ເມື່ອວັນທີ 12 ກັນຍາ 2018 ກົມອຸຕຸນິຍົມ ແລະ ອຸທົກກະສາດ ໄດ້ອອກເຜີຍແຜ່ແຈ້ງເຕືອນ ພາຍຸໝູນເຂດຮ້ອນ ບາລີແຈັດ Barijat ຫົວທີ 23 ທີ່ເລີ່ມເຄື່ອນຕົວພາດຜ່ານເຂົ້າມາປະເທດລາວ ດ້ວຍກຳລັງອ່ອນໃນເວລາ 10:00 ໂມງຂອງວັນທີ 12 ກັນຍາ 2018, ມີຈຸດທີ່ຕັ້ງຢູ່ເຂດທະເລຈີນຕອນເໜືອ ດ້ວຍຄວາມໄວລົມ 15 ກິໂລແມັດຕໍ່ຊົ່ວໂມງ, ຄາດວ່າໄລຍະວັນທີ 14-15 ກັນຍາ 2018 ພາຍຸຫົວນີ້ຈະເຄື່ອນຜ່ານພາກເໜືອຂອງ ສສ ຫວຽດນາມ, ເຊິ່ງຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບຄ່ອຍ ຫາ ປານກາງ ຢູ່ບາງທ້ອງຖິ່ນໃນແຕ່ລະພາກຂອງປະເທດ. ຈາກນັ້ນວັນທີ 14-17 ກັນຍາ 2018 ຈະເຮັດໃຫ້ມີຝົນຕົກໃນລະດັບຄ່ອຍ ພ້ອມເກີດມີລົມແຮງຢູ່ເກືອບທົ່ວໄປ ແລະ ຕົກປານກາງ ຫາ ຕົກໜັກຢູ່ບາງທ້ອງຖິ່ນ ໃນແຂວງພາກເໜືອ ແລະ ພາກກາງ ຂອງປະເທດລາວເຊັ່ນ: ແຂວງ ຜົ້ງສາລີ, ຊຽງຂວາງ, ຫົວພັນ, ຫຼວງພະບາງ, ອຸດົມໄຊ, ບໍ່ແກ້ວ, ໄຊຍະບູລີ, ວຽງຈັນ, ບໍລິຄຳໄຊ, ຄຳມ່ວນ ແລະ ນະຄອນຫຼວງວຽງຈັນ.

ດັ່ງນັ້ນ, ຈິ່ງຂໍແຈ້ງເຕືອນໃຫ້ປະຊາຊົນທຸກຄົນກຽມພ້ອມຮັບມືກັບຝົນຕົກໜັກ, ລົມພັດແຮງ ເຊິ່ງຈະເຮັດໃຫ້ມີຕົ້ນໄມ້ຫັກລົ້ມ, ດິນເຈື່ອນ, ນໍ້າຖ້ວມ. ພ້ອມນີ້ຂໍໃຫ້ເກັບມ້ຽນ ແລະ ເຄື່ອນຍ້າຍວັດຖຸສິ່ງຂອງພ້ອມສັດລ້ຽງໄປຢູ່ທີ່ສູງ ແລະ ປອດໄພດ້ວຍ.

ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂ່າວ: ກົມອຸຕຸນິຍົມ ແລະ ອຸທົກກະສາດ
ຮູບປະກອບ: twitter.com/metofficestorms