ລາຍງານສະຫຼຸບຂອງຄະນະກຳມະການກວດສອບຂໍ້ເທັດຈິງຂອງອົງການສະຫະປະຊາຊາດ ເມື່ອເດືອນທີ່ຜ່ານລະບຸວ່າ ກອງທັບມຽນມາໄດ້ສັງຫານປະຊາຊົນຊາວມຸສລິມໂຣຮິນຢາ “ຢ່າງເປັນລະບົບ” ຫຼາຍພັນຄົນ ລວມທັງເຜົາທຳລາຍໝູ່ບ້ານຊາວໂຣຮິນຢາຫຼາຍຮ້ອຍຈຸດ ແລະ ກ່ຽວພັນກັບການລ້າງເຜົ່າພັນ ແລະ ຂົ່ມຂືນແມ່ຍິງຈຳນວນຫຼາຍ ລາຍງານໄດ້ຮຽກຮ້ອງໃຫ້ດຳເນີນຄະດີກັບນາຍທະຫານລະດັບນາຍພົນຫຼາຍຄົນຂອງກອງທັບມຽນມາ ໃນຂໍ້ຫາລ້າງເຜົ່າພັນ.
ສຳນັກຂ່າວເອພີລາຍງານຈາກນະຄອນຢາງກຸ້ງ ປະເທດມຽນມາ ເມື່ອວັນທີ 14 ຕຸລາ 2018 ມີຜູ້ເຂົ້າຮ່ວມເດີນຂະບວນໃນເມືອງຢາງກຸ້ງ ຖືທຸງຊາດ ແລະ ທຸງກອງທັບມຽນມາ ຮວມທັງຮູບ ພົນເອກ ອາວຸໂສ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດ ພ້ອມກັບຮ້ອງດ່າຄວາມກ່ຽວພັນຂອງປະຊາຄົມນານາຊາດໃນມຽນມາ ຂະນະທີ່ແກນນຳການປະທ້ວງປະກາດຈະ “ສູ້ກັບ” ຫຼາຍອົງກອນລະຫວ່າງປະເທດ ທີ່ຮຽກຮ້ອງໃຫ້ມີການສອບສວນ ແລະ ດຳເນີນຄະດີເອົາຜິດກັບນາຍທະຫານລະດັບສູງຫຼາຍຄົນຂອງກອງທັບມຽນມາ.
ພຣະວີຣະທູ ພຣະສົງແກນນຳກຸ່ມຊາດນິຍົມ ແລະ ຂະບວນການຕໍ່ຕ້ານຊາວມຸສລິມໃນມຽນມາ ຂຶ້ນກ່າວຄຳປາໄສເທິງເວທີ ໂດຍໄດ້ຮຽກຮ້ອງຕໍ່ປະຊາຄົມໂລກ ໃຫ້ຢຸດຕິການຫຍຸ້ງກ່ຽວແຊກແຊງກິດຈະການພາຍໃນຂອງມຽນມາ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews