ສຳນັກງານຄະນະກຳມະການການພັດທະນາ ແລະ ປະຕິຮູບແຫ່ງຊາດຈີນ (National Development and Reform Commission: NDRC) ກ່າວວ່າ ຈີນມີມະຕິນຳໃຊ້ລະບົບເຄຣດິດພຶດຕິກຳທາງສັງຄົມ ທີ່ຮຽກວ່າ “Social Credit” ຫຼື ຄະແນນທາງສັງຄົມ ທີ່ຈະໃຊ້ແທ້ໃນປີ 2020 ໂດຍຂໍ້ມູນດັ່ງກ່າວສາມາດເຂົ້າເຖິງໄດ້ດ້ວຍການໃຊ້ລາຍນິ້ວມື ແລະ ລັກສະນະສະເພາະຂອງທາງຊີວະວິທະຍາອື່ນໆ ເຊິ່ງຈະເປັນເຄຣດິດທີ່ຄວບຄຸມທົ່ວທັງສັງຄົມຈີນ.
ຄວາມເຄື່ອນໄຫວເປັນໄປຕາມແຜນການຂອງ ປະທານາທິບໍດີ ສີ ຈິ້ນຜິງ ຜູ້ນຳຈີນ ທີ່ຈະສ້າງລະບົບຄວາມໜ້າເຊື່ອຖືໃນສັງຄົມ ໂດຍຢຶດຖືເອົາຫຼັກການ “ເມື່ອເຊື່ອຖືບໍ່ໄດ້ກໍ່ຕ້ອງຖືກຄວບຄຸມຕະຫຼອດເວລາ” ແຜນການນີ້ໄດ້ຮັບການລົງນາມຮັບຮອງໂດຍ 8 ກະຊວງ ແລະ ໜ່ວຍງານທຽບເທົ່າ ຮວມເຖິງສຳນັກງານສາຍການບິນ ແລະ ສານປະຊາຊົນສູງສຸດ.
ຈີນມີແຜນດຳເນີນການລະບົບທີ່ຈະອະນຸຍາດໃຫ້ໜ່ວຍງານຕ່າງໆ ຂອງລັດຖະບານ ສາມາດແບ່ງປັນຂໍ້ມູນກ່ຽວກັບຄວາມໜ້າເຊື່ອຖືຂອງພົນລະເມືອງ ແລະ ກຳນົດບົດລົງໂທດຕາມຄະແນນຄວາມໜ້າເຊື່ອຖືທາງສັງຄົມ.
ບຸກຄົນທີ່ຈະຖືກຂຶ້ນບັນຊີຖືກຈຳກັດ ລວມເຖິງກຸ່ມຜູ້ທີ່ເຜີຍແຜ່ຂໍ້ມູນເທັດກ່ຽວກັບການກໍ່ການຮ້າຍ ພົວພັນວັດຖຸອັນຕະລາຍ, ຜູ້ກໍ່ຄວາມເດືອດຮ້ອນວຸ້ນວາຍເທິງເຮືອບິນ ຫຼື ລົດໄຟ, ຜູ້ທີ່ໃຊ້ປີ້ໂດຍສານໝົດອາຍຸ ຫຼື ສູບຢາໃນລົດໄຟ; ບັນຊີບຸກຄົນຕ້ອງຫ້າມຍັງຈະລວມເຖິງຜູ້ກະທຳຜິດທາງການເງິນ ເຊັ່ນ ນາຍຈ້າງບໍ່ຊຳລະຄ່າປະກັນສັງຄົມ ຫຼື ປະຊາຊົນທີ່ບໍ່ຈ່າຍຄ່າປັບຕ່າງໆຂອງທາງການ. ກົດລະບຽບໃໝ່ນີ້ແມ່ນເລີ່ມທົດລອງນຳໃຊ້ຕັ້ງແຕ່ວັນທີ 1 ພຶດສະພາ 2018 ເປັນຕົ້ນມາ.
ມາດຕະຖານຄະແນນເຄຣດິດແມ່ນປະມານ 350 ຄະແນນຈະຈັດຢູ່ໃນເກນຕໍ່າ ໂດຍຄະແນນລະດັບສູງສຸດຢູ່ທີ່ 950 ຄະແນນຂຶ້ນໄປ, ຖ້າບຸກຄົນທີ່ມີຄະແນນສູງເກີນເກນທີ່ໄດ້ກຳນົດນີ້ ຈະໄດ້ຮັບສິດທິພິເສດຕ່າງໆ ແຕ່ຖ້າບຸກຄົນໃດທີ່ມີຄະແນນລະດັບຕໍ່າກວ່າເກນທີ່ກຳນົດໄວ້ ອາດຈະໄດ້ເສຍຄ່າປັບສູງຂຶ້ນ ຫຼື ໄດ້ຮັບໂທດໜັກຂຶ້ນເມື່ອກະທຳຄວາມຜິດ ອີກທັງຕ້ອງເສຍຄ່າເຊົ່າໂຮງແຮມທີ່ພັກ ແລະ ພາຫະນະ ໃນອັດຕາທີ່ແພງກວ່າປົກກະຕິ ລວມເຖິງການຕັດສິດໃຊ້ບໍລິການສາທາລະນະຕ່າງໆ, ບໍ່ຮັບເຂົ້າເຮັດວຽກ ຫຼື ຖືກປະຈານ.
ຮຽບຮຽງບົດໂດຍ: ບຸດສະດີ ສາຍມັດ
ແຫຼ່ງຂ່າວ: thestandard.co, thematter.co, dailynews.co.th