ປັດຈຸບັນ, ການຄ້າມະນຸດໃນຂອບເຂດທົ່ວປະເທດ ຍັງສືບຕໍ່ເກີດຂຶ້ນດ້ວຍຫຼາຍຮູບການ ເປັນຕົ້ນແມ່ນການຕົວະຍົວະຫຼອກລວງໄປທ່ອງທ່ຽວ, ໄປຂາຍເຄື່ອງ, ເສີບອາຫານ ແລະ ເອົາແມ່ຍິງໄປແຕ່ງດອງກັບຕ່າງປະເທດ ເຊິ່ງມີຫຼາຍໃນ 5 ແຂວງຄື: ແຂວງຫົວພັນ, ບໍລິຄຳໄຊ ແລະ ນະຄອນຫຼວງວຽງຈັນ, ແຂວງບໍ່ແກ້ວ ແລະ ຊຽງຂວາງ.
ໃນວັນທີ 15 ຕຸລາ 2018, ທ່ານ ພັທ ຈັນເພັດ ໄຊສົມບູນ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ໄດ້ກ່າວໃນກອງປະຊຸມສະຫຼຸບວຽກງານຕຳຫຼວດສະກັດກັ້ນ ແລະ ຕ້ານການຄ້າມະນຸດທົ່ວປະເທດ ປະຈຳປີ 2018 ແລະ ວາງທິດທາງແຜນການປີ 2019 ຂອງກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ປກສ ວ່າ: ການຄ້າມະນຸດ ເປັນບັນຫາໜຶ່ງທີ່ເກີດຂຶ້ນຢ່າງຕໍ່ເນື່ອງຢູ່ໃນສັງຄົມດ້ວຍຫຼາຍຮູບການ ເປັນຕົ້ນແມ່ນການເອົາແມ່ຍິງລາວໄປແຕ່ງດອງກັບຄົນຕ່າງປະເທດທີ່ໂດຍບໍ່ຖືກຕ້ອງຕາມລະບຽບ-ກົດໝາຍ ເຊິ່ງໃຊ້ຮູບການໝັ້ນໝາຍ ຕົກລົງເລື່ອງຄ່າດອງແລ້ວກໍແລ່ນເອກະສານເດີນທາງໄປຕ່ງປະເທດເລີຍ. ປັດຈຸບັນ, ແມ່ຍິງລາວຖືກຕົວະຍົວະໃຫ້ເດີນທາງໄປ ສປ ຈີນ ປະມານ 3.000 ຄົນ (ຕົວເລກທີ່ຍັງບໍ່ເປັນທາງການ) ເຊິ່ງແມ່ຍິງລາວທີ່ຖືກເຄາະຮ້າຍບາງສ່ວນໄດ້ໂທລະສັບ ແລະ ວີແຊັດມາທາງຫ້ອງການກົງສູນລາວ ທີ່ປະຈຳຢູ່ຊຽງຮຸ່ງ ເພື່ອຂໍຄວາມຊ່ວຍເຫຼືອ ແລະ ໄດ້ສົ່ງກັບ ສປປ ລາວ ປະມານ 600 ກວ່າຄົນ. ນອກຈາກນັ້ນ, ກົງສູນໃຫຍ່ຂອງ ສປປ ລາວ ທີ່ປະຈຳຢູ່ ສປ ຈີນ ໄດ້ໃຫ້ການຊ່ວຍເຫຼືອປົກປ້ອງສິດ ແລະ ຜົນປະໂຫຍດອັນຊອບທຳຂອງແມ່ຍິງ-ເດັກນ້ອຍ ໄດ້ສົ່ງກັບຄືນ ສປປ ລາວ ຈຳນວນ 150 ກວ່າຄົນ, ຜູ້ຖືກເຄາະຮ້າຍສ່ວນຫຼາຍແມ່ນຖືກຕົວະໄປແຕ່ງງານກັບຄົນຈີນ, ໄປຢ້ຽມຢາມຄອບຄົວຝ່າຍຊາຍກ່ອນແຕ່ງງານ, ໄປທ່ຽວ ແລະ ໄປເຮັດວຽກ.
ພ້ອມນັ້ນ, ຍັງມີແຮງງານລາວໄປເຮັດວຽກຢູ່ປະເທດໄທ ເຊິ່ງມີຄວາມສ່ຽງຕໍ່ບັນຫາການຄ້າມະນຸດ ຈຳນວນ 7.767 ຄົນ, ຍິງ 4.036 ຄົນ, ເສັ້ນທາງໃນການຄ້າມະນຸດແມ່ນຢູ່ຕາມບັນດາແຂວງທີ່ມີຊາຍແດນຕິດຈອດກັບປະເທດໃກ້ຄຽງ ເຊັ່ນ: ສປ ຈີນ, ໄທ. ນອກນັ້ນ, ພຶດຕິກຳທີ່ມີຄວາມສ່ຽງຕໍ່ການຄ້າມະນຸດ ແມ່ນການຄ້າໂສເພນີ ຍັງສືບຕໍ່ເກີດຂຶ້ນຢູ່ຕາມຮ້ານອາຫານ, ຮ້ານບັນເທິງ, ໂຮງແຮມ, ເຮືອນພັກ ເຊິ່ງປັດຈຸບັນແມ່ນໄດ້ແຜ່ລາມໄປຢ່າງກວ້າງຂວາງໃນທົ່ວປະເທດ.
ອີງຕາມຕົວເລກທີ່ສົ່ງກັບຈາກ ສປ ຈີນ ຂອງຜູ້ຖືກເຄາະຮ້າຍຈາກບັນຫາການແຕ່ງດອງແອບແຝງກັບຄົນຈີນຫຼາຍກວ່າໝູ່ຄື ແຂວງຫົວພັນ, ບໍລິຄຳໄຊ ແລະ ນະຄອນຫຼວງວຽງຈັນ, ຄົນລາວໄປເປັນແຮງງານຢູ່ປະເທດໄທທີ່ສົ່ງກັບປະເທດເປັນທາງການຈາກປະເທດໄທ ໃນ 6 ເດືອນ ຕົ້ນປີ 2018 ຫຼາຍກວ່າໝູ່ແມ່ນແຂວງບໍ່ແກ້ວ, ບໍລິຄຳໄຊ ແລະ ຊຽງຂວາງ, ສົ່ງກັບປະເທດທີ່ບໍ່ເປັນທາງການຈາກປະເທດໄທໃນຂອບເຂດທົ່ວປະເທດ ຈຳນວນ 68 ຄົນ, ຍິງ 57 ຄົນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມຄວາມສະຫງົບ
ຮູບພາບຈາກ::thediplomat.com/2014/11/sex-trafficking-and-chinas-one-child-policy/