spot_img
Homeຂ່າວຕ່າງປະເທດທຣໍ້າກ່າວວ່າຈີນພະຍາຍາມແຊກແຊງການເລືອກຕັ້ງໃນສະຫະລັດ

ທຣໍ້າກ່າວວ່າຈີນພະຍາຍາມແຊກແຊງການເລືອກຕັ້ງໃນສະຫະລັດ

Published on

ສຳນັກຂ່າວຕ່າງປະເທດລາຍງານຈາກນະຄອນຫຼວງນິວຢອກ ປະເທດສະຫະລັດອາເມລິກາ ເມື່ອວັນທີ 26 ກັນຍາ 2018 ວ່າ ປະທານາທິບໍດີ ໂດນັລ ທຣໍ້າ ໄດ້ກ່າວຕໍ່ກອງປະຊຸມຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (United Nations Security Council: UNSC) ໃນວາລະພິເສດ ເມື່ອວັນພຸດວ່າ ຈີນກຳລັງພະຍາຍາມຢ່າງໜັກໃນທຸກວິທີທາງໃນການ “ສ້າງຄວາມປ່ຽນແປງ” ທາງການເມືອງຂອງສະຫະລັດ ເພື່ອຂັດຂວາງໄຊຊະນະຂອງພັກ ຣີພັບບຼິກັນ ໃນການເລືອກຕັ້ງກາງສະໄໝ ເຊິ່ງຈະຈັດຂຶ້ນໃນວັນທີ 6 ພະຈິກ 2018 ນີ້ ສາເຫດຈາກຄວາມຂັດແຍ້ງເລື່ອງການຄ້າລະຫວ່າງລັດຖະບານສະຫະລັດກັບລັດຖະບານປັກກິ່ງ.

ຂະນະດຽວກັນ, ທຣໍ້າຍັງໄດ້ກ່າວເຖິງຄວາມສຳພັນລະຫວ່າງເຂົາກັບປະທານາທິບໍດີ ສີ ຈິ້ນຜິງ ວ່າ “ອາດບໍ່ຖືເປັນເພື່ອນກັນອີກຕໍ່ໄປ” ແຕ່ເຊື່ອໝັ້ນວ່າຜູ້ນຳຈີນຈະຍັງມີຄວາມເຄົາລົບນັບຖືໃຫ້ແກ່ກັນ.

ທາງດ້ານ ທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຈີນ ກ່າວຕໍ່ທີ່ປະຊຸມຕອບໂຕ້ຄຳຖະແຫຼງຂອງທຣໍ້າໄປວ່າ “ລັດຖະບານຈີນບໍ່ເຄີຍມີຄວາມປະສົງໃນການແຊກແຊງກິດຈະການພາຍໃນຂອງປະເທດໃດ ຂໍ້ກ່າວຫາທັງໝົດຂອງສະຫະລັດບໍ່ມີມູນຄວາມຈິງ ແລະ ປາສະຈາກຫຼັກຖານ”. ທັງນີ້, ລັດຖະບານຈີນໄດ້ໃຊ້ມາດຕະການຕອບໂຕ້ກຳແພງພາສີສະຫະລັດແບບ “ຕາຕໍ່ຕາ ຟັນຕໍ່ຟັນ” ມາໂດຍຕະຫຼອດ.

ຢ່າງໃດກໍ່ຕາມ ຫຼັງຈາກສິ້ນສຸດກອງປະຊຸມ ທຣໍ້າໄດ້ສະແດງຫຼັກຖານ ດ້ວຍການທະວິດຂໍ້ຄວາມ ແລະ ຮູບກ່ຽວກັບການທີ່ບໍລິສັດ ໄຊນາ ເດລີ ເຊິ່ງເປັນໜຶ່ງໃນໜ່ວຍງານລັດວິສາຫະກິດດ້ານສື່ສານມວນຊົນຂອງຈີນ ຊື້ໂຄສະນາຫຼາຍເຖິງ 4 ໜ້າໃນໜັງສືພິມ “ດິມອຍ” ສະບັບວັນອາທິດທີ່ຜ່ານມາ ເຊິ່ງເປັນສື່ໃຫຍ່ຂອງລັດໄອໂອວາ ໜຶ່ງໃນລັດທີ່ເປັນສິວິງສະເຕດ (Swing State*)ຂອງການເລືອກຕັ້ງເກືອບທຸກລະດັບຂອງສະຫະລັດ  ແລະ ເປັນໜຶ່ງໃນລັດທີ່ສົ່ງອອກສິນຄ້າການກະເສດຫຼາຍຊະນິດໄປທີ່ຈີນ ເພື່ອຕີພິມ “ໂຄສະນາຊວນເຊື່ອ” ກ່ຽວກັບການຮ່ວມມື ແລະ ຜົນປະໂຫຍດທາງການຄ້າລະຫວ່າງສະຫະລັດກັບຈີນ.

