ງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງຈະເປັນເຈົ້າພາບ ແມ່ນໄດ້ຮັບການຕັດສິນໃຈເລື່ອນອອກໄປເປັນປີໜ້າ (ອ່ານຂ່າວເພີ່ມຕື່ມ: ງານມະຫະກຳກິລາແຫ່ງຊາດທີ່ຊຽງຂວາງຖືກເລື່ອນໄປເປັນປີໜ້າ!) ເນື່ອງຈາກວ່າປະຊາຊົນທົ່ວປະເທດຍັງງ່ວມເຫງົາກັບໄພພິບັດທີ່ເກີດຂື້ນພາຍໃນປະເທດ ຈື່ງເຫັນວ່າບໍ່ເໝາະສົມໃນການຈັດງານມະຫະກຳກິລາເທື່ອ.
ຫ້ອງວ່າການສຳນັກງານນາຍົກລັດຖະມົນຕີອອກແຈ້ງການເລກທີ 1525/ຫສນຍ.ກລຂ, ລົງວັນທີ 14 ກັນຍາ ທີ່ຜ່ານມາເຫັນດີໃຫ້ເລື່ອນການຈັດງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງຈະເປັນເຈົ້າພາບໃນລະຫວ່າງວັນທີ 11-21 ພະຈິກ 2018 ອອກໄປເປັນວັນທີ 11-21 ພະຈິກ 2019.
ລ່າສຸດເມື່ອວັນທີ 18 ກັນຍາ ທີ່ຜ່ານມາ ພາຍໃຕ້ກອງປະຊຸມລັດຖະບານເປີດກວ້າງຄັ້ງທີ II ປີ 2018 ທ່ານ ບຸນຕົ້ນ ຈັນທະພອນ, ເຈົ້າແຂວງ ແຂວງຊຽງຂວາງ ໄດ້ກ່າວຕໍ່ສື່ມວນຊົນວ່າ: ເຫດຜົນທີ່ລັດຖະບານເຫັນດີໃຫ້ເລື່ອນການຈັດການແຂ່ງຂັນກິລາແຫ່ງຊາດຄັ້ງນີ້ ບໍ່ແມ່ນຍ້ອນສາເຫດທີ່ວ່າແຂວງຊຽງຂວາງກະກຽມພື້ນຖານໂຄງລ່າງບໍ່ທັນແຕ່ຢ່າງໃດ, ເພາະລັດຖະບານໄດ້ສະໜອງງົບປະມານເຂົ້າໃນການກະກຽມພື້ນຖານໂຄງລ່າງຢ່າງພຽງພໍກັບຄວາມຕ້ອງແລ້ວ, ເປັນຕົ້ນ: ສະໜາມທີ່ຈະໃຊ້ເຂົ້າໃນພິທີເປີດ-ປິດ, ສະໜາມແຂ່ງຂັນກິລາແຕ່ລະປະເພດ, ສະຖານທີ່ພັກເຊົາຂອງຄູຝຶກ ແລະ ນັກກິລາ ແລະ ອື່ນໆ.
ທ່ານກ່າວອີກວ່າ: ການແຂ່ງຂັນກິລາຖືວ່າແມ່ນການເຄື່ອນໄຫວກິດຈະກຳປະເພດໜື່ງທີ່ສ້າງຄວາມເບີກບານມ່ວນຊື່ນ ແຕ່ເມື່ອໄພທຳມະຊາດໄດ້ເກີດຂື້ນຢ່າງຮ້າຍແຮງແບບນີ້ ເຮັດໃຫ້ປະຊາຊົນລາວຈຳນວນຫຼວງຫຼາຍຕ້ອງຕົກຢູ່ໃນຄວາມໂສກເສົ້າ, ບວກກັບຫຼາຍແຂວງກໍຍັງຂາດງົບປະມານໃນການກະກຽມນັກກິລາ, ເຖີງວ່າຈະສາມາດສົ່ງນັກກິລາເຂົ້າຮ່ວມການແຂ່ງຂັນໄດ້ແຕ່ກໍອາດເປັນການເຂົ້າຮ່ວມການແຂ່ງຂັນທີ່ບໍ່ເຕັມເມັດ ເຕັມໜ່ວຍ ຫຼື ເຂົ້າຮ່ວມຕາມຂະບວນການເທົ່ານັ້ນ ໂດຍສະເພາະຢູ່ເມືອງສະໜາມໄຊ ແຂວງອັດຕະປື.
ເຈົ້າແຂວງ ແຂວງຊຽງຂວາງໄດ້ກ່າວຢໍ້າຕື່ມວ່າ: ການທີ່ລັດຖະບານເຫັນດີໃຫ້ເລື່ອນການຈັດງານມະຫາກຳກິລາແຫ່ງຊາດຄັ້ງນີ້ອອກໄປ ຖືວ່າເປັນການຕັດສິນໃຈທີ່ຖືກຕ້ອງ ແລະ ສອດຄ່ອງກັບຄວາມເປັນຈິງ. ອົງການປົກຄອງແຂວງຊຽງຂວາງຈິ່ງເຫັນດີນໍາ ແລະ ໄດ້ແຈ້ງຂ່າວໃຫ້ປະຊາຊົນພາຍໃນແຂວງຮັບຮູ້ແລ້ວ ແລະ ທຸກຄົນກໍເຫັນດີເປັນເອກະພາບນຳກັນ, ເຂົ້າໃຈຕໍ່ສະຖານະການທີ່ເກີດຂື້ນ. ຈາກນີ້ໄປ, ແຂວງຊຽງຂວາງກໍຈະມີເວລາໃນການກະກຽມຈັດງານກິລາຄັ້ງນີ້ ແລະ ເຮັດໃຫ້ການເປັນເຈົ້າພາບບັນລຸຜົນສຳເລັດຕາມທີ່ຄາດໝາຍໄວ້ທຸກປະການ.
ຮຽບຮຽງໂດຍ: ບຸນມີ ຄຳມີໄຊ.
ແຫຼ່ງຂ່າວ: ໜັງສືພິມປະຊາຊົນ.