ເນື່ອງຈາກບັນຫາທີ່ແກ້ໄຂບໍ່ຕົກໃນກໍລະນີ້ ຄົນເຈັບນິຍົມກັນໄປຮັກສາປິ່ນປົວສຸຂະພາບຢູ່ໂຮງໝໍຕ່າງປະເທດ. ກະຊວງສາທາລະນະສຸກ ຈຶ່ງໄດ້ຮີບເລັ່ງແກ້ໄຂ້ດ້ວຍການປັບປຸງພັດທະນາບຸກຄະລາກອນ, ປັບປຸງຂອດບໍລິການຮັກສາ-ປິ່ນປົວສຸຂະພາບ ແລະ ອຳນວຍຄວາມສະດວກດ້ານສະຖານທີ່ ໃຫ້ມີຄຸນນະພາບເທົ່າກັບສາກົນ ເພື່ອດຶງດູດຄົນເຈັບເຂົ້າມາຮັກສາ ແລະ ປິ່ນປົວສຸຂະພາບຢູ່ໂຮງໝໍພາຍໃນປະເທດ.

          ທ່ານ ຮອງ ສຈ.ດຮ. ບຸນກອງ ສິຫາວົງ ລັດຖະມົນຕີກະຊວງສາທາລະນະສຸກ ໄດ້ໃຫ້ການສຳພາດ ໃນຂະນະເຂົ້າຮ່ວມກອງປະຊຸມລັດຖະບານ ເປີດກວ້າງຄັ້ງທີ 2 ວ່າ: “ຕໍ່ກັບບັນຫາຄົນເຈັບໄດ້ຫຼັ່ງໄຫຼອອກໄປຮັກສາສຸຂະພາບ-ປິ່ນປົວພະຍາດ ຢູ່ຕ່າງປະເທດນັ້ນ ເປັນອີກໜຶ່ງບັນຫາທີ່ ກະຊວງສາທາລະນະສຸກ ໄດ້ໃຫ້ຄວາມສຳຄັນໃນການແກ້ໄຂ ເຊິ່ງທາງ ກະຊວງ ໄດ້ເລັ່ງປັບປຸງສຸ່ມໃສ່ຂອດການບໍລິການໃຫ້ມີຄຸນນະພາບຮອບດ້ານ. ເປັນຕົ້ນແມ່ນປັບປຸງສະຖານທີ່ບໍລິການໃຫ້ມີຄວາມສະອາດ, ສ້າງບຸກຄະລາກອນ, ອຸປະກອນການແພດ ແລະ ລະບົບເຮັດວຽກຂອງພະນັກງານໃຫ້ມີຄຸນນະພາບດີຂຶ້ນ ພ້ອມທັງສືບຕໍ່ປັບປຸງໂຮງໝໍຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດໃຫ້ມີຄຸນນະພາບ, ທັນສະໄໝເທົ່າກັບສາກົນ (ປັດຈຸບັນຈີນກໍໄດ້ໃຫ້ການຊ່ວຍສ້າງໂຮງໝໍມະໂຫສົດໃຫ້ທັນສະໄໝ). ນອກຈາກນັ້ນ, ກໍໄດ້ລົງທຶນກໍ່ສ້າງພະນັກງານໃຫ້ເປັນພະນັກງານຊ່ຽວຊານລົງເລີກແຕ່ລະຂະແໜງການຫຼາຍຂຶ້ນ ເພື່ອຮອງຮັບການບໍລິການປິ່ນປົວຄົນເຈັບ ໂດຍອີງໃສ່ນະໂຍບາຍ 5 ດີ 1 ພໍໃຈ ຄື: ຮ້ບຕ້ອນດີ, ສະອາດດີ, ສະດວກດີ, ບົ່ງມະຕິຊັດເຈນດີ ແລະ ປິ່ນປົວດີ”.

          ທ່ານໄດ້ກ່າວອີກຕື່ມວ່າ: “ອີກດ້ານໜຶ່ງຕ້ອງໄດ້ເສີມຂະຫຍາຍຄັງປະກັນສຸຂະພາບໃຫ້ດີຂຶ້ນ ເຜີຍແຜ່ຂໍ້ມູນໃຫ້ປະຊາຊົນເຂົ້າໃຈແລ້ວຫັນມາໃຊ້ບໍລິການ ກໍຄືເຂົ້າເປັນສະມາຊິກປະກັນສັງຄົມໃຫ້ຫຼາຍຂຶ້ນ ເພື່ອດິງດູດໃຫ້ປະຊາຊົນໄດ້ເຂົ້າໃຈເຖິງການບໍລຸງຮັກສາ ແລະ ປິ່ນປົວສຸຂະພາບ ພ້ອມທັງປັບປຸງຄືນນະໂຍບາຍຕໍ່ພະນັກງານ ແລະ ຫຼຸດການເຮັດວຽກລົງຈາກ 12 ຊົ່ວໂມງ ມາເປັນ 8 ຊົ່ວໂມງ ເພື່ອເຮັດໃຫ້ພະນັກງານມີຄວາມຮັບຜິດຊອບຕໍ່ກັບຄົນເຈັບຫຼາຍຂຶ້ນ”.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່

ຮູບພາບຈາກ: https://luxdev.lu/fr