ອີງໃສ່ສະພາບອາກາດທີ່ມີຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ນໍ້າຂອງມີຄວາມຂຸ່ນສູງເກີນມາດຕະຖານການຜະລິດຂອງໂຮງງານຜະລິດນໍ້າປະປາ ໃນປະຈຸບັນ.
ລັດວິສະຫະກິດ ນໍ້າປະປານະຄອນຫຼວງ ໄດ້ອອກມາແຈ້ງການໃຫ້ແກ່ບັນດາພະນັກງານ, ທະຫານຕໍາຫຼວດ, ພໍ່ແມ່ປະຊາຊົນ ແລະ ຫົວໜ່ວຍທຸລະກິດທຸກພາກສ່ວນຢູ່ນະຄອນຫຼວງວຽງຈັນໄດ້ຊາບກັນວ່າ: ການສະໜອງນໍ້າປະປາຈະບໍ່ເປັນປົກກະຕິ ຍ້ອນສະພາບແມ່ນໍ້າຂອງ ມີຄວາມຂຸ່ນສູງເກີນມາດຕະຖານການຜະລິດ ເຊິ່ງອາດຈະສົ່ງຜົນກະທົບຕໍ່ການຜະລິດ-ສະໜອງນໍ້າປະປາຢູ່ໃນບາງເຂດ ບໍ່ສະໝໍ່າສະເໝີ ແລະ ບໍ່ພຽງພໍຕໍ່ການຊົມໃຊ້ພາຍໃນນະຄອນຫຼວງວຽງຈັນ ໃນໄລຍະລະດູຝົນນີ້.
ສະນັ້ນ, ທາງລັດວິສະຫະກິດນໍ້າປະປານະຄອນຫຼວງຈິ່ງແຈ້ງມາເຖິງປະຊາຊົນໃນນະຄອນຫຼວງວຽງຈັນ ໃຫ້ມີການກະກຽມເຫັບນໍ້າໄວ້ຊົມໃຊ້ໃຫ້ພຽງພໍ ແລະ ຊ່ວຍກັນປະຢັດນໍ້າຈົນກວ່າ ການຜະລິດ-ສະໜອງນໍ້າປະປາຈະເຂົ້າສູ່ສະພາບປົກກະຕິ.
ແຫຼ່ງຂ່າວ: ລັດວິສາຫະກິດນໍ້າປະປານະຄອນຫຼວງ