ລັດຖະບານຫວຽດນາມປະກາດຈັດພິທີຊາປະນະກິດສົບຂອງປະທານປະເທດ ເຈິ່ນ ດ້າຍ ກວາງ ເຊິ່ງເຖິງແກ່ມໍລະນະກຳເມື່ອວັນສຸກທີ່ຜ່ານມາ ໃນໄວອາຍຸ 61 ປີ ດ້ວຍໂຣກຂອງຜູ້ກ່ຽວ, ພ້ອມກັບປະກາດຫຼຸດທຸງຊາດລົງເຄິ່ງເສົາ ແລະ ງົດກິດຈະກຳບັນເທີງເພື່ອສະແດງຄວາມໄວ້ອາໄລ.
ສຳນັກຂ່າວເອເອຟພີລາຍງານຈາກນະຄອນຫຼວງຮ່າໂນຍ ປະເທດຫວຽດນາມເມື່ອວັນທີ 23 ກັນຍາ 2018 ວ່າ ພັກຄອມມູນິດຫວຽດນາມອອກຖະແຫຼງການປະກາດໄວ້ອາໄລທົ່ວປະເທດມີກຳນົດ 2 ມື້ ເລີ່ມຕັ້ງແຕ່ວັນພຸດທີ 26 ກັນຍາ 2018 ນີ້ ເພື່ອສະແດງຄວາມໄວ້ອາໄລ ການເຖິງແກ່ມໍລະນະກຳຂອງປະທານປະເທດ ເຈິ່ນ ດ້າຍ ກວາງ ແຫ່ງຫວຽດນາມ ເມື່ອວັນສຸກທີ 21 ກັນຍາ 2018 ທີ່ຜ່ານມາ, ພິທີຊາປະນະກິດສົບຈະໄດ້ຈັດຂຶ້ນທີ່ນະຄອນຫຼວງ ຮ່າໂນຍ ແລະ ຈະມີການຖ່າຍທອດສົດທາງໂທລະພາບ. ຈາກນັ້ນວັນທີ 27 ກັນຍາ 2018 ຈະເຄື່ອນຍ້າຍສົບຂອງປະທານປະເທດ ເຈິ່ນ ດ້າຍ ກວາງ ໄປປະກອບພິທີຝັງທີ່ບ້ານເກີດທີ່ນິນບິ່ນ.
ຖະແຫຼງການໄດ້ລະບຸອີກວ່າ ການເຖິງແກ່ມໍລະນະກຳຂອງປະທານປະເທດ ເຈິ່ນ ດ້າຍ ກວາງ ນັບເປັນຄວາມສູນເສຍອັນຍິ່ງໃຫຍ່ຂອງພັກ, ປະເທດ ແລະ ປະຊາຊົນ ເຊິ່ງກໍ່ຫຼາຍປະເທດສົ່ງສານສະແດງຄວາມເສຍໃຈມາທີ່ຫວຽດນາມ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: dailynews.co.th