ໜຸ່ມສາວຫລາຍຄົນມີອາການປວດຫລັງ ບາງຄົນຄິດວ່າອາດເກີດຈາກສາຍເຫດນັ່ງຫລາຍເກີນໄປ ຫລືໄປເຮັດຫຍັງຜິດທ່າມາ ແຕ່ຮູ້ບໍ່ວ່າ ອາການປວດຫລັງກໍບໍ່ໄດ້ ໝາຍເຖິງພຽງແຕ່ອາການຜິດປົກກະຕິຂອງກະດູກເທົ່ານັ້ນ
ມີຄົນຈຳນວນຫລາຍທີ່ມີອາການປວດຫລັງແລ້ວຄິດວ່າ ເປັນອາການທີ່ເກີດກັບກະດູກ ຖາມວ່າ ເປັນໄປໄດ້ບໍທີ່ຈະເກີດຄວາມຜິດປົກກະຕິຂອງກະດູກ ຂອງກ້າມຊີ້ນ ກໍເປັນໄປໄດ້ ແຕ່ໃນບາງຄົນກໍຫາເປັນເຊັ່ນນັ້ນບໍ່
ອາການປວດຫລັງໂດຍທົ່ວໄປອາດເປັນອາການປວດຫລັງຈາກການນັ່ງຫລາຍເກີນໄປ ຍົກຂອງໜັກ ຫລື ອອກກຳລັງກາຍຫລາຍເກີນໄປ ໂດຍອາການທີ່ຮູ້ສຶກໄດ້ຄື ປວດເມື່ອຍ ກ້າມຊິ້ນເຄັ່ງ ແຕ່ຖ້າຫາກເປັນໜັກຈົນຮູ້ສຶກວ່າ ຫລັງຍັບບໍ່ໄດ້ ຫລື ປວດໄປຈົນເຖິງຂາຂ້າງໃດຂ້າງໜຶ່ງ ອາດເກີດຈາກໝອນຮອງກະດູກເຄື່ອນໄປກົດທັບເສັ້ນປະສາດ ເຊິ່ງຈະຕ້ອງໄປພົບແພດ ແລະ ການປິ່ນປົວຈະຕ້ອງໃຫ້ນຸ່ງເສື້ອທາງຫລັງ ແລະ ໃຫ້ເຂົ້າຮັບການເຮັດກາຍຍະພາບບຳບັດ ສ່ວນໃນຄົນທີ່ອາການໜັກຫລາຍອາດຕ້ອງຜ່າຕັດ
ແຕ່ບາງເທື່ອອາການປວດທີ່ເຮົາຄິດວ່າ ປວດຫລັງ ຫລື ບາງອາການທີ່ປວດຫລັງຊຳເຮື້ອ ກໍບໍ່ໄດ້ເປັນເພາະກ້າມຊິ້ນ ແລະ ກະດູກສະເໝີໄປ ມີລັກສະນະອາການປວດຫລັງບາງອາການທີ່ເປັນສັນຍານເຕືອນໄພຈາກພະຍາດທີ່ເກີດກັບອະໄວຍະວະພາຍໃນ ແລະ ຈຳເປັນຕ້ອງຮີບເຂົ້າຮັບການປິ່ນປົວຢ່າງທັນເວລາ
5 ອາການປວດຫລັງ ທີ່ບົ່ງບອກພະຍາດ
1. ອາການປວດຫລັງຮ່ວມກັບແຂນຂາຊາບໍ່ມີແຮງ
ກັ້ນຖ່າຍເບົາ ແລະ ຖ່າຍໜັກບໍ່ໄດ້ ເຊິ່ງລັກສະນະອາການດັ່ງກ່າວ ເປັນໄປໄດ້ວ່າ ໄຂສັນຫລັງໄດ້ຮັບບາດເຈັບ ທາງທີ່ດີຄວນຮີບປຶກສາແພດໝໍໂດຍດ່ວນ ເພື່ອມີການເອກເຊີເລ ກວດເບິ່ງກະດູກສັນຫລັງ ແລະ ຫາຕຳແໜ່ງທີ່ບາດເຈັບ ບາງຄົນພຽງໃຫ້ນອນພັກປິ່ນປົວໂຕກໍອາດຫາຍຈາກອາການດັ່ງກ່າວໄດ້ ແຕ່ບາງຄົນອາດຈຳເປັນຕ້ອງເຂົ້າຮັບການຜ່າຕັດ
2. ປວດຫລັງບໍລິເວນແອວ ແລະ ມີໄຂ້ໜາວສັ່ນ
ສາເຫດຂອງອາການອາດເກີດຈາກການຕິດເຊື້ອອັກເສບຂອງຫມາກໄຂ່ຫລັງ ຫລືອາດເປັນພະຍາດ ກວຍຫມາກໄຂ່ຫລັງອັກເສບ ໂດຍສາເຫດເຫລົ່ານີ້ເກີດໄດ້ຈາກການກິນນ້ຳໃນແຕ່ລະມື້ນ້ອຍເກີນໄປ ການອົດຍ່ຽວ
