ອີງຕາມບົດລາຍງານສະພາບການປະຕິບັດວຽກງານປະຈຳເດືອນສິງຫາ ແລະ ແຜນການວຽກຈຸກສຸມໃນເດືອນກັນຍາ 2018 ຂອງກະຊວງກະສິກຳ ແລະ ປ່າໄມ້ວັນທີ 16 ສິງຫາ 2018 ໃຫ້ຮູ້ວ່າ: ມາຮອດປັດຈຸບັນນີ້ ທົ່ວປະເທດສຳເລັດການປັກດຳເຂົ້ານາປີແລ້ວ 768.410 ເຮັກຕາເທົ່າກັບ 94% ຂອງເນື້ອທີ່ແຜນການ 817.800 ເຮັກຕາ. ໃນນັ້ນ, ໄດ້ຮັບຜົນກະທົບຈາກໄພທຳມະຊາດນ້ຳຖ້ວມ 91.149 ເຮັກຕາ, ສັດຕູພືດທຳລາຍ 620 ກວ່າເຮັກຕາ, ດິນເຈື່ອນ 200 ກວ່າເຮັກຕາ. ສະເລ່ຍການປັກດຳໃນແຂວງພາກເໜືອສຳເລັດແລ້ວ 97%, ພາກກາງ 94% ແລະ ພາຍໃຕ້ໄດ້ 93%. ສຳລັບແຜນການປູກພືດອື່ນໆເນື້ອທີ່ 763.000 ເຮັກຕາ, ປັດຈຸບັນຊາວກະສິກອນປູກແລ້ວປະມານ 220.216 ເຮັກຕາເທົ່າກັບ 29% ຂອງແຜນການ. 

ນອກຈາກໄພທຳມະຊາດນ້ຳສົ່ງຜົນກະທົບຕໍ່ເນື້ອທີ່ນາແລ້ວ, ຍັງສົ່ງຜົນກະທົບຕໍ່ສັດລ້ຽງຕາຍຫລາຍພັນໂຕ. ໃນນັ້ນ, ງົວ 7.000 ກວ່າໂຕ, ຄວາຍ 3.000 ກວ່າໂຕ, ແບ້ 600 ກວ່າໂຕ, ໝູ 2.300 ກວ່າໂຕ ແລະ ສັດປິກປະມານ 34.900 ກວ່າໂຕ, ໜອງປາຖືກນ້ຳຖ້ວມເສຍຫາຍ 1.500 ໜອງ ເຊິ່ງຫລາຍກວ່າໝູ່ແມ່ນຢູ່ແຂວງຄຳມ່ວນມີ 900 ກວ່າໜອງ, ແຂວງອັດຕະປື 280 ກວ່າໜອງ. 

ສຳລັບລະບົບຊົນລະປະທານເປ່ເພຫລາຍກວ່າ 500 ໂຄງການ, ຄອງເໜືອງເກືອບ 300 ແຫ່ງ, ແຂວງທີ່ໄດ້ຮັບຜົນກະທົບຫລາຍແມ່ນແຂວງອຸດົມໄຊ 68 ແຫ່ງ, ຫລວງພະບາງ 45 ແຫ່ງ, ບໍ່ແກ້ວ 21 ແຫ່ງ.

ແຫລ່ງຂ່າວ: ສຳນັກຂ່າວສານປະເທດລາວ