ແຂວງໄຊຍະບູລີວາງຄາດໝາຍສູ້ຊົນລຶບລ້າງຄວາມທຸກຍາກຂອງປະຊາຊົນ ໃຫ້ຍັງເຫຼືອບໍ່ເກີນ 1,5% ຂອງຄອບຄົວທັງໝົດໃນທົ່ວແຂວງ, ບ້ານທຸກຍາກຍັງເຫຼືອບໍ່ເກີນ 2% ຂອງຈຳນວນບ້ານທັງໝົດ ແລະ ສູ້ຊົນສ້າງຄອບຄົວພັດທະນາໃຫ້ໄດ້ 85%, ສ້າງບ້ານພັດທະນາໃຫ້ໄດ້ຫຼາຍກວ່າ 66,75% ຂອງບ້ານທັງໝົດ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດໃຫ້ບັນລຸ 3 ຈຸດ.

ຫົວໜ້າພະແນກກະສິກຳ ແລະ ປ່າໄມ້ແຂວງ ທ່ານ ຄຳຫຼ້າ ຜິວວັນນາ ໄດ້ເປີດເຜີຍວ່າ: ເພື່ອໃຫ້ໄດ້ຕາມຄາດໝາຍທີ່ວາງໄວ້ ໄດ້ສຸມໃສ່ການສ້າງໃຫ້ມີສະມາຊິກພັກຮາກຖານບ້ານທີ່ມີຄວາມເຂັ້ມແຂງ, ສີ່ງສຳຄັນຕ້ອງເອົາໃຈໃສ່ຕິດຕາມ ຄຸ້ມຄອງທຶນບ້ວງພັດທະນາຊົນນະບົດ ແລະ ລຶບລ້າງຄວາມທຸກຍາກ, ບ້ວງຈັດສັນພູມລຳເນົາ ແລະ ບ່ອນທຳມາຫາກິນຖາວອນ ທີ່ໄດ້ຮັບອະນຸມັດໃນປີ 2018 ທີ່ກວມເອົາ 78 ບ້ານ ຂອງໄຊຍະບູລີ.

ໂດຍໄດ້ຮັບທຶນໂຄງການສະເໜີໃໝ່ມີ 5 ໂຄງການ ມູນຄ່າ 5,62 ຕື້ກວ່າກີບ, ປີ 2018 ໄດ້ຮັບອະນຸມັດ 530 ລ້ານກີບ ເທົ່າກັບ 11,32% ເຊິ່ງໄດ້ສຸມໃສ່ຈຸດຫ້ວຍສະແງມ ໂດຍສະເພາະແມ່ນການຍົກຍ້າຍປະຊາຊົນອອກຈາກເຂດສ່ຽງໄພແຄມນໍ້າບ້ານຫ້ວຍເພາະ, ເມືອງໄຊຍະບູລີ. ສຳລັບແຜນການລົງທຶນປີ 2018 ໄດ້ທຶນ 370,44 ລ້ານກີບ ເທົ່າກັບ 11,79% ຂອງໂຕເລກອະນຸມັດ.

ຮຽບຮຽງໂດຍ: ບຸນມີ ຄຳມີໄຊ

ແຫຼ່ງຂ່າວຈາກ: ເສດຖະກິດສັງຄົມ ແລະ ໜັງສືພິມປະຊາຊົນ.