ເຈົ້າໜ້າທີ່ພະແນກຕຳຫຼວດສືບສວນ-ສອບສວນ ປ້ອງກັນຄວາມສະຫງົບ (ປກສ) ແຂວງ ຫຼວງນໍ້າທາ ລາຍງານໃຫ້ຮູ້ວ່າ ເມື່ອວັນທີ 30 ມິຖຸນາ – ຕົ້ນເດືອນກໍລະກົດ 2018 ທີ່ຜ່ານມາ, ມີຄົນຮ້າຍເຄື່ອນໄຫວງັດຕູ້ເຊັບ ແລະ ຕູ້ ATM ຂອງທະນາຄານສົ່ງເສີມກະສິກຳ ສາຂາແຂວງຫຼວງນໍ້າທາ ແລະ ງັດທະນາຄານອິນດູຈີນ ພ້ອມທຳຮ້າຍຮ່າງກາຍພະນັກງານຮັກສາຄວາມປອດໄພບາດເຈັບສາຫັດ. ຈາກເຫດການດັ່ງກ່າວ ເຈົ້າໜ້າທີ່ໄດ້ປະສານສົມທົບກັບເຈົ້າໜ້າທີ່ວິຊາສະເພາະ ປກສ ແຂວງໃກ້ຄຽງ ເພື່ອຕິດຕາມຜູ້ກໍ່ເຫດມາລົງໂທດ.
ມາຮອດວັນທີ 5 ສິງຫາ 2018 ເວລາປະມານ 12 ໂມງກາງຄືນ, ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ສາມາດກັກຕົວທ້າວ ເຫວີຍ ຈູຊິງ ອາຍຸ 35 ປີ (ສັນຊາດຈີນ) ແລະ ທ້າວ ຈາງ ລີຊວານ ອາຍຸ 35 ປີ (ສັນຊາດຈີນ) ໃນຂະນະທີ່ພວກກ່ຽວກຳລັງດຳເນີນເຂົ້າງັດທະນາຄານພັດທະນາລາວ ສາຂາແຂວງອຸດົມໄຊ ແລະ ໄດ້ປະສານຫາ ປກສ ແຂວງ ອຸດົມໄຊ ເພື່ອນຳຕົວຜູ້ຖືກຫາທັງສອງມາສອບສວນຂະຫຍາຍຜົນ.
ຜ່ານການສືບສວນ-ສອບສວນ, ຜູ້ຖືກຫາທັງສອງສາລະພາບວ່າ ເບື້ອງຕົ້ນໄດ້ເຂົ້າມາລາວ ເພື່ອເປັນກຳມະກອນຫາບຢາງພາລາ ຢູ່ເມືອງຕົ້ນເຜິ້ງ ແຂວງບໍ່ແກ້ວ ແລະ ໄດ້ເປີດຮ້ານອາຫານຢູ່ຄາຊິໂນສາມລ່ຽມທອງຄຳ ປະມານ 1 ປີ ແລ້ວເດີນທາງກັບ ສປ ຈີນ, ມາວັນທີ 23 ກໍລະກົດ 2018 ໄດ້ພົບກັບຄົນລາວທີ່ເຄີຍເຮັດວຽກກຳມະກອນນໍາກັນ (ບໍ່ຮູ້ຊື່) ຢູ່ເຂດຊັງຢອງ ເມືອງ ຫຼ້າ ສປ ຈີນ ແລ້ວໄດ້ຊັກຊວນກັນໄປຊອກງັດຕູ້ ATM ຢູ່ ສປປ ລາວ; ວັນທີ 3 ສິງຫາ 2018 ຜູ້ກ່ຽວທັງສອງ ໄດ້ພາກັນຂີ່ລົດເກັງສີດຳ ເລກທະບຽນ H7U689 ໄປແຂວງຫຼວງນໍ້າທາ ໂດຍຜ່ານດ່ານສາກົນບໍ່ເຕັນ ເພື່ອໄປຮັບເອົາ ທ້າວ ຈາງ ລີຊວານ ເພື່ອພາກັນໄປແຂວງອຸດົມໄຊ; ເວລາປະມານ 10 ໂມງກາງຄືນ ຂອງວັນທີ 4 ສິງຫາ 2018, ຜູ້ກໍ່ເຫດທັງ 3 ຄົນໄດ້ຂີ່ລົດເລາະສັງເກດບັນດາທະນາຄານໃນເທສະບານເມືອງ, ພໍໄປຮອດທະນາຄານພັດທະນາລາວ ໝູ່ທີ່ເປັນຄົນລາວໄດ້ບອກວ່າຈະຖ້າຢູ່ນອກ ຈາກນັ້ນຜູ້ກໍ່ເຫດທັງສອງ ຈິ່ງໄດ້ປີນກຳແພງຂອງທະນາຄານ ແລ້ວເອົາເຊືອກທີ່ກຽມມາໂຍນຂຶ້ນໄປເກາະໃສ່ລະບຽງຊັ້ນ 2 ເພື່ອປີນຂຶ້ນ ແລ້ວໃຊ້ຄີມຕັດລັອກປະຕູເຂົ້າໄປຫ້ອງການທະນາຄານ ແຕ່ບໍ່ທັນຄົ້ນເຄື່ອງ ກໍຖືກເຈົ້າໜ້າທີ່ກັກຕົວກ່ອນ.
ຜູ້ຖືກຫາທັງ 2 ຍັງໄດ້ໃຫ້ສາລະພາບຕື່ມອີກວ່າ ວັນທີ 30 ມິຖຸນາ 2018 ໄດ້ເຄື່ອນໄຫວງັດຕູ້ເຊັບ ຢູ່ທະນາຄານສົ່ງເສີມກະສິກຳ ສາຂາແຂວງຫຼວງນໍ້າທາ ໄດ້ເງິນ 75.606.000 ກີບ, 59.380 ບາດ ແລະ 2.766 ໂດລາສະຫະລັດ; ເຊິ່ງເງິນຈຳນວນດັ່ງກ່າວໄດ້ແບ່ງປັນກັນໄປຫຼິ້ນການພະນັກຢູ່ແຂວງບໍ່ແກ້ວ.
ສຳລັບການລົງໂທດຜູ້ກ່ຽວທັງສອງກຳລັງຢູ່ໃນຂັ້ນພິຈາລະນາຄະດີ ແລະ ທາງ ປກສ ຈະເຝົ້າລະວັງເຫດການປະເພດນີ້ໃຫ້ຮັດກຸມຂຶ້ນກວ່າເກົ່າ.
ແຫຼ່ງຂ່າວ: ໜັງສືພິມວຽງຈັນໃໝ່