ກົມອຸຕຸນິຍົມ ແລະອຸທົກກະສາດ ໄດ້ອອກແຈ້ງເຕືອນເລື່ອງລົມພາຍຸ ແອລແມັກກີ ຫົວທີ 15 ຄາດວ່າຈະເຄື່ອນໂຕເຂົ້າສູ່ງປະເທດຫວຽດນາມໃນຕອນເຊົ້າຂອງວັນທີ 16 ກັນຍາ 2014 ວົງລັດສະໝີຂອງພາຍຸຈະກວມເອົາບັນດາແຂວງພາກກາງ, ພາກໃຕ້ ແລະບັນດາແຂວງພາກຕາເວັນອອກຂອງພາກເໜືອ. ນັບແຕ່ວັນທີ 16-17 ກັນຍາ 2014 ຈະມີຝົນຕົກຟ້າຄະນອງ, ຝົນຕົກໜັກ, ລົມແຮງ ໃນແຂວງ ຊຽງຂວາງ, ຫົວພັນ, ຜົງສາລີ, ອຸດົມໄຊ ແລະຫຼວງນ້ຳທາ. ສ່ວນຢູ່ແຂວງ ວຽງຈັນ, ນະຄອນຫຼວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ ແລະບັນດາແຂວງພາກໃຕ້ຈະມີຝົນຕົກໃນລະດັບຄ່ອຍຫາປານກາງ.

ດັ່ງນັ້ນ, ຈຶ່ງແຈ້ງເຕືອນເຖິງອຳນາດການປົກຄອງ, ອົງການຈັດຕັ້ງທຸກພາກສ່ວນ ແລະພໍ່ແມ່ປະຊາຊົນທີ່ອາໄສຢູ່ໃນເຂດແຂວງດັ່ງກ່າວຂ້າງເທິງ ຈົ່ງມີສະຕິຕໍ່ສະພາບຝົນຕົກໜັກ, ລົມແຮງ, ອາດຈະມີເຫດດິນເຈື່ອນ, ນ້ຳຖ້ວມ ແລະຂໍໃຫ້ກຽມພ້ອມມ້ຽນມັດເຄື່ອງຂອງແລະສັດລ້ຽງໄວ້ບ່ອນສູງແລະປອດໄພ ແລະຢ່າລືມຕິດຕາມສະພາບອາກາດຈາກແຫຼ່ງຂ່າວຢ່າງຕໍ່ເນື່ອງ.