ກົມສ່ວຍສາອາກອນ ກະຊວງການເງິນ ຈັດກອງປະຊຸມເຜີຍແຜ່ ແລະ ຜົນການພັດທະນາລະບົບຄຸ້ມຄອງຂໍ້ມູນລາຍຮັບສ່ວຍສາອາກອນ ຂຶ້ນໃນວັນທີ 11 ຕຸລາ 2018 ເພື່ອສະຫຼຸບຄວາມຄືບໜ້າໃນການຈັດຕັ້ງປະຕິບັດ ໂຄງການພັດທະນາລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ, ປັດຈຸບັນສຳເລັດແລ້ວ 100% ໂດຍຈະເປີດນຳໃຊ້ລະບົບຄຸ້ມຄອງຜູ້ເສຍອາກອນ ເລີ່ມແຕ່ວັນທີ 15 ຕຸລາ 2018 ແລະ ຈະເລີ່ມເປີດນຳໃຊ້ລະບົບຄົບຊຸດ ວັນທີ 5 ພະຈິກ 2018 ເປັນຕົ້ນໄປ.
ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນກະຊວງການເງິນກ່າວວ່າ: ປັດຈຸບັນ, ໂຄງການດັ່ງກ່າວ ສຳເລັດ 100% ໂດຍໃຊ້ເວລາ 21 ເດືອນ ນັບແຕ່ເປີດໂຄງການຕົ້ນປີ 2017 ເປັນຕົ້ນມາ ເຊິ່ງມີການພັດທະນາລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນແບບຄົບຊຸດ ລວມທັງການພັດທະນາຊຸດຄຳສັ່ງການແຈ້ງການມອບລາຍຮັບ, ການກວດສອບຫຼັງການແຈ້ງປະເມີນຄາດຄະເນແຫຼ່ງລາຍຮັບ, ການກຳນົດຕົວເລກປະຈຳຕົວຜູ້ເສຍອາກອນ, ການເຊື່ອມຕໍ່ລະບົບຕ່າງໆ ຂອງກະຊວງການເງິນ ແລະ ຂະແໜງການອື່ນທີ່-ກ່ຽວຂ້ອງ ເພື່ອອຳນວຍຄວາມສະດວກໃນການເສຍອາກອນ ຜ່ານທາງລະບົບເອເລັກໂຕຣນິກ ໂດຍຈະເປີດນຳໃຊ້ເປັນສອງໄລຍະຄື:
- ໄລຍະທີໜຶ່ງເລີ່ມວັນທີ 15 ຕຸລາ 2018 ຈະເປີດນຳໃຊ້ລະບົບຄຸ້ມຄອງຜູ້ເສຍອາກອນ ເພື່ອອອກເລກປະຈຳຕົວຜູ້ເສຍອາກອນພ້ອມກັບໃບທະບຽນວິສາຫະກິດ ໂດຍພາກສ່ວນທະບຽນ ແລະ ຄຸ້ມຄອງວິສາຫະກິດຂອງກະຊວງອຸດສາຫະກຳ ແລະ ການຄ້າ; ເຊິ່ງວິສາຫະກິດໃໝ່ທີ່ຂໍດຳເນີນທຸລະກິດ ຫຼື ຂໍຂຶ້ນທະບຽນວິສາຫະກິດໃໝ່ສາມາດຮັບເລກປະຈຳຕົວຜູ້ເສຍອາກອນ ໃນເວລາທີ່ພາກສ່ວນທະບຽນ ແລະ ຄຸ້ມຄອງວິສາຫະກິດອອກໃບທະບຽນວິສາຫະກິດໃຫ້ ໂດຍທັງສອງພາກສ່ວນຈະມີການເຊື່ອມຕໍ່ຂໍ້ມູນແບບເອເລັກໂຕຣນິກ.
- ໄລຍະທີສອງ: ຈະເປີດນຳໃຊ້ລະບົບຄົບຊຸດ ແຕ່ວັນທີ 5 ພະຈິກ 2018 ເປັນຕົ້ນໄປ ແລະ ເປີດແຈ້ງມອບອາກອນປະເພດຕ່າງໆໃນລະບົບໃໝ່ຕາມຮູບແບບການແຈ້ງໃໝ່ ຜູ້ເສຍອາກອນສາມາດແຈ້ງມອບອາກອນດ້ວຍຕົນເອງຜ່ານເວັບໄຊ (taxservice.mof.gov.la).
ໂຄງການດັ່ງກ່າວ ແມ່ນໃຊ້ທຶນຈາກເງິນກູ້ຜ່ອນຜັນຂອງ Economic Devel-opment and Cooperation Funds (EDCF) ຂອງລັດຖະບານ ສ ເກົາຫຼີ, ມູນຄ່າເງິນກູ້ 28,5 ລ້ານໂດລາ ແລະ ທຶນສົມທົບຂອງລັດຖະບານລາວ 4 ລ້ານໂດລາ, ລວມມູນຄ່າທັງໝົດຂອງໂຄງການ 32,5 ລ້ານໂດລາ ຫຼື ປະມານ 276,25 ຕື້ກີບ ແລະ ໄລຍະການພັດທະນາຂອງໂຄງການແມ່ນ 2 ປີ.
ນອກຈາກນັ້ນ, ທ່ານ ພູທະນູເພັດ ໄດ້ກ່າວຕື່ມອີກວ່າ: ” ໂຄງການພັດທະນາລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ (TaxRIS) ເປັນໂຄງການໜຶ່ງທີ່ນອນໃນແຜນຍຸດທະສາດຂອງຂະແໜງການເງິນ ກ່ຽວກັບການຫັນວຽກງານການຄຸ້ມຄອງການເກັບລາຍຮັບສ່ວຍສາອາກອນໄປສູ່ລະບົບທັນສະໄໝ ທີ່ມີລັກສະນະວິທະຍາສາດ ເພື່ອແນ່ໃສ່ປັບປຸງກົນໄກການເກັບລາຍຮັບໃຫ້ມີປະສິດທິພາບ, ມີຄວາມໂປ່ງໃສ່, ທັນເວລາ, ສອດຄ່ອງກັບລະບຽບກົດໝາຍ ສິ່ງສຳຄັນເພີ່ມຄວາມງ່າຍດາຍ ແລະ ເອື້ອຍອຳນວຍຄວາມສະດວກໃຫ້ແກ້ຜູ້ປະຕິບັດພັນທະກອນ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮູບພາບຈາກ: www.mfc-nso.ru