ໂດຍການປິ່ນປົວແພດຈະໃຊ້ໃຫ້ຢາຂ້າເຊື້ອ ແລະ ຢາອື່ນໆ ຕາມແຕ່ການພິຈາລະນາພະຍາດ ລວມເຖິງແນະໃຫ້ກິນນ້ຳຫລາຍໆ ປ່ຽນພຶດຕິກຳການອົດຍ່ຽວ ແລະເມື່ອປິ່ນປົວຫມາກໄຂ່ຫລັງຈົນເປັນປົກກະຕິດີແລ້ວ ອາການປວດດັ່ງກ່າວກໍຈະຫາຍໄປ
3. ປວດເທິງບັ້ນແອວທັງສອງຂ້າງ
ຫາກມີອາການປວດເທິງບັ້ນແອວທັງສອງຂ້າງ ແລະ ເມື່ອພົບແພດແລ້ວ ແພດອາດຄຳພົບກ້ອນບໍລິເວນຫມາກໄຂ່ຫລັງ ລວມເຖິງມີເລືອດປົນໃນຍ່ຽວ ມີຄວາມດັນເລືອດສູງ ແລະ ມີພາວະເລືອດຈາງຮ່ວມນໍາ ໃນກໍລະນີນີ້ເປັນສັນຍານບອກພະຍາດຖົງນ້ຳໃນຫມາກໄຂ່ຫລັງ ເຊິ່ງພະຍາດນີ້ເປັນພະຍາດທີ່ສາມາດຖ່າຍທອດທາງກໍາມະພັນໄດ້
ເມື່ອມີຖົງນ້ຳໃນຫມາກໄຂ່ຫລັງ ກໍຈະເຮັດໃຫ້ຫມາກໄຂ່ຫລັງເຮັດວຽກໄດ້ໜ້ອຍລົງ ເມື່ອຫມາກໄຂ່ຫລັງເຮັດວຽກໄດ້ຫລຸດລົງສົ່ງຜົນເສຍຕໍ່ຮ່າງກາຍເກີດພະຍາດຄວາມດັນເລືອດສູງ ຫມາກໄຂ່ຫລັງອາດຕິດເຊື້ອໄດ້ງ່າຍ ແລະ ຫມາກໄຂ່ຫລັງຊຳເຮື້ອຈົນ ຮອດຫມາກໄຂ່ຫລັງຢຸດເຮັດວຽກຖາວອນ ແລະ ນອກຈາກບັນຫາທີ່ຫມາກໄຂ່ຫລັງ ແລ້ວຍັງເຮັດໃຫ້ເກີດຖົງນ້ຳບ່ອນອື່ນໄດ້ນໍາເຊັ່ນ ຕັບ ຕັບອ່ອນ ຮວຍໄຂ່ ອັນທະ ແລະ ເກີດຫລອດເລືອດສະຫມອງໄດ້ດ້ວຍ
4. ອາການປວດຫລັງທີ່ເກີດໃນແມ່ຍິງຖືພາ
ອາດເປັນຜົນມາຈາກປັດໄຈຫລາຍຢ່າງ ເຊັ່ນ ຮໍໂມນ ໃນຮ່າງກາຍເກີດການປ່ຽນແປງເຮັດໃຫ້ເສັ້ນເອັນ ແລະ ກ້າມຊີ້ນຢຶດ ກະດູກຢ່ອນຍານ ການແບກຮັບນ້ຳໜັກທີ່ເພີ່ມຂຶ້ນຂອງເດັກນ້ອຍ ຫລື ມົດລູກທີ່ໃຫຍ່ຂຶ້ນ ກົດທັບເສັ້ນປະສາດເຮັດໃຫ້ປວດຫລັງຈົນໄປເຖິງຂາໄດ້
5. ປວດຫລັງຊຳເຮື້ອດົນເປັນເດືອນ ແລະ ປວດຫລາຍຂຶ້ນເລື່ອຍໆ
ຫາກເປັນໃນຄົນຕຸ້ຍ ຫລື ຜູ້ທີ່ມີອາຍຸຫລາຍກວ່າ 45 ປີ ອາດເກີດຂຶ້ນເນື່ອງຈາກພະຍາດໄຂຂໍ້ອັກເສບ ຫລື ກະດູກສັນຫລັງສຶກຝົນ ການປິ່ນປົວໃນກໍລະນີນີ້ແພດຈະໃຫ້ຢາແກ້ປວດມາກິນ ໃຫ້ຮັບການເຮັດກາຍຍະພາບບຳບັດ ແນະນຳໃຫ້ຮັບປະທານອາຫານທີ່ມີແຄຊຽມເພີ່ມຂຶ້ນ ຖ້າເປັນຄົນຕຸ້ຍຫລາຍກໍຈະຕ້ອງໃຫ້ຫລຸດນ້ຳໜັກ