ໃນວັນທີ 19 ກັນຍາ 2018 ທີ່ຜ່ານມາ ທາງສູນການແພດສຸຂະສຶກສາ ໄດ້ລາຍງານໃຫ້ຮູ້ວ່າ ຈາກຂໍ້ມູນລາຍງານຂອງສູນວິເຄາະ ແລະ ລະບາດວິທະຍາໃຫ້ຮູ້ວ່າ ໃນໄລຍະ 5 ປີທີ່ຜ່ານມາ ເຊິ່ງນັບຕັ້ງແຕ່ປີ 2012-2017 ມີຄົນຖືກໝາກັດຈຳນວນ 264 ກໍລະນີ ແລະ ມີ 23 ກໍລະນີເສຍຊີວິດຍ້ອນພະຍາດວໍ້. ນອກຈາກນັ້ນ​ ທາງສູນວິເຄາະ ແລະ ລະບາດວິທະຍາ ຍັງໄດ້ຮັບລາຍງານກ່ຽວກັບກໍລະນີໝາກັດໃນທຸກໆປີ.

ດັ້ງນັ້ນ, ເພື່ອປ້ອງກັນພະຍາດວໍ້ທີ່ອາດລະບາດ, ທາງສູນຂ່າວສານການແພດສຸຂະສຶກສາ ຈະລົງໄປຕັ້ງຈຸດເພື່ອສັກຢາກັນພະຍາດວໍ້ໃຫ້ກັບສັດໂດຍສະເພາະແມ່ນໝາ ທ່ານສາມາດນຳໝາຂອງທ່ານໄປສັກວັກຊີນກັບພະຍາດວໍ້ໄດ້ທີ່ ສວນເຈົ້າອານຸວົງ ນະຄອນຫຼວງວຽງຈັນ, ໃນວັນສຸກທີ 28 ກັນຍາ 2018 ເລີ່ມແຕ່ເວລາ 8:00-17:00 ໂມງ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: ສູນຂ່າວສານການແພດສຸຂະສຶກສາ centre of information and education for health