ເວັບໄຊຂ່າວໜັງສືພິມວຽງຈັນໃໝ່ ລາຍງານໃຫ້ຮູ້ວ່າ ເມື່ອວັນທີ 19-20 ສິງຫາ 2018ທີ່ຜ່ານມາ ທ່ານ ບຸນທອງ ຈິດມະນີ ແລະ ທ່ານ ສຈ ດຣ Schlies ANTON ຈາກປະເທດສະວິດ ພ້ອມດ້ວຍນັກວິຊາການທີ່ກ່ຽວຂ້ອງຈຳນວນໜຶ່ງ ໄດ້ເດີນທາງລົງໄປກວດສະພາບການແຕກພັງຕົວຈິງຂອງສັນເຂື່ອນ D ແລະ ພື້ນທີ່ເຂື່ອນອື່ນໆ ໂດຍມີເຈົ້າແຂວງຈຳປາສັກ ແລະ ແຂວງອັດຕະປືລົງຕິດຕາມນຳ.
ຈາກເຫດການເຂື່ອນແຕກດັ່ງກ່າວແມ່ນໄດ້ສ້າງຄວາມເສຍຫາຍຢ່າງມະຫາສານ ໂດຍສະເພາະເມືອງສະໜາມໄຊທີ່ເປັນເມືອງຕັ້ງຢູ່ລຸ່ມສັນເຂື່ອນ D ອັນໄດ້ເຮັດໃຫ້ປະຊາຊົນຢູ່ໃນ 13 ບ້ານໄດ້ຮັບຜົນກະທົບຢ່າງກະທັນຫັນ ໃນນັ້ນ ມີຈຳນວນ 6 ບ້ານທີ່ເປັນບ້ານລຽບຕາມສາຍນ້ຳເຊປຽນ ໄດ້ຮັບຜົນກະທົບ 100% ມີປະຊາຊົນທີ່ຖືກຜົນກະທົບ ແລະ ເສຍຫາຍໜັກ 1.611 ຄອບຄົວ 7.095 ຄົນ, ມີຜູ້ເສຍຊີວິດ 39 ຄົນ ແລະ ສູນຫາຍອີກ 98 ຄົນ (ອີງໃສ່ຕົວເລກວັນທີ 14 ສິງຫາ 2018) ສັດລ້ຽງ ແລະ ພື້ນທີ່ກະສິກຳຂອງປະຊາຊົນເສຍຫາຍຢ່າງຫຼວງຫຼາຍ ແລະ ປະຊາຊົນແຂວງຈຳປາສັກ ໄດ້ຮັບຜົນກະທົບຈາກເຫດການນີ້ຈຳນວນໜຶ່ງ.
ທ່ານຮອງນາຍົກ ໄດ້ຮັບຟັງລາຍງານສະພາບໂດຍລວມເຕັກນິກຂອງໂຄງການ ລາຍງານສາເຫດສັນເຂື່ອນແຕກພັງຈາກບໍລິສັດຜູ້ລົງທຶນ ລາຍງານກ່ຽວກັບຜົນຂອງການກວດສອບສາເຫດການແຕກພັງເບື້ອງຕົ້ນຈາກຜູ້ຮັບເໝົາ ແລະ ປຶກສາຫາລືບັນຫາຕ່າງໆຮ່ວມກັບບໍລິສັດຮັບເໝົາ ແລະ ວິຊາການຝ່າຍຕ່າງໆ ໃນການກວດກາບັນດາເຕັກນິກການກໍ່ສ້າງ ລວມທັງການຊອກຫາສາເຫດຕົ້ນຕໍທີ່ສົ່ງຜົນເຮັດໃຫ້ສັນເຂື່ອນແຕກພັງ ແລະ ຄາດວ່າອີກບໍ່ດົນ ຈະຮູ້ລາຍລະອຽດເຫດການເຂື່ອນແຕກໃນຄັ້ງນີ້.
ແຫລ່ງຂ່າວ: vientianemai.net