ເຈົ້າໜ້າທີ່ປ້ອງກັນຄວາມສະຫງົບ (ປກສ) ເມືອງສີໂຄດຕະບອງ ນະຄອນຫຼວງວຽງຈັນ ເຂົ້າຈັບຕົວ ທ້າວ ນາສອນ ຫຼື ດ້າ ອາຍຸ 40 ປີ, ອາຊີບຄ້າຂາຍ ໃນວັນທີ 21 ກັນຍາ 2018 ຢູ່ບ້ານ ປາກທ້າງ, ເມືອງ ສີໂຄດຕະບອງ, ນະຄອນຫຼວງວຽງຈັນ ໃນຂໍ້ຫາລັກລອບຄ້າຂາຍຢາເສບຕິດ ໂດຍເປີດຮ້ານເຂົ້າປຽກເພື່ອເຊື່ອງຊ້ອນທຸລະກິດເບື້ອງຫຼັງ, ພົບຂອງກາງຢາບ້າ ຈຳນວນ 298 ເມັດ, ຜູ້ກ່ຽວສາລະພາບຍ້ອນຫາເງິນໃຊ້ໜີ້ຫວຍ ແລະ ເງິນມື້ ລວມມູນຄ່າໜີ້ 100 ກວ່າລ້ານກີບ.
ຜູ້ກ່ຽວໄດ້ສາລະພາບຕໍ່ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫຼວງວຽງຈັນ ວ່າ: “ແຮງຈູງໃຈທີ່ເຮັດໃຫ້ລັກລອບຄ້າຢາເສບຕິດ ເກີດມາຈາກການເຂົ້າຫວຍ ປະມານ 80 ລ້ານກີບ ແລະ ເອົາເງິນມື້ 50 ລ້ານກີບ ລວມມູນຄ່າ 130 ລ້ານກີບ ມາລົງທຶນເຮັດຮ້ານເຂົ້າປຽກ. ເບື້ອງຕົ້ນຮ້ານຜູ້ກ່ຽວໄດ້ຮັບຄວາມນິຍົມຈາກລູກຄ້າ ແລະ ມີລາຍໄດ້ດີຂຶ້ນ ແຕ່ເວລາຕໍ່ມາຜູ້ກ່ຽວບໍ່ສາມາດໃຊ້ຕົ້ນທຶນ ແລະ ດອກເບ້ຍເງິນຫວຍ ແລະ ເງິນທີ່ຢືມມາໄດ້ ຍ້ອນຕິດຫຼີ້ນກິນຟູມເຟື້ອຍ ເກີດມີໜີ້ສິນຕິດຕົວ. ຫຼັງຈາກຊີວິດປະເຊີນກັບໜີ້ສິນຈຶ່ງຊອກຫາທາງອອກ ຫັນມາລັກລອບຄ້າຂາຍຢາບ້າ ຮ່ວມກັບຊາຍຄົນໜຶ່ງທີ່ເປັນລູກຄ້າມາກິນເຂົ້າປຽກໃນຮ້ານ ໂດຍໃຊ້ຮ້ານຂາຍເຂົ້າປຽກເປັນບ່ອນຊື້-ຂາຍ”.
ຜູ້ກ່ຽວສາລະພາບອີກຕື່ມວ່າ: “ມື້ທຳອິດໄດ້ນຳເອົາຢາບ້າມາຂາຍ 200 ເມັດ ໃຊ້ເວລາຂາຍປະມານ 2-3 ມື້ກໍໝົດ. ຈາກນັ້ນ ຈຶ່ງໄດ້ຕິດຕໍ່ຊື້-ຂາຍກັບຊາຍຄົນດັ່ງກ່າວຈຳນວນຫຼາຍຄັ້ງຈົນບໍ່ສາມາດຈື່ໄດ້. ເງິນທີ່ຂາຍໄດ້ຈາກການຄ້າຂາຍຢາບ້າ ໄດ້ນຳເອົາໄປໃຊ້ຈ່າຍສ່ວນຕົວ ແລະ ໃຊ້ໜີ້ທີ່ຕິດຢູ່. ລ່າສຸດໄດ້ຊື້ຢາບ້າຈຳນວນ 300 ເມັດ ແຕ່ຈ່າຍຄ່າຢາບ້າພຽງເຄິ່ງໜຶ່ງ, ຫຼັງຈາກນັ້ນກໍນຳຢາບ້າໄປຂາຍໃຫ້ກັບໄວລຸ້ນ ຈຳນວນ 2 ເມັດ, ຍັງເຫຼືອ 298 ເມັດ. ສຸດທ້າຍຖືກເຈົ້າໜ້າທີ່ສືບຮູ້ ແລະ ເຂົ້າກັກຕົວນຳມາດຳເນີນຄະດີໃນວັນທີ 21 ກັນຍາ 2018 ພ້ອມຂອງກາງຢາບ້າ 298 ເມັດ”. ສຳລັບຜູ້ຮ່ວມຂະບວນການ ເຈົ້າໜ້າທີ່ຍັງສອບສວນຂະຫຍາຍຜົນ ແລະ ຕິດຕາມຈັບມາດຳເນີນຄະດີ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບປະກອບຈາກ:TripAdvisor, kts-studio-media