ຫຼັງເກີດເຫດລົດເມຕໍາເດັກນ້ອຍໄວລຸ້ນ 2 ຄົນເສຍຊີວິດເມື່ອເດືອນສິງຫາທີ່ຜ່ານມາ ເຮັດໃຫ້ເກີດມີການປະທ້ວງຂຶ້ນໃນຫຼາຍເມືອງຂອງບັງກລາເທດ, ນັກຮຽນ ນັກສຶກສາກວ່າ 20 ລ້ານຄົນອອກມາປິດຫົນທາງ ແລະ ປະທ້ວງຮຽກຮ້ອງໃຫ້ເຄືອຂ່າຍຄົມມະນາຄົມຍົກລະດັບຄວາມປອດໄພຕາມທ້ອງຖະໜົນໃຫ້ດີຂຶ້ນ. ຫຼັງຈາກເກີດການປະທ້ວງດັ່ງກ່າວ, ລັດຖະບານບັງກລາເທດ ຈຶ່ງໄດ້ອອກກົດໝາຍການຂົນສົ່ງສະບັບໃໝ່ ແລະ ຈະເລີ່ມທົດລອງປະຕິບັດທີ່ນະຄອນຫຼວງ ທາກາ.
ແຫຼ່ງຂ່າວຕ່າງປະເທດລາຍງານວ່າ ທ່ານ ອາຊາດູຊາມານ ມີອາ ຜູ້ບັນຊາການຕຳຫຼວດນະຄອນຫຼວງ ທາກາກ່າວວ່າ: ຜູ້ຂັບຂີ່ລົດຈັກທີ່ບໍ່ໃສ່ໝວກກັນກະທົບຈະຖືກຫ້າມບໍ່ໃຫ້ຊື້ນໍ້າມັນໃນປໍ້ານໍ້າມັນໃນ ທາກາ, ຈຸດປະສົງກໍເພື່ອຍົກລະດັບຄວາມປອດໄພຕາມທ້ອງຖະໜົນພາຍໃນປະເທດ. ນອກຈາກນີ້ ຍັງໄດ້ລະບຸໄວ້ໃນມາດຕະການດັ່ງກ່າວອີກວ່າ: ລົດຈັກ 1 ຄັນໃຫ້ມີຄົນຂີ່ໄດ້ສູງສຸດບໍ່ເກີນ 2 ຄົນຄື: ຜູ້ຂັບຂີ່ ແລະ ຜູ້ໂດຍສານທີ່ຊ້ອນທ້າຍອີກ 1 ຄົນ ແລະ ຕ້ອງໃສ່ໝວກກັນກະທົບເຊັ່ນດຽວກັນ.
ກຸ່ມເອກະຊົນທີ່ສັງເກດການອຸປະຕິເຫດໄດ້ເປີດເຜີຍຂໍ້ມູນໃຫ້ຮູ້ວ່າ: ໃນແຕ່ລະປີ ມີຜູ້ເສຍຊີວິດປະມານ 12.000 ຄົນໃນບັງກລາເທດ ໂດຍມີສາເຫດມາຈາກອຸປະຕິເຫດທາງທ້ອງຖະໜົນທັງໝົດ. ກົດໝາຍນີ້ຈະເລີ່ມປະຕິບັດໃຊ້ໃນນະຄອນຫຼວງ ທາກາ ເຊິ່ງເປັນຈຸດຕົວແບບເມືອງທໍາອິດ ເພື່ອສຶກສາຜົນໄດ້ຮັບ ແລະ ນໍາໄປປັບໃຊ້ໃນເມືອງອື່ນຕໍ່ໄປ ເພື່ອຫຼຸດການເກີດອຸປະຕິເຫດ.
ແຫຼ່ງຂ່າວຈາກ: ໜັງສືພິມ ເສດຖະກິດ-ສັງຄົມ ແລະ The new Indian Express, ຮູບພາບຈາກ: prachachat