ຊຳຊຸງ ກາແລັກຊີ ໂນດ 9 (Samsung Galaxy Note 9) ຮຸ່ນໃໝ່ລ່າສຸດ ມຸ່ງເນັ້ນຄວາມເປັນຜູ້ນຳດ້ານໂທລະສັບມືຖື ສະມາດໂຟນ ທີ່ມາພ້ອມກັບບິກ S pen ເຊິ່ງເປັນບິກອັດສະລິຍະ ທີ່ສາມາດຕອບສະໜອງຄວາມເປັນອິດສະຫຼະແກ່ຊີວິດທີ່ສົມບູນແບບ.
ເປີດໂຕຢ່າງເປັນທາງການ ສຳລັບ ຊຳຊຸງ ກາແລັກຊີ ໂນດ 9 ໂດຍບໍລິສັດ ລາວຊໍາຊຸງ ເອເລັກໂຕຣນິກ ຈຳກັດຜູ້ດຽວ, ມີການເປີດໃຫ້ທົດລອງນໍາໃຊ້ລະບົບປະຕິບັດການຟັງຊັ່ນໃໝ່ ທີ່ຊຳຊຸງໄດ້ຄົ້ນຄິດຂຶ້ນມາ ເພື່ອເພີ່ມຄວາມເປັນອິດສະຫຼະ ແລະ ປະສິດທິພາບຂອງການເຮັດວຽກ, ເພື່ອຕອບສະໜອງຕາມຄວາມຕ້ອງການຂອງຜູ້ຊົມໃຊ້; ໂດຍສະເພາະບິກອັດສະລິຍະ ທີ່ມີຄວາມສາມາດຫຼາຍຢ່າງ ເປັນຕົ້ນແມ່ນ ການຂີດຂຽນ, ແຕ້ມຮູບ ແລະ ຍັງສາມາດໃຊ້ເປັນຣີໂມດຄວບຄຸມກ້ອງຖ່າຍຮູບ, ວີດີໂອ, ຄວບຄຸມການນໍາສະເໜີ Power Point ແລະ ອີກຫຼາກຫຼາຍຄຸນປະໂຫຍດ ເພື່ອເພີ່ມຄວາມສະດວກສະບາຍໃຫ້ຜູ້ຊົມໃຊ້.
ຊຳຊຸງ ກາແລັກຊີ ໂນດ 9 ມາພ້ອມກັບຄວາມພິເສດຫຼາຍຢ່າງ ເຊັ່ນຂະໜາດຂອງແບັດເຕີຣີທີ່ມີຄວາມຈຸເຖິງ 4000 mAh ພ້ອມເຕັກໂນໂລຢີສາກໄວ ສາມາດໃຊ້ງານດົນ, ມີກ້ອງເລນຄູ່ ພ້ອມລະບົບກ້ອງອັດສະລິຍະ ທີ່ສາມາດປັບແສງໄດ້ແບບອັດຕະໂນມັດ ແລະ ຂະໜາດຄວາມຈຳສູງເຖິງ 128 GB, Ram 6/8 GB. ພ້ອມດຽວກັນນັ້ນ, ໂນດ 9 ຍັງມີລະບົບ Samsung Dex ທີ່ສາມາດເຊື່ອມຕໍ່ໂທລະສັບເຂົ້າກັບຈໍ Monitor ໂດຍໃຊ້ HDMI Adapter ເຮັດໃຫ້ສາມາດໃຊ້ງານໂທລະສັບໄດ້ແບບເຄື່ອງຄອມພິວເຕີ ແລະ ມີໜ້າຈໍ Super AMOLED Infinity Display ຂະໜາດ 6.4 ນິ້ວ ພ້ອມຄວາມລະອຽດ QHD+ ແບບບໍ່ມີຂອບນຳອີກ.
ທ່ານ ຊຶງໂຮ ຊອຍ (Seungho Choi) ຜູ້ອໍານວຍການ ບໍລິສັດ ລາວຊໍາຊຸງ ເອເລັກໂຕຣນິກ ຈຳກັດຜູ້ດຽວ ໄດ້ກ່າວວ່າ: ຊຳຊຸງບໍ່ໄດ້ເປັນພຽງຜູ້ນຳເຕັກໂນໂລຢີດ້ານໂທລະສັບມືຖືສະມາດໂຟນ ທີ່ຊ່ວຍເຮັດໃຫ້ຊີວິດປະຈຳວັນງ່າຍຂຶ້ນເທົ່ານັ້ນ ແຕ່ເຮົາຍັງມຸ່ງເນັ້ນ ແລະ ໃຫ້ຄວາມສຳຄັນໃນການສ້າງນະວັດຕະກຳ ໃໝ່ຢູ່ສະເໝີ.
ຊຳຊຸງ ກາແລັກຊີ ໂນດ 9 ເປີດຕົວຢ່າງເປັນທາງການໃນວັນທີ 21 ສິງຫາ 2018 ທີ່ນະຄອນຫຼວງວຽງຈັນ, ໃຫ້ກຽດເປັນປະທານພິທີໂດຍ ທ່ານ ຊຶງໂຮ ຊອຍ ຜູ້ອໍານວຍການ ບໍລິສັດ ລາວຊໍາຊຸງ ເອເລັກໂຕຣນິກ ຈຳກັດຜູ້ດຽວ, ແລະ ມີບັນດານັກທຸລະກິດ, ນັກຮ້ອງ-ນັກສະແດງ ແລະ ບຸກຄົນທີ່ມີຊື່ສຽງຈາກຫຼາກຫຼາຍພາກສ່ວນ ເຂົ້າຮ່ວມຢ່າງຫຼວງຫຼາຍ.