ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດອາເມລິກາ ເມື່ອວັນທີ 16 ສິງຫາ 2018ວ່າ ກະຊວງການເງິນສະຫະລັດອອກຖະແຫຼງການເມື່ອວັນພຸດ ປະກາດໃຊ້ມາດຕະການຂວ້ຳບາດຕໍ່ບໍລິສັດ Dalian Sun Moon Star International Logistics Trading Co.Ltd ສັນຊາດຈີນ ແລະ ບໍລິສັດ Sinsms Pte. ສັນຊາດສິງກະໂປທີ່ເປັນຫຸ້ນສ່ວນກັນ ຖານສົ່ງອອກຜະລິດຕະພັນເຄື່ອງດື່ມແອລກໍຮໍ ແລະ ຢາສູບໄປທີ່ເກົາຫຼີເໜືອ ເຊິ່ງຄິດເປັນມູນຄ່າ 1,000 ລ້ານໂດລາຕໍ່ປີ

ມາດຕະການຄວ້ຳບາດໃນຄັ້ງນີ້ຍັງຄວບຄຸມໄປເຖິງບໍລິສັດ Profinet Pte. Ltd. ຜູ້ໃຫ້ບໍລິການທ່າເຮືອສັນຊາດຣັດເຊຍ ແລະ ທ່ານ ວາຊີລີ ອາເລັກຊານໂດຣວິດ ໂຄລຊານອຟ ຜູ້ບໍລິຫານ ຖານໃຫ້ບໍລິການແກ່ເຮືອສັນຊາດເກົາຫຼີເໜືອຢ່າງໜ້ອຍ 6 ຄັ້ງ ໂດຍທ່ານ ໂຄຊານນອຟ ຍັງມີສ່ວນກ່ຽວຂ້ອງໂດຍກົງກັບຂໍ້ຕົກລົງກ່ຽວກັບເກົາຫຼີເໜືອ ແລະ ພົບປະຜູ້ແທນເກົາຫຼີເໜືອໃນຣັດເຊຍ ໂດຍລັດຖະມົນຕີກະຊວງການເງິນຂອງສະຫະລັດກ່າວວ່າ ການກະທຳດັ່ງກ່າວຂ້າງຕົ້ນ ນັບເປັນຄວາມພະຍາຍາມທີ່ຈະລະເມີດຕໍ່ຂໍ້ຫ້າມພາຍໃຕ້ບັນຢັດແຫ່ງກົດໝາຍສະຫະລັດ ເຊິ່ງມາດຕະການຄວ້ຳບາດຕໍ່ລັດຖະບານເກົາຫຼີເໜືອນັ້ນ ມີເປົ້າໝາຍໃຫ້ລັດຖະບານປຽງຢາງຢຸດຕິໂຄງການນິວເຄຣຍ.