ ແລະ ຖືເອົາການສະເຫຼີມສະຫຼອງຄັ້ງນີ້ ເພື່ອສຸກຍູ້ຂະບວນການຈັດຕັ້ງປະຕິບັດນະໂຍບາຍຂອງພັກ ໂດຍສະເພາະມະຕິກອງປະຊຸມໃຫຍ່ຄັ້ງທີ 10 ຂອງພັກໃຫ້ປະກົດຜົນເປັນຈິງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: lnr.org.la
ຮູບພາບຈາກ: http://kpl.gov.la