ໃນວັນທີ 11 ຕຸລາ 2018 ທີ່ ນະຄອນຫຼວງວຽງຈັນ ໄດ້ຈັດພິທີກອງປະຊຸມລິເລີ່ມໂຄງການຜະລິດກະສິກຳເປັນສິນຄ້າຢູ່ ສປປ ລາວ, ກ່ຽວກັບການປັບປຸງຕ່ອງໂສ້ການຜະລິດກະສິກຳເປັນສິນຄ້າ ຕາມມາດຕະຖານກະສິກຳສະອາດ ລວມມີ 5 ແຂວງເປົ້າໝາຍຄື ນະຄອນຫຼວງວຽງຈັນ, ໄຊຍະບູລີ, ວຽງຈັນ, ບໍລິຄຳໄຊ ແລະ ຄຳມ່ວນ ໂດຍຈະເລີ່ມປະຕິບັດໃນທ້າຍປີ 2018-2024 ດ້ວຍມູນຄ່າ 29,3 ລ້ານໂດລາສະຫະລັດ ຫຼື ປະມານ 249,85 ຕື້ກີບ.
ທ່ານ ແກ້ວພິລາວັນ ອາໄພລາດ, ຮອງເຈົ້າຄອງນະຄອນຫຼວງວຽງຈັນ ກ່າວວ່າ: ” ໂຄງການຜະລິດກະສິກຳເປັນສິນຄ້າຢູ່ ສປປ ລາວ ເປັນອີກໜຶ່ງໂຄງການໃນແຜນການຮ່ວມມືລະຫວ່າງລັດຖະບານ ແລະ ທະນາຄານໂລກ. ປັດຈຸບັນ, ໄດ້ເລັ່ງປັບປຸງຕ່ອງໂສ້ການຜະລິດກະສິກຳເປັນສິນຄ້າ ໃຫ້ໄດ້ຕາມາດຕະຖານກະສິກຳສະອາດເປັນຕົ້ນ ການຜະລິດເຂົ້າ, ພືດຜັກ-ສາລີ ແລະ ອື່ນໆ ນັບແຕ່ການປູກຈົນຮອດການຈຳໜ່າຍ. ໂຄງການດັ່ງກ່າວ, ຈະຈັດຕັ້ງປະຕິບັດຮ່ວມກັບຂະແໜງການກະສິກຳ ແລະ ປ່າໄມ້, ຂະແໜງອຸດສາຫະກຳ ແລະ ການຄ້າ ໂດຍລວມມີ 5 ແຂວງເປົ້າໝາຍຄື ນະຄອນຫຼວງວຽງຈັນ, ໄຊຍະບູລີ, ວຽງຈັນ, ບໍລິຄຳໄຊ ແລະ ຄຳມ່ວນ. ຈະເລີ່ມຂຶ້ນໃນທ້າຍປີ 2018-2024 ດ້ວຍມູນຄ່າ 29,3 ລ້ານໂດລາສະຫະລັດ ໃນນີ້ ງົບປະມານຈາກທະນາຄານໂລກ 25 ລ້ານໂດລາສະຫະລັດ; ທຶນສົມທົບຂອງລັດຖະບານລາວ 5 ແສນໂດລາສະຫະລັດ ແລະ ທຶນສົມທົບຂອງຜູ້ປະກອບການກຸ່ມຜະລິດ 3,8ລ້ານໂດລາສະຫະລັດ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່