 

*ໃນສະຫະລັດອາເມລິກາຈະມີສອງພັກໃຫຍ່, ແຕ່ລະພັກຈະມີລັດທີ່ເປັນຖານສຽງເລືອກຕັ້ງຂອງຕົນຢູ່, ແຕ່ວ່າກໍຈະມີບາງລັດທີ່ເປັນສະວິງສະເຕດ Swing State ເຊິ່ງເປັນລັດທີ່ບໍ່ໄດ້ເປັນຖານສຽງໃຫ້ພັກໃດ, ເຊິ່ງທັງສອງພັກຈະມີການແຂ່ງຂັນຫາສຽງໃນລັດທີ່ເປັນສະວິງສະເຕດນີ້ສູງກວ່າລັດອື່ນໆ ເພື່ອໃຫ້ຄະແນນໃນການເລືອກຕັ້ງຂອງຕົນສູງຂຶ້ນ

 

 

 

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ ແລະ ຮູບພາບປະກອບ: www.dailynews.co.th

ບົດຄວາມຫຼ້າສຸດ

ງົດງາມທີ່ສຸດຈາກທົ່ວໂລກ ຕາດກວາງຊີ ແຂວງຫຼວງພະບາງ ຖືຈັດຢູ່ໃນ 21 ນໍ້າຕົກທີ່ສວຍງາມຈາກທົ່ວໂລກ ປີ 2025

ວາລະສານ ການທ່ອງທ່ຽວຊື່ດັງຂອງໂລກ Travel + Leisure ໄດ້ຈັດອັນດັບ Top 21 Most Beautiful Waterfalls in the World...

ໄທເລີ່ມປະຕິບັດແລ້ວ ທະນາຄານເລີ່ມປາບປາມຂະບວນການບັນຊີມ້າ ຖ້າກວດພົບຄວາມສົງໄສ ຈະອາຍັດບັນຊີທັນທີ

ບັນຊີມ້າແມ່ນບັນຊີທະນາຄານທີ່ຖືກນໍາໃຊ້ໂດຍອາດຊະຍາກອນ ເພື່ອເກັບເງິນ ຫຼື ຟອກເງິນທີ່ໄດ້ມາແບບຜິດກົດໝາຍ ແມ່ນບັນຊີທີ່ຖືກຈ້າງໃຫ້ເປີດ ຫຼື ຖືກລັກຂໍ້ມູນໄປໃຊ້ ເພື່ອເປັນທາງຜ່ານຂອງເງິນທີ່ໄດ້ມາຈາກການກະທຳຜິດກົດໝາຍ ລວມທັງການພະນັນ. ໃນຊ່ວງໜຶ່ງອາທິດທີ່ຜ່ານມາ ທາງທະນາຄານເເຫ່ງປະເທດໄທ ເລີ່ມກວດສອບ ແລະ ລົງມືປະຕິບັດຢ່າງເຂັ້ມງວດ ໃນການອາຍັດບັນຊີມ້າ...

ຄວາມຫວັງໃໝ່ຂອງເນປານ ແຕ່ງຕັ້ງລັດຖະມົນຕີຄົນໃໝ່ ໂດຍຈະປະຕິບັດໜ້າຮັກສາການ 6 ເດືອນ

ພາຍຫຼັງຄວາມວຸ່ນວາຍຂອງເຫດການປະທ້ວງໃນປະເທດເນປານ ເຮັດໃຫ້ອະດີດນາຍຍົກລັດຖະມົນຕີໄດ້ລາອອກ ພ້ອມທັງເດີນທາງອອກນອກປະເທດ ນຳພາໃຫ້ເນປານບໍ່ມີຄົນດຳລົງຕໍາເເໜ່ງນາຍົກລັດຖະມົນຕີໃນໄລຍະໜຶ່ງ. ເຊິ່ງໃນວັນທີ 12 ກັນຍາ 2025 ທີ່ຜ່ານມາ, ໄດ້ມີການປະກາດແຕ່ງຕັ້ງ ທ່ານ ນາງ  ສຸຊີລາ ກາກີ ຂຶ້ນຮັບຕໍາແໜ່ງຮັກສາການນາຍົກລັດຖະມົນຕີ...

ສະຫຼົດ! ຊາຍອາຍຸ 26 ປີ (ເສຍຊີວິດ) ຍ້ອນຂັບລົດຕຳງົວ ທີ່ບ້ານວຽງແກ້ວ ເມືອງຈັນທະບູລີ ນະຄອນຫຼວງວຽງຈັນ

ບັນຫາການປ່ອຍສັດຊະຊາຍ ສ່ຽງເຮັດໃຫ້ຄົນອື່ນເກີດອຸບັດຕິເຫດ ເຖິງຂັ້ນເສຍຊີວິດໄດ້. ບັນຫາການປ່ອຍສັດລ້ຽງ (ງົວ, ຄວາຍ, ແບ້, ມ້າ...) ຍັງຄົງຖືກພົບເຫັນເລື້ອຍໆຢູ່ຫຼາຍໆຂົງເຂດ ຕັ້ງແຕ່ເຂດຊານເມືອງຈົນໄປເຖິງໃນເມືອງ. ຈົນກາຍເປັນຄວາມເຄີຍຊິນໄປແລ້ວສຳລັບຜູ້ສັນຈອນໄປມາທີ່ຕ້ອງລະວັງເອງ ແຕ່ບາງຄັ້ງກໍມີອຸບປະຕິເຫດຕາມມາ ເຊັ່ນ: ລົດໃຫຍ່ຕຳງົວ, ລົດຈັກຕຳງົວ,...