ວັນທີ 27 ສິງຫາ 2018, ສໍານັກຂ່າວຕ່າງປະເທດລາຍງານວ່າ ອູເບີ ບໍລິສັດເຄືອຂ່າຍຄົມມະນາຄົມ ທີ່ມີສໍານັກງານໃຫຍ່ຢູ່ໃນເມືຶອງ ຊານຟຣານຊິສໂກ, ລັດຄາລິຟໍເນຍ, ປະເທດສະຫະລັດເປີດເຜີຍວ່າ: ທາງບໍລິສັດ ມີແຜນທີ່ຈະມຸ່ງເນັ້ນທຸລະກິດລົດຖີບ ແລະ ລົດຈັກໄຟຟ້າຫຼາຍຂຶ້ນ ແລະ ເນັ້ນໃຊ້ລົດໃຫຍ່ໃຫ້ໜ້ອຍລົງ.
ໂດຍມີການລະບຸວ່າ ລົດຖີບ ແລະ ລົົດຈັກໄຟຟ້າມີຄວາມເໝາະສົມກັບການເດີນທາງພາຍໃນຕົວເມືອງຫຼາຍກວ່າລົດໃຫຍ່ ໂດຍສະເພາະຢ່າງຍິ່ງໃນຊົ່ວໂມງເລັ່ງດ່ວນ, ບໍລິສັດຍັງກ່າວໄວ້ວ່າ:ໃນອະນາຄົດຜູ້ໃຊ້ອູເບີຈະເລືອກໃຊ້ບໍລິການການເດີນທາງໄລຍະສັ້ນຫຼາຍຂຶ້ນ ເຖິງແມ່ນວ່າ ອາດຈະບໍ່ໄດ້ສ້າງຜົນກໍາໄລຫຼາຍພໍປານໃດ ແຕ່ສໍາລັບ ໄລຍະຍາວວິທີນີ້ເປັນແນວທາງທີ່ອູເບີຕ້ອງການທີ່ຈະມຸ່ງໄປ.
ໃນປີທີ່ຜ່ານມາ ອູເບີ ຂາດທຶນຫຼາຍກວ່າ 4,500 ລ້ານໂດລາສະຫະລັດ ແລະ ຢູ່ພາຍໃຕ້ແຮງກົດດັນໃນການປັບປຸງການເງິນ ເຖິງແມ່ນວ່າຈະມີລາຍໄດ້ຈາກທຸລະກິດບໍລິການຂົນສົ່ງທາງລົດແທັກຊີທີ່ກໍາລັງເພີ່ມຂຶ້ນກໍຕາມ ແຕ່ກໍຍັງມີຕົ້ນທຶນການຂະຫຍາຍສູ່ພື້ນທີ່ໃຫ້ບໍລິການໃໝ່ໆ.
ເຖິງຢ່າງໃດກໍຕາມ, ອູເບີໄດ້ລົງທຶນໃນຫຼາຍບໍລິສັດລົດຖີບເມື່ອປີທີ່ຜ່ານມາ ໂດຍລົດຖີບໄຟຟ້າພາຍໃຕ້ຊື່ ຈັ້ມ ຂອງທາງອູເບີ ມີໃຫ້ບໍລິການແລ້ວໃນ 8 ເມືອງຂອງສະຫະລັດ ລວມເຖິງນິວຢອກ ແລະ ວໍຊິງຕັນດີຊີ ແລະ ກໍາລັງຈະເລີ່ມໃຫ້ບໍລິການໃນເມືອງເບີລິນ, ປະເທດ ເຢຍລະມັນ ໂດຍອູເບີໄດ້ປະສານກໍາລັງກັບ ບໍລິສັດ ລົດຈັກໄຟຟ້າເຊັ່ນ ໄລມ໌ ອີກດ້ວຍ.
ແຫຼ່ງຂ່າວ ແລະ ຮູບພາບ: mthai.com