ລັດຖະບານແຫ່ງ ສປປ ລາວ ຈັດພິທີເຊັນສັນຍາກູ້ຢືມເງິນ ສຳລັບໂຄງການກໍ່ສ້າງທາງຫຼວງແຫ່ງຊາດເລກທີ 11 (R11) ຮ່ວມກັບ ອົງການຮ່ວມມືພັດທະນາເສດຖະກິດກັບປະເທດເພື່ອນບ້ານ (Neighbouring Countries Economic Development Cooperation Agency: NEDA) ແຫ່ງຣາຊະອານາຈັກໄທ ຂຶ້ນໃນວັນທີ 26 ກັນຍາ 2018 ທີ່ນະຄອນຫຼວງວຽງຈັນ. ໂຄງການການກໍ່ສ້າງດັ່ງກ່າວ ໄດ້ເລີ່ມແຕ່ບ້ານກົກເຄົ້າດໍ-ບ້ານໂນນສະຫວັນ-ເມືອງຊະນະຄາມ-ບ້ານວັງ-ບ້ານນໍ້າສັງ ໄລຍະທາງທັງໝົດ 124 ກິໂລແມັດ, ລວມມູນຄ່າການກໍ່ສ້າງທັງໝົດ 1,82 ຕື້ບາດ ຫຼື ປະມານ 455 ຕື້ກີບ.
ການກູ້ຢືມເງິນຂອງໂຄງການດັ່ງກ່າວ ແມ່ນເພື່ອແນໃສ່ການອຳນວຍຄວາມສະດວກໃນການເດີນທາງໄປ-ມາ ຈາກແຂວງໄຊຍະບູລີ ກັບບັນດາແຂວງພາກເໜືອຂອງໄທ ພ້ອມທັງເປັນການຍົກລະດັບເຊື່ອມຈອດເສັ້ນທາງ ແລະ ການຂົນສົ່ງສິນຄ້າຂອງປະຊາຊົນໃນຂົງເຂດດັ່ງກ່າວໃຫ້ນັບມື້ນັບດີຂຶ້ນ. ພ້ອມນັ້ນ ຍັງເປັນການພັດທະນາເສດຖະກິດ-ສັງຄົມ ແລະ ຫຼຸດຜ່ອນຄວາມທຸກຍາກ ໂດຍສະເພາະການພັດທະນາເສັ້ນທາງພາຍໃນະເທດ. ນອກຈາກນັ້ນ, ບັນດາເສັ້ນທາງຕາມແຜນຍຸດທະຍາສາດ ດ້ານການຄົມມະນາຄົມຂົນສົ່ງທີ່ຕິດພັນກັບຍຸດທະສາດການເຊື່ອມຈອດລະຫວ່າງລາວ-ໄທ ຍັງເປັນການສືບຕໍ່ໂຄງການກໍ່ສ້າງເສັ້ນທາງແຕ່ບ້ານຕາດທອງຫາເມືອງສັງທອງ ນະຄອງຫຼວງວຽງຈັນທີ່ໄດ້ຮັບທຶນຈາກ NEDA ໃນປີ 2010 ອີກດ້ວຍ.
ໃນພິທີເຊັນສັນຍາດັ່ງກ່າວ ຕາງໜ້າລັດຖະບານແຫ່ງ ສ ປປ ລາວ ແມ່ນທ່ານນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ກັບ ທ່ານ ພິຣະເມດ ວຸດທິກອນເນຕິຣັກ ປະທານອົງການ NEDA ແຫ່ງຣາຊະອານາຈັກໄທ, ໂດຍການເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ກຽດຕິຄຸນ ຊາດປຣະເສີດ ເອກອັກຄະລາຊະທູດ ແຫ່ງຣາຊະອານາຈັກໄທປະຈຳ ສປປ ລາວ, ມີຫົວໜ້າ-ຮອງກົມ ພ້ອມດ້ວຍບັນດາຜູ້ຕາງໜ້າຈາກຂະແໜງການທີ່ກ່ຽວຂ້ອງເຂົ້າຮ່ວມ.
ປັດຈຸບັນ ສປປ ລາວ ໄດ້ຮັບການຊ່ວຍເຫຼືອຈາກອົງການ NEDA ມີຈຳນວນ 18 ໂຄງການ ລວມມູນຄ່າ 10.36 ຕື້ບາດ ເຊິ່ງມີທັງຮູບແບບການຊ່ວຍເຫຼືອດ້ານວິຊາການ ແລະ ໃຫ້ເງິນກູ້ຢືມດອກເບ້ຍຜ່ອນຜັນ ເພື່ອເປັນການຈັດຕັ້ງປະຕິບັດໂຄງການພັດທະນາເສດຖະກິດ-ສັງຄົມ ທີ່ຕິດພັນກັບຍຸດທະສາດການເຊື່ອມຈອດລະຫວ່າງລາວ-ໄທ ໂດຍສະເພາະໂຄງການພັດທະນາໂຄງລ່າງພື້ນຖານ ແລະ ຍັງມີແຜນສືບຕໍ່ຮ່ວມມືໃນຕໍ່ໜ້າຮອດປີ 2022.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂ່າວຈາກ: ເສດຖະກິດ-ການຄ້າ
ຮູບພາບຈາກ: ຂ່າວສານປະເທດລາວ, gambetanews.com