ເມື່ອວັນທີ 27 ກັນຍາ 2018 ສຳນັກຂ່າວເອພີລາຍງານວ່າ ມີປະຊາຊົນຊາວຫວຽດນາມອອກມາຮວມຕົວກັນເຕັມສອງຝາກທາງໃນນະຄອນຫຼວງຮ່າໂນ້ຍ ເພື່ອສະແດງຄວາມເຄົາລົບ ແລະ ໄວ້ອາໄລເທື່ອສຸດທ້າຍຕໍ່ທ່ານ ເຈິ່ນ ດ໋າຍ ກວາງ ປະທານປະເທດຫວຽດນາມຜູ້ລ່ວງລັບ, ຂະນະທີ່ຂະບວນປືນໃຫຍ່ນຳໂລງ ເຊິ່ງບັນຈຸສົບຂອງປະທານປະເທດ ເຈິ່ນ ດ໋າຍ ກວາງ ທີ່ຄຸມດ້ວຍທຸງຊາດຫວຽດນາມ ແຫ່ໄປຕາມຖະໜົນໃນນະຄອນຫຼວງຮ່າໂນ້ຍຢ່າງສົມກຽດ.
ທ່ານ ຫງຽນ ຟູ້ ຈ່ອງ ເລຂາທິການພັກຄອມມູນິດຫວຽດນາມໄດ້ກ່າວຄຳຍົກຍ້ອງຜູ້ນຳຫວຽດນາມຜູ້ລ່ວງລັບວ່າ ການຈາກໄປຂອງປະທານປະເທດ ເຈິ່ນ ດ໋າຍ ກວາງ ຖືເປັນຄວາມສູນເສຍຄັ້ງຍິ່ງໃຫຍ່ຂອງປະເທດຊາດ ພ້ອມກັບຊື່ນຊົມຜົນງານຂອງທ່ານ ເຈິ່ນ ດ໋າຍ ກວາງ ທີ່ເຮັດເພື່ອປະເທດຊາດມາຕະລອດໄລຍະການເຮັດວຽກຂອງທ່ານ.
ຫຼັງຈາກສຳເລັດລັດພິທີສົບ ຮ່າງຂອງປະທານປະເທດ ເຈິ່ນ ດ໋າຍ ກວາງ ຈະຖືກນຳໄປຝັງທີ່ບ້ານເກີດທີ່ບ້ານໃນແຂວງ ນິນບິນ ເຊິ່ງຕັ້ງຢູ່ທາງພາກເໜືອຂອງຫວຽດນາມ ໃນຕອນແລງຂອງວັນດຽວກັນ ຕາມເຈດຕະນາຂອງຄອບຄົວທ່ານ ເຈິ່ນ ດ໋າຍ ກວາງ ແທນທີ່ຈະນຳສົບໄປຝັງທີ່ສຸສານວິລະຊົນແຫ່ງຊາດ ໝາຍຫຍິກ ໃນນະຄອນຫຼວງຮ່າໂນ້ຍ ເຊິ່ງເປັນສະຖານທີ່ຝັງສົບຂອງເຈົ້າໜ້າທີ່ລະດັບສູງຂອງລັດຖະບານຫວຽດນາມ.
ໃນວັນດຽວກັນ, ທ່ານນາຍົກລັດຖະມົນຕີ ຫງວຽນ ຊວນ ຟຸກ ຂຶ້ນເວທີກ່າວຄຳຖະແຫຼງໃນທີ່ປະຊຸມສະມັດຊາໃຫຍ່ແຫ່ງສະຫະປະຊາຊາດ (United Nations General Assembly: UNGA) ທີ່ນະຄອນນິວຢອກ ແລະ ຂອບໃຈທີ່ປະຊຸມທີ່ຢືນໄວ້ອາໄລໃຫ້ແກ່ອະດີດປະທານປະເທດຫວຽດນາມຜູ້ລ່ວງລັບເປັນເວລາ 1 ນາທີ, ມີການຫຼຸດທຸງສັນຍາລັກຢູເອັນລົງ ເພື່ອຮ່ວມລຳລຶກ ແລະ ເປັນກຽດໃຫ້ກັບປະທານປະເທດຂອງປະເທດຫວຽດນາມທີ່ເສຍຊີວິດ.
https://www.facebook.com/VNAEnglish/videos/2209996285956357/
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ ແລະ ຮູບປະກອບຂ່າວ: matichon.co.th, dailynews.co.th
ວິດີໂອຂ່າວ: Vietnam News Agency