ເຫດອັນເນື່ອງມາຈາກການລະເມີດບັນດາຂໍ້ຕົກລົງຂອງຄະນະກຳມະການຊາຍແດນຮ່ວມລາວ-ກຳປູເຈຍ ແລະ ກຳປູເຈຍ-ລາວ ທີ່ເກີດຂື້ນມາດົນແລ້ວສົ່ງຜົນໃຫ້ ນາຍົກລັດຖະມົນຕີທັງສອງປະເທດຕ້ອງໄດ້ຫາທາງແກ້ໄຂຢ່າງຮີບດ່ວນ. ນາຍົກລັດຖະມົນຕີລາວ ແລະ ກໍາປູເຈຍ ຮ່ວມມືກັນຖະແຫຼງຜົນການປຶກສາຫາລື ເພື່ອແກ້ໄຂບັນຫາຊາຍແດນລະຫວ່າງສອງປະເທດ, ພາຍຫຼັງສໍາເລັດການພົບປະສອງຝ່າຍຢູ່ນະຄອນຫຼວງຮ່າໂນ້ຍ ສສ.ຫວຽດນາມ, ໃນວັນທີ 13 ກັນຍາ ທີ່ຜ່ານມານີ້.
ທ່ານ ສົມເດັດ ຮຸນແຊນ, ນາຍົກລັດຖະມົນຕີແຫ່ງ ລາຊະອານາຈັກກໍາປູເຈຍ ໄດ້ຖອນທະຫານກໍາປູເຈຍອອກຈາກເຂດຊາຍແດນທີ່ເປັນຈຸດຄົງຄ້າງແລ້ວ, ໂດຍກ່າວວ່າ: ເປັນການແຈ້ງຂ່າວຢ່າງຊັດເຈນຕໍ່ປະຊາຊົນທັງ 2 ປະເທດ ເທື່ອນີ້ເປັນເທື່ອທີ 3 ທີ່ ສປປ ລາວ ແລະ ກໍາປູເຈຍໄດ້ຮ່ວມຖະແຫຼງການຢູ່ ນະຄອນຫຼວງວຽງຈັນ, ພະນົມເປັນ ແລະ ຮ່າໂນ້ຍ. ດ້ວຍການຊີ້ແຈ້ງກ່ຽວກັບເຂດຫ້ວຍຕະເງົາ ທີ່ຕິດກັບຊາຍແດນຫ້ວຍອາໄລໄປຮອດຊາຍແດນ ສປປ ລາວ ຊຶ່ງຖືວ່າເປັນເຂດທີ່ຍັງບໍ່ທັນແກ້ໄຂ, ເປັນຈຸດຄົງຄ້າງ ແລະ ເຂດດັ່ງກ່າວຕ້ອງໄດ້ຢັ້ງຢືນວ່າ ຢູ່ໃນ ສາມເງື່ອນໄຂຂອງທັງສອງຝ່າຍຄື:
- ບໍ່ໃຫ້ມີກໍາລັງທະຫານ.
- ບໍ່ໃຫ້ປະຊາຊົນເຂົ້າມາດໍາເນີນທຸລະກິດ ຫຼື ທໍາມາຫາກິນ.
- ຖ້າຫາກວ່າຢາກລາດຕະເວນ ກໍຕ້ອງລາດຕະເວນຮ່ວມກັນ. ການລາດຕະເວນຮ່ວມກັນສາມາດເດີນທາງ ທາງບົກ ແລະ ໃຊ້ໂດຣນໄດ້.
ກ່ຽວກັບການຖອນກຳລັງທະຫານຂອງຝ່າຍກໍາປູເຈຍແມ່ນໄດ້ມີການໂອ້ລົມກັນລະຫວ່າງນາຍົກລັດຖະມົນຕີຂອງລາວ ແລະ ກໍາປູເຈຍແລ້ວວ່າ ໃຫ້ຖອນກຳລັງທະຫານກໍາປູເຈຍອອກຈາກເຂດຫ້ວຍຕະເງົາໃຫ້ຫມົດ ນັບແຕ່ປະຈຸບັນຈົນຮອດ 5 ໂມງແລງມື້ອື່ນ. ຈາກທີ່ແຕ່ກ່ອນຕ່າງຝ່າຍຕ່າງລາດຕະເວນຂອງໃຜລາວ ປະຈຸບັນນີ້ແມ່ນໃຫ້ລາດຕະເວນຮ່ວມກັນ ແລະ ໄດ້ໃຫ້ປະເທດຝຣັ່ງຊ່ວຍນຳທິດທາງໂດຍການສົ່ງແຜນທີ່ມາໃຫ້ທັງສອງປະເທດສຶກສາຖ່າຍທອດຮ່ວມກັນ.
ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ໄດ້ກ່າວວ່າ: ການພົບປະ ແລະ ຕົກລົງກັນຂອງ ສອງນາຍົກໃນຄັ້ງນີ້ ເປັນການຕົກລົງທີ່ສ້າງຄວາມໄວ້ເນື້ອເຊື່ອໃຈໃຫ້ແກ່ສອງປະເທດ, ສ້າງຄວາມອຸ່ນໃຈໃຫ້ແກ່ປະຊາຊົນທັງສອງຝ່າຍ ແລະ ໃຫ້ສອງກໍາມະການຊາຍແດນທີ່ຖືກແຕ່ງຕັ້ງນັ້ນສືບຕໍ່ລົງໄປສະຖານທີ່ເພື່ອສຶກສາຄົ້ນຄວ້າ, ຖ້າຫາກວ່າບ່ອນໃດມີການລະເມີດ ສອງຄະນະກໍາມະການຊາຍແດນພ້ອມກັນແກ້ໄຂໂລດ ເພື່ອບໍ່ໃຫ້ບານປາຍອອກໄປ.
ບັນດາຕາງໜ້າໃຫ້ແກ່ລັດຖະບານຂອງສອງປະເທດ ເພື່ອແກ້ໄຂຈຸດຄົງຄ້າງດ້ວຍກັນ. ຕໍ່ການເຄື່ອນໄຫວດັ່ງກ່າວ, ອຳນາດການປົກຄອງຂອງ ສປປ.ລາວ ກໍ່ໄດ້ພະຍາຍາມຊອກຊ່ອງທາງ ເພື່ອແກ້ໄຂສະຖານະການໃຫ້ຜ່ອນຄາຍລົງ, ແຕ່ຝ່າຍກຳປູເຈຍ ບໍ່ພຽງແຕ່ລະເມີດຂໍ້ຕົກລົງລະຫວ່າງສອງຝ່າຍ ດັ່ງທີ່ກຳນົດອອກໃນ 4 ຫຼັກການ ແລະ ບັນດາບົດບັນທຶກຮ່ວມຂອງສອງຄະນະກຳມະການຊາຍແດນ ແຕ່ຍັງໄດ້ເຄື່ອນກຳລັງເລິກເຂົ້າໄປໃນບໍລິເວນດັ່ງກ່າວ ໂດຍໃຊ້ກົນອຸບາຍຈົງໃຈຫຼອກລວງໃນການເຈລະຈາ ເພື່ອສ້າງທ່າດີໃຫ້ແກ່ຕົນເອງ ດັ່ງທີ່ຝ່າຍກຳປູເຈຍໄດ້ຂຽນໄວ້ໃນປື້ມປະຫວັດສາຍພົວພັນ
ລະຫວ່າງກຳປູເຈຍ-ລາວ ວ່າ:
“ການເຈລະຈາເປັນພຽງການເຈລະຈາ, ແຕ່ການເຄື່ອນຍ້າຍທັບຂອງກຳປູເຈຍ ຢູ່ໃນເຂດແດນຂອງກຳປູເຈຍ ຈຳເປັນຕ້ອງມີການດຳເນີນໄປຕາມແຜນການ”.
ແຫຼ່ງຂໍ້ມູນຈາກ: ໜັງສືພິມປະຊາຊົນ
ຮູບພາບຈາກ: Asiatimes