ເຈົ້າໜ້າທີ່ກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ຈັບ 3 ສ່ຽວ ຮ່ວມກັັນສໍ້ໂກງຊັບຂອງພົນລະເມືອງໂດຍອ້າງວ່າ: “ສາມາດແລ່ນເອົາຄົນເຂົ້າເປັນຕຳຫຼວດ ແລະ ເຂົ້າເຮັດວຽກນຳອົງການຈັດຕັ້ງຂອງລັດ” ໃນວັນທີ 19 ກັນຍາ 2018, ເຈົ້າໜ້າທີ່ສາມາດຮວບຮວມຜູ້ເສຍຫາຍໃນເບື້ອງຕົ້ນມີຈຳນວນ 99 ຄົນ ຕົກເປັນມູນຄ່າ 2.887.750.000 ກີບ ແລະ ຍັງຈະສອບສວນຂະຫຍາຍເພີ່ມຕື່ມເພາະເຊື່ອວ່າ: “ຍັງມີຜູ້ເສຍຫາຍອື່ນທີ່ບໍ່ກ້າຮ້ອງຟ້ອງ ພວກກ່ຽວທັງ 3 ນີ້, ຖ້າວ່າປະຊາຊົນຜູ້ໃດຫາກຖືກ 3 ຄົນນີ້ສໍ້ໂກງດ້ວຍຮູບແບບດັ່ງກ່າວ ໃຫ້ແຈ້ງຕໍ່ພາກສ່ວນທີ່ກ່ຽວຂ້ອງ”.
ເຈົ້າໜ້າທີ່ ປກສ ເມືອງໄຊເສດຖາ ນະຄອນຫຼວງວຽງຈັນໃຫ້ຮູ້ວ່າ: “ພາຍຫຼັງ, ຜູ້ເສຍຫາຍເຂົ້າແຈ້ງຄວາມວ່າມີພະນັກງານເຄື່ອນໄຫວຕົວະຍົວະວ່າ ອ້າງວ່າ: “ສາມາດແລ່ນເອົາຄົນເຂົ້າເປັນກຳລັງຕຳຫຼວດ ແລະ ເຂົ້າເຮັດວຽກນຳອົງການຈັດຕັ້ງຢູ່ກະຊວງຍຸດຕິທຳ”. ເມື່ອຮູ້ແນວນັ້ນ, ຈຶ່ງໄດ້ແຕ່ງຕັ້ງໝ່ວຍສະເພາະກິດລົງຕິດຕາມ ຈົນສາມາດກັກຕົວຜູ້ກະທຳຜິດໄດ້ 3 ຄົນ ຊື່ ທ້າວ ທອງໄຊ ອາຍຸ 32 ປີ ຢູ່ບ້ານວັດນາກ ເມືອງສີສັດຕະນາກ, ທ້າວ ພູເວດ ອາຍຸ 30 ປິ ຢູ່ບ້ານຫົວຫ້າ ເມືອງຫາດຊາຍຟອງ ແລະ ທ້າວ ພຸທອນ ອາຍຸ 38 ປີ ບ້ານເມືອງນ້ອຍ ເມືອໄຊເສດຖາ ນະຄອນຫຼວງວຽງຈັນ”.
ຜ່ານການສອບສວນພວກກ່ຽວຮັບສະລະພາບວ່າ: ໄດ້ຮ່ວມກັນຕົວະເອົາລູກຫຼານປະຊາຊົນເຂົ້າເປັນພະນັກງານແທ້, ໃນເບື້ອງຕົ້ນ ທ້າວ ພູເວດ ໄດ້ຊັກຊວນໃຫ້ ທ້າວ ພູທອນ ທີ່ເປັນພະນັກງານລັດຖະກອນພາກັນຊອກເອົາຄົນເຂົ້າກຳລັງຕຳຫຼວດ ອ້າງວ່າໄດ້ຮູ້ຈັກກັບຜູ້ໃຫຍ່ທີ່ສາມາດແລ່ນເອົາຄົນເຂົ້າເຮັດວຽກໄດ້, ແຕ່ຕ້ອງຈ່າຍຄ່າມັດຈຳ ມູນຄ່າ 60.000 ບາດ. ຈາກນັ້ນ, ພວກກ່ຽວສືບຕໍ່ຕົວະຍົວະຫຼາຍຄົນ ແລ້ວເອົາເງິນມາປັນກັນ ວິທີການຂອງພວກກ່ຽວແມ່ນແອບອ້າງວ່າ: “ມີພີ່ນ້ອງຢູ່ກະຊວງແຫ່ງໜຶ່ງສາມາດແລ່ນເອົາຄົນເຮັດວຽກໄດ້ ເພາະມີພີ່ນ້ອງເປັນເລຂາລະດັບລັດຖະມົນຕີ ແລະ ທັງເປັນຜູ້ເອົາລາຍຊື່ເຂົ້າເຮັດວຽກ”.
ພ້ອມນັ້ນ, ຍັງໄດ້ຮ່ວມກັບ ທ້າວ ທອງໄຊ ຊອກເອົາລູກຫຼານປະຊາຊົນຈາກຕ່າງແຂວງຈຳນວນຫຼາຍ ໂດຍໄດ້ຮຽກເອົາຄ່າມັດຈຳ 60.000-100.000 ບາດຕໍ່ຄົນ ລວມຜູ້ເສຍຫາຍທັງໝົດ 99 ຄົນ, ພ້ອທັງສ້າງບົດບັນທຶກກັບຜູ້ເສຍຫາຍ ເພື່ອເປັນຫຼັກຖານໃຫ້ຜູ້ເສຍຫາຍຍອມຈ່າຍເງິນ, ເວລາຜ່ານໄປ ຜູ້ເສຍຫາຍຮູ້ວ່າພວກກ່ຽວບໍ່ສາມາດແລ່ນເອົາເຂົ້າເປັນກຳລັງຕຳຫຼວດ ແລະ ເຂົ້າເປັນລັດຖະກອນໄດ້ ຈຶ່ງໄດ້ຮ້ອງຟ້ອງດຳເນີນຄະດີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ, ຮູບພາບ: ໜັງສືພິມຄວາມສະຫງົບ
ຮູບພາບຈາກ: ursulasweeklywanders.com