ໂຄງການກໍ່ສ້າງທາງລົດດ່ວນຈາກນະຄອນຫລວງວຽງຈັນ ຫາ ເມືອງວັງວຽງ, ແຂວງວຽງຈັນ ຈະໄດ້ເລີ່ມລົງມືກໍ່ສ້າງໃນກາງເດືອນພະຈິກ 2018 ນີ້ ແລະ ໂຄງການດັ່ງກ່າວໄດ້ທົດແທນເປັນຈຳນວນມູນຄ່າໃຫ້ແຕ່ລະປະຊາຊົນຜູ້ຖືກຜົນກະທົບພາຍໃນເມືອງໂພນໂຮງ, ແຂວງວຽງຈັນ ເປັນຈຳນວນ 80 ຄອບຄົວໃນ 13 ບ້ານ ລວມມູນຄ່າກວ່າ 11 ຕື້ກີບ(ສຳລັບງວດທຳອິດ).
ລາຍລະອຽດຂອງແຜນການໂດຍລວມມີດັ່ງນີ້:
1 ທາງດ່ວນວຽງຈັນ-ວັງວຽງ ຖືກອອກແບບໃຫ້ມີຄວາມກວ້າງຂອງເສັ້ນທາງ 23 ແມັດ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ມີອຸມຸງ 1 ແຫ່ງ (ເຂດພູພະນັງ), ມີຂົວຂ້າມທາງທັງໝົດ 31 ແຫ່ງ ໃນນີ້ມີຂົວຂ້າມທາງ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານທົ່ວໄປ 23 ຈຸດ, ລວມມູນຄ່າການກໍ່ສ້າງກວ່າ 1 ຕື້ໂດລາສະຫະລັດ.
ທາງດ້ານປະທານບໍລິສັດທີ່ປຶກສາດ້ານສິ່ງແວດລ້ອມລາວຈຳກັດໄດ້ໃຫ້ສໍາພາດຕໍ່ສື່ມວນຊົນວ່າ: ໂຄງການກໍ່ສ້າງທາງດ່ວນ ນະຄອນຫລວງ-ວັງວຽງ ແມ່ນມີຄວາມຍາວທັງໝົດ 109,12 ກິໂລແມັດ. ໃນນັ້ນໄດ້ຜ່ານເມືອງນາຊາຍທອງ, ນະຄອນຫລວງວຽງຈັນ, ເມືອງໂພນໂຮງ, ເມືອງ ຫີນເຫີບ ແລະ ເມືອງວັງວຽງ ແຂວງວຽງຈັນ. ໂຄງການດັ່ງກ່າວແມ່ນໄດ້ສົ່ງຜົນກະທົບຕໍ່ເນື້ອທີ່ດິນຕ່າງໆຂອງປະຊາຊົນຫລາຍຮ້ອຍຄອບຄົວ, ແຕ່ແນວໃດກໍຕາມ ທາງດ້ານປະຊາຊົນກໍໄດ້ໃຫ້ຄວາມຮ່ວມມື ແລະ ປະກອບສ່ວນເຂົ້າໃນການພັດທະນາສ້າງສາສໍາລັບໂຄງການດັ່ງກ່າວຢ່າງຕັ້ງໜ້າ ເພາະເຂົ້າໃຈຕໍ່ການສ້າງສາພັດທະນາພື້ນຖານໂຄງລ່າງຂອງຊາດ ແລະ ເຫັນດີນຳບໍລິສັດ, ຄະນະກຳມະການໄກເກ່ຍສິ່ງຂີດຂວາງ ແລະ ຄົ້ນຄວ້າການກຳນົດຄ່າຊົດເຊີຍ.
ມາຮອດປັດຈຸບັນນີ້ ໄດ້ທົດແທນໃຫ້ແກ່ປະຊາຊົນເມືອງໂພນໂຮງໄປແລ້ວ 80 ຄອບຄົວຂອງ 13 ບ້ານ ລວມມູນຄ່າກວ່າ 11 ຕື້ກີບ. ພ້ອມນີ້ໃນຊຸດຕໍ່ໄປ ຈະສືບຕໍ່ທົດແທນໃຫ້ປະຊາຊົນຜູ້ໄດ້ຮັບຜົນກະທົບພາຍໃນເມືອງຫີນເຫີບ ແລະ ເມືອງວັງວຽງ. ຫລັງຈາກນັ້ນ ແມ່ນສຳລັບປະຊາຊົນເມືອງນາຊາຍທອງ, ນະຄອນຫລວງວຽງຈັນ ໂດຍໃຫ້ໄວທີ່ສຸດພາຍໃນເດືອນຕຸລາ 2018 ທີ່ຈະມາເຖິງນີ້.
ຕໍ່ກັບໂຄງການດັ່ງກ່າວແມ່ນຈະໄດ້ລົງມືກໍ່ສ້າງພາຍໃນກາງເດືອນພະຈິກ 2018 ນີ້ ໂດຍຈະເລີ່ມກໍ່ສ້າງບັນດາຂົວ ແລະ ເຈາະອຸມຸງກ່ອນ. ການກໍ່ສ້າງທາງດ່ວນແຕ່ ນະຄອນຫລວງວຽງຈັນ-ເມືອງວັງວຽງ ຄາດການວ່າຈະສຳເລັດກ່ອນກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ໃນປີ 2020.
ເພື່ອກະຕຸກຊຸກຍູ້ເສດຖະກິດ-ສັງຄົມຂອງຊາດໃຫ້ມີການ ຂະຫຍາຍຕົວຂຶ້ນເປັນກ້າວໆ ຈື່ງຮຽກຮ້ອງມາຍັງປະຊາຊົນຈົ່ງໃຫ້ຄວາມຮ່ວມມື, ອໍານວຍຄວາມສະດວກ ໃຫ້ແກ່ການກໍ່ສ້າງທາງດ່ວນໃຫ້ສຳເລັດໂດຍໄວດ້ວຍ.
ຮຽບຮຽງໂດຍ: ບຸນມີ ຄຳມີໄຊ
ແຫຼ່ງຂ່າວ ແລະ ຮູບພາບ:Sourioudong Sundara