ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນທີ 1 ຕຸລາ 2018 ວ່າ ປະທານາທິບໍດີ ໂຈໂຄ ວິໂດໂດ ອະນຸມັດຄຳສັ່ງໃຫ້ເປີດຮັບຄວາມຊ່ວຍເຫຼືອຈາກນານາຊາດ ໃນການຊ່ວຍເຫຼືອປະຊາຊົນທີ່ເກາະສຸລາເວຊີ ຕັ້ງຢູ່ທາງຕອນກາງຂອງປະເທດອິນໂດເນເຊຍ ເຊິ່ງກຳລັງເດືອດຮ້ອນຢ່າງໜັກຫຼັງເກີດແຜ່ນດິນໄຫວຮຸນແຮງ 7.5 ແມັກນິຈູດ ແລະ ຕາມມາດ້ວຍສຶນາມິ ເມື່ອວັນສຸກທີ່ຜ່ານມາ.
ຂະນະທີ່ທ່ານ ຊູໂຕໂປ ປູຣໂວ ນູໂກຣໂຮ ໂຄສົກສຳນັກງານບໍລິຫານຈັດການໄພພິບັດແຫ່ງຊາດ (ບີເອັນພີບີ) ຍອມຮັບວ່າ ນອກເໜືອຈາກສິ່ງຂອງເພື່ອການບໍລິໂພກ ແລະ ອຸປະໂພກທີ່ຈຳເປັນແລ້ວ ສິ່ງທີ່ຂາດບໍ່ໄດ້ໃນຕອນນີ້ຄືເຄື່ອງມື ແລະ ອຸປະກອນສຳລັບຂຸດເຈາະ ໂດຍທຸກຝ່າຍເຊື່ອວ່າຜູ້ສູນຫາຍຈຳນວນຫຼາຍຍັງຄົງຕິດຢູ່ພາຍໃຕ້ຊາກຫັກພັງຂອງອາຄານ ແຕ່ຂະບວນການຊ່ວຍເຫຼືອເປັນໄປໄດ້ຢ່າງລຳບາກ ດ້ວຍຂໍ້ຈຳກັດດ້ານເຄື່ອງມື ແລະ ອຸປະກອນ.
ສຳລັບຈຳນວນຜູ້ເສຍຊີວິດຈາກເຫດການໄພພິບັດໃນຄັ້ງນີ້ມີ 832 ຄົນ ແຕ່ມີຄວາມເປັນໄປໄດ້ສູງທີ່ຈະເພີ່ມຈຳນວນຂຶ້ນອີກ “ອາດເຖິງຫຼັກພັນ” ເຊິ່ງເຈົ້າໜ້າທີ່ບາງສ່ວນເລີ່ມກຽມການປັບພື້ນທີ່ບາງແຫ່ງເຖິງເກາະສຸລາເວສີໃຫ້ເປັນສຸສານຂະໜາດໃຫຍ່ ເພື່ອເອົາໄວ້ຝັງຮ່າງຜູ້ເສຍຊີວິດເຊິ່ງມີການຄົ້ນພົບຢ່າງຕໍ່ເນື່ອງ.
ຮຽງຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ ແລະ ຮູບປະກອບ: dailynews