ສຳນັກຂ່າວເອພີລາຍງານຈາກນະຄອນຫຼວງມະນີລາ ປະເທດ ຟິລິບປິນວ່າ ປະທານາທິບໍດີ ໂຣດຣິໂກດູເຕີເຕກ່າວໃນການຖະແຫຼງເຊິ່ງຖ່າຍທອດສົດທາງສະຖານີໂທລະທັດເມື່ອວັນອັງຄານອາທິດທີ່ຜ່ານມາວ່າ ຈະປະຫານຕຳຫຼວດທຸດຈະລິດທີ່ມີສ່ວນກ່ຽວຂ້ອງກັບຢາເສບຕິດ ແລະ ອາຊະຍາກຳອື່ນໆ ລາຍລະອຽດລະບຸວ່າຕຳຫຼວດກວ່າ 100 ຄົນ ເຊິ່ງບາງສ່ວນຖືກສອບສວນທາງດ້ານວິໄນ ແລະ ອາຍາ ກ່ຽວກັບການຂົ່ມຂືນ, ລັກພາຕົວ ແລະ ປຸ້ນຊັບ ຖືກນຳໄປທີ່ທຳນຽບປະທານາທິໍດີເພື່ອເຂົ້າພົບທ່ານ ດູເຕີເຕ
ທ່ານ ດູເຕີເຕກ່າວເຕືອນວ່າ ຈະກຳຈັດພວກເຂົາຫາກຍັງມີການກະທຳຜິດເກີດຂຶ້ນຢູ່ແບບນີ້ ໂດຍຢ້ຳວ່າເຂົາມີໜ່ວຍປະຕິບັດການພິເສດທີ່ເຝົ້າຈັບຕາເບິ່ງພຶດຕິກຳຂອງຕຳຫຼວດເຫຼົ່ານີ້ໄປຕະຫຼອດຊີວິດ ແລະ ຈະມີຄຳສັ່ງຂ້າທັນທີທີ່ພວກເຂົາທຳຄວາມຜິດພຽງເລັກໜ້ອຍ ອີກທັງຍັງສົ່ງຂໍ້ຄວາມໄປເຖິງຄອບຄົວຂອງບັນດາຕຳຫຼວດວ່າເມື່ອໃດທີ່ເລື່ອງແບບນີ້ເກີດຂຶ້ນ ຈົ່ງຢ່າໄດ້ມາຮຽກຮ້ອງເລື່ອງສິດທິມະນຸດ ເພາະເຂົາໄດ້ເຕືອນໄປແລ້ວ.