ໜັງສືພິມເສດຖະກິດ-ການຄ້າ ລາຍງານເມື່ອວັນທີ 1 ຕຸລາ 2018 ວ່າ ອີງຕາມຂໍ້ມູນຈາກນັກວິຊາການ ພ້ອມດ້ວຍຊ່ຽວຊານຈາກອາຊຽນ ແລະ ສປ ຈີນ ໄດ້ເປີດເຜີຍວ່າ ການຄຸ້ມຄອງການບໍລິການດ້ານຂົນສົ່ງໂດຍສານຂອງໂຄງການລົດໄຟລາວ-ຈີນ ເຊິ່ງກຳນົດໃຫ້ມີທັງໝົດ 33 ສະຖານີ, ໃນນັ້ນ ຈະເປີດການນຳໃຊ້ໃນໄລຍະເບື້ອງຕົ້ນ 21 ສະຖານີ ສາມາດກຳນົດໄດ້ 23 ຖ້ຽວຕໍ່ວັນ ແຕ່ຖ້າຫາກມີການເປີດນຳໃຊ້ທັງໝົດ 33 ສະຖານີ ແມ່ນສາມາດເພີ່ມເປັນ 39 ຖ້ຽວຕໍ່ວັນ. ສ່ວນອັດຕາຄ່າໂດຍສານແຕ່ນະຄອນຫຼວງວຽງຈັນ-ບໍ່ເຕັນ ສະເລ່ຍປະມານ 140.000ກີບຕໍ່ຄົນ ແລະ ຄ່າຂົນສົ່ງສິນຄ້າ 6.000 ກີບຕໍ່ໂຕນເທົ່ານັ້ນ. ໃນຈຳນວນ 33 ສະຖານີ ຈະມີສະຖານີໂດຍສານ ແລະ ສະຖານີຂົນສົ່ງສິນຄ້າ ລວມຢູ່ນຳກັນ 11 ແຫ່ງ, ໃນນັ້ນສະຖານີສິນຄ້າສະເພາະ 01 ແຫ່ງ ຢູ່ນະຄອນຫຼວງວຽງຈັນ, ມີຈຸດສະຫຼັບລາງ ແລະ ຈຸດຫຼີກທັງໝົດ 284 ແຫ່ງ.
ສະເພາະການບໍລິການຂົນສົ່ງໂດຍສານສ່ວນໃຫຍ່ ຈະເປັນເວລາກາງເວັນ, ສ່ວນການຂົນສົ່ງສິນຄ້າແມ່ນເປັນກາງຄືນ. ຂະນະທີ່ຄວາມໄວອອກແບບສະເພາະລົດໄຟໂດຍສານ 160 ກິໂລແມັດຕໍ່ຊົ່ວໂມງ ແລະ ສຳຮອງໄວ້ 200 ກິໂລແມັດຕໍ່ຊົ່ວໂມງ, ສ່ວນຄວາມໄວລົດໄຟຂົນສົ່ງສິນຄ້າ 120 ກິໂລແມັດຕໍ່ຊົ່ວໂມງ ແລະ ໃຊ້ໄຟຟ້າເປັນພະລັງງານແລ່ນລົດໄຟ, ໂຄງການດັ່ງກ່າວລວມມີມູນຄ່າການກໍ່ສ້າງທັງໝົດ 5,8 ຕື້ໂດລາ, ຕາມແຜນຈະສ້າງໃຫ້ສຳເລັດສົມບູນພາຍໃນປີ 2022.
ຮຽບຮຽງໂດຍ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: laoedaily.com.la