ເມື່ອວັນທີ 3 ກັນຍາທີ່ຜ່ານມານີ້ ແຫຼ່ງຂ່າວຕ່າງປະເທດລາຍງານວ່າ: ສາຍການບິນ ຄວອນຕັສ ຊຶ່ງເປັນສາຍການບິນທີ່ໃຫຍ່ທີ່ສຸດຂອງ ອົດສະຕຣາລີ ສາມາດສ້າງເຮືອບິນທີ່ບິນໂດຍກົງຈາກນະຄອນ ຊິດນີ ຂອງ ອົດສະຕຣາລີ ໄປຫານະຄອນຫຼວງລອນດອນ, ຂອງປະເທດ ອັງກິດໄດ້ແລ້ວ ເຊິ່ງຕ້ອງໃຊ້ເວລາໃນການເດີນທາງ 20 ຊົ່ວໂມງ ແລະ ຖືວ່າເປັນການເດີນທາງທີ່ມີໄລຍະທາງເຄິ່ງໂລກ.
ທ່ານ ອະລັນ ຈອຍ ປະທານບໍລິສັດ ສາຍການບິນ ຄວອນຕັສກ່າວວ່າ: ໃນປີທີ່ຜ່ານມາ ໄດ້ລໍຖ້າໃຫ້ບໍລິສັດໂບອິງ ກັບ ແອບັສອອກແບບເຮືອບິນທີ່ສາມາດບິນໂດຍກົງຈາກຊິດນີ ໄປນະຄອນຫຼວງລອນດອນ ຫຼື ນິວຢອກຂອງ ອາເມລິກາ. ເຊິ່ງໃນຂະນະດຽວກັນນັ້ນ, ບໍລິສັດ ຄວອນຕັສ ກໍສາມາດສ້າງເຮືອບິນດັ່ງກ່າວໄດ້ ແລະ ທາງບໍລິສັດຍັງຕ້ອງການອອກແບບພາຍໃນເຮືອບິນໃຫ້ມີຕຽງນອນ, ສະຖານທີ່ລ້ຽງເດັກ, ສະຖານທີ່ອອກກໍາລັງກາຍພາຍໃນເຮືອບິນ ເພື່ອຮອງຮັບຜູ້ໂດຍສານທີ່ຕ້ອງການເດີນທາງເປັນເວລາດົນ.
ແຫຼ່ງຂ່າວຈາກ: ໜັງສືພິມ ປະຊາຊົນ
ຮູບພາບຈາກ: The